اقتوبە وبلىسىنىڭ اكىمى بۇگىن قالا ىشىندەگى بازارلاردى ارالاپ، ونداعى باعا تۇراقتىلىعىن قارادى. ءىرى قارا مالدىڭ ەتىن ساتۋشىلار قاعازدىڭ ءبىر جاعىنا 850 تەڭگە، ەكىنشى جاعىنا 900-1100 تەڭگە دەپ جازعان. كوزبوياۋشىلىقتى كورگەن ءوڭىر باسشىسى باعانى ۇزدىكسىز باقىلاۋدى.  بۇل تۋرالى "قامشى" پورتالى  Bnews.kz-كە سىلتەمە جاساي وتىرىپ حابارلايدى.

 سەنبىدەگى جۇمىس "تابىس" كوممۋنالدىق بازارىنان باستالدى. مۇندا ءار اپتانىڭ سەنبى كۇنى اۋىل شارۋاشىلىعى جارمەڭكەسى وتەدى. بۇل جولى قارعالى، ىرعىز، تەمىر اۋداندارى بازارعا كوكونىس پەن ەت جانە ەت ونىمدەرىن، ءسۇت جانە ءسۇت ونىمدەرىن، بالىقتى قويدى. قالالىق كاسىپكەرلىك ءبولىمىنىڭ باسشىسى انار دارجانوۆانىڭ ايتۋىنشا، جارمەڭكەدەگى باعا بازار قۇنىنان 15-20 پايىزعا ارزان. مۇندا جەرگىلىكتى شارۋالاردىڭ ونىمدەرى مەن رەسەيلىك تاۋارلار ساتۋعا شىعارىلدى.

بازار ءىشىن ارالاعان ءوڭىر باسشىسى بەردىبەك ساپاربايەۆ الدىمەن ەت باعاسىنىڭ تۇراقسىزدىعىن سىنعا الدى. ماسەلەن، ءىرى قارا مال ەتىنىڭ ءبىر كەلىسى 850 تەڭگە دەپ جازۋلى تۇرعانىمەن، ەكىنشى بەتىندەگى باعا 900 تەڭگە بولىپ شىقتى. "بۇل دۇرىس ەمەس. باعا ءارتۇرلى. ادامداردى، تۇتىنۋشىلاردى الداۋعا بولمايدى. مۇنى "نۇر وتان" پارتياسىنىڭ وبلىستىق فيليالى قاتاڭ باقىلاۋعا الۋى كەرەك. ەكى ءتۇرلى باعا حالىقتى الداۋ. وعان جول بەرمەيمىز"، - دەيدى ب.ساپاربايەۆ. كەيىن بازار ىشىندەگى جەرگىلىكتى، وتاندىق ونىمدەردى قاراپ، ستاتيستيكالىق مالىمەتتەرمەن بازار باعاسىن سالىستىردى.

وبلىس اكىمى بەردىبەك ساپاربايەۆ "تابىس" بازارىنىڭ سانيتارلىق نورماعا ساي كەلمەيتىنىن، ەت شابۋ بولمەسىندەگى ەتتەردىڭ جەردە جاتقانىن سىنعا الدى. بازار اكىمشىسى، "ازيااگروحولدينگ" ءجشس-نىڭ ديرەكتورى ساۋرانبەك راحييەۆكە جاعدايدى رەتكە كەلتىرۋدى تاپسىردى. "ساتۋشىلار بازارداعى ورىن ءۇشىن ءارتۇرلى اقى تولەيدى. 17-25 مىڭ تەڭگە ارالىعىندا بولعانىمەن، ناقتى شارشى مەترىنە قانشا تولەيتىنىن بازار باسشىسى بىلمەي وتىر. جۇمىس دۇرىس جۇرگىزىلمەيدى"، - دەيدى ءوڭىر باسشىسى.

تۇستەن كەيىن بەردىبەك ساپاربايەۆ قالانىڭ ەسكى بولىگىندە ورنالاسقان ورتالىق بازارعا باردى. مۇنداعى كولىك تىعىنىن كورگەن ءوڭىر باسشىسى بازارعا جاياۋ بارۋدى ءجون كوردى. «مۇندا سانيتارلىق تالاپ ساقتالماعان. تاماق پەن كيىم-كەشەك ءبىر جەردە ساتىلادى. ءورت قاۋىپسىزدىگى دە رەتتەلمەگەن»، - دەيدى ب.ساپاربايەۆ.

مۇندا دا 130-150 تەڭگە بولعان ءسابىز باعاسى 100 تەڭگە دەپ اۋىستىرىلعان. ال 1100 تەڭگە بولعان ەت باعاسى 850 تەڭگە بولىپ وزگەرتىلدى. مۇنى دا وبلىس اكىمى اشكەرەلەپ، ساتۋشىلارعا ەسكەرتۋ جاسادى.

ايتا كەتەيىك، "تابىس" كوممۋنالىق بازارىندا كارتوپ 55، ءسابىز 75، قاربىز 25-30 تەڭگەگە ساتىلدى. ال ءىرى قارا مال ەتى 850-1300 تەڭگە ارالىعىندا بولدى.