قازاقستاندا 2015 جىلدىڭ قازان ايىنان باستاپ، ساۋدا جانە قىزمەت كورسەتۋ سالاسىندا ەڭبەك ەتەتىن كاسىپكەرلەر جاڭا نەسيە جەلىسىنە قول جەتكىزە الادى. بۇل تۋرالى "قامشى پورتالى قازاقپاراتقا سىلتەمە جاساي وتىرىپ حابارلايدى.

بۇل تۋرالى بۇگىن الماتىدا ورتالىق كوممۋنيكاسيالىق قىزمەتى فيليالىنىڭ «ينفلياسيالىق تارگەتتەۋ رەجىمىنە نەگىزدەلگەن جاڭا ۆاليۋتالىق ساياسات» تاقىرىبى بويىنشا وتكەن كوشپەلى وتىرىسى بارىسىندا «دامۋ» كاسىپكەرلىكتى دامىتۋ قورى» اق باسقارما ءتورايىمىنىڭ ورىنباسارى ميراس بەيسەمبايەۆ مالىمدەدى.    

ونىڭ ايتۋىنشا، «دامۋ» كاسىپكەرلىكتى دامىتۋ قورى» اق مەن ازيا دامۋ بانكى اراسىندا  228 ملن. دوللارعا ( تەڭگەمەن 63-64 ملرد. تەڭگە) نەسيەلىك كەلىسىم جاسالعان. بۇعان ۇكىمەت كەپىلدەمە بەرىپ وتىر.

«ءبىز سونداي-اق، ەكىنشى دارەجەلى ءتورت بانكپەن نەسيەلىك كەلىسىمگە قول قويدىق. ازيا دامۋ بانكى تاراپىنان بولىنەتىن 228 ملن. اقش دوللارى وسى ءتورت بانككە تەڭگەلەي سالىناتىن بولادى. ياعني، «سەسنابانك» اق - 86 ملن. اقش دوللارى، «قازكوممەرسبانك» اق - 82،3 ملن. اقش دوللارى، «Delta Bank» اق - 50 ملن. اقش دوللارى جانە «كازينۆەستبانك اق - 9،7 ملن. اقش دوللارى بالاماسىمەن سالىنادى. سونىمەن، كاسىپكەرلەر الداعى ايدىڭ باسىنان باستاپ، سول بانكتەرگە جۇگىنە الادى.  نەسيە شامامەن 7 جىلعا 14 پايىزدىق مولشەرلەمەمەن بەرىلەدى. ەگەر الىنعان نەسيە ەكونوميكانىڭ باسىمدىق بەرىلگەن سالالارىنا جۇمسالاتىن بولسا، وندا مەملەكەت تاراپىنان 14 پيىزدىق مولشەرلەمە 7 پايىزعا تۇسىرىلەدى. ال كەپىلى جەتكىلىكسىز بولىپ جاتسا، وندا «دامۋ» قورى ءوز تاراپىنان بۇل نەسيەلەر بويىنشا كەپىلدەمە بەرە الادى»، - دەدى م. بەيسەمبايەۆ.

سونىمەن قاتار، ول اتالعان نەسيە بويىنشا ۆاليۋتالىق تاۋەكەلدىك ورىن المايتىندىعىن، كاسىپكەرلەر ءۇشىن بۇل جاعىنان ەشقانداي ءقاۋىپ بولمايتىندىعىن ايتتى.

«ءبىز بۇل جەردە ۆاليۋتا-پايىزدىق سۆوپ وپەراسياسىن قولدانامىز. ۇلتتىق بانكپەن بۇل جونىندە كەلىسىم بار. ياعني، ءبىز سىرتتان دوللارمەن اقشا الا وتىرىپ، ۇلتتىق بانكپەن ۆاليۋتا-پايىزدىق سۆوپ وپەراسياسىن جاسايمىز. ۆاليۋتا باعامى تۇراقتى تۇردە بەكىتىلەدى. سودان كەيىن نەسيە تەڭگەلەي يگەرىلە باستايدى. ۇلتتىق بانكتىڭ باعامىنىڭ وزگەرۋى بۇل نەسيەلەرگە كەرى اسەر ەتپەيدى»، - دەدى م. بەيسەمبايەۆ.