سولتۇستىك قازاقستان وبلىسىندا 2015 جىلى «بيزنەستىڭ جول كارتاسى 2020» مەملەكەتتىك باعدارلاماسىن ىسكە اسىرۋ اياسىندا شاعىن جانە ورتا بيزنەستى قولداۋعا 800 ملن تەڭگە ءبولىندى. بۇل تۋرالى "قامشى" پورتالى قازاقپاراتقا سىلتەمە جاساي وتىرىپ حابارلايدى.

سولتۇستىكقازاقستاندىقتار نەگىزىنەن جۇك جانە جولاۋشىلار تاسىمالى مەن تاعام ونىمدەرى ءوندىرىسى سالاسىنداعى كاسىپورىنداردى اشادى. جۇمىس ىستەپ تۇرعان بارلىعى 32 مىڭ بيزنەس سۋبەكتىلەرى بار. مەملەكەت ەلىمىزدىڭ تاۋار وندىرۋشىلەرىن ۇنەمى قولداپ كەلەدى. جاڭا ەكونوميكالىق ساياسات جاعدايىندا دا وزىنەن بۇل مىندەتتەمەنى العان ەمەس،  جىل باسىنان باستاپ باعدارلاما بويىنشا ءوڭىردىڭ 60-تان استام كاسىپكەرى جالپى سوماسى 2 ملرد. تەڭگەگە سۋبسيديا الدى.

 «جاڭا ەكونوميكالىق ساياسات جاعدايىندا بيزنەستى قولداۋ اسا وزەكتى. باعدارلاما بۇرىنعىشا ارەكەت ەتۋدە. بيىل ونى ىسكە اسىرۋعا  وڭىردە 800 ملن تەڭگە ءبولىندى. وسى باعدارلاما اياسىندا 143 كاسىپكەردىڭ ءوتىنىشى قاناعاتتاندىرىلدى. ولاردىڭ 89-ى -سۋبسيديالاۋ. بۇدان باسقا، وسى باعدارلاما اياسىندا كەپىلدىكتى قامتاماسىز ەتۋ بولماعان نەمەسە جەتپەگەن كەزدە دە كرەديتكە كەپىلدىك بەرىلەدى. بيىل سوماسى 671 ملن. تەڭگەگە 46 كەپىل بەرىلدى»، - دەپ حابارلادى سقو كاسىپكەرلىك جانە تۋريزم باسقارماسى باسشىسىنىڭ ورىنباسارى قۇرالاي جاروۆا.

سونداي-اق بيىل ءوڭىردىڭ 6 كاسىپكەرى ءوز يننوۆاسيالىق جوبالارىن ىسكە اسىرۋعا گرانت الدى. ولارعا جالپى سوماسى 10 ملن تەڭگە ءبولىندى.