قاراعاندى وبلىسىندا جاس كاسىپكەر ازامات چالگىزبايەۆ سۋرەتى بەدەرلى شىنىدان جاسالعان ويۋ-ورنەكتى قىش تاقتايشا جاساۋدىڭ ءوز تەحنولوگياسىن ويلاپ تاپتى. بۇل تۋرالى "قامشى" پورتالى بي نيۋس-كە سىلتەمە جاساي وتىرىپ حابارلايدى.

ازاماتتىڭ ءوزى اڭگىمەلەگەندەي، ازىرگە ونىڭ تاقتالارى ەلىمىزدە وندىرىلەتىن جالعىز ءونىم. ينتەرەر شەبەرلەرى ءوز جۇمىسىندا يتاليادان اكەلىنەتىن قىمبات يمپورتتىق تاقتاعا تاۋەلدى، ونىڭ باعاسى 14 پەن 45 مىڭ تەڭگە ماڭايىندا. ال ازامات ءوز ءونىمىن 3500-12000 تەڭگەگە باعالاۋدا.

«دەكوراتيۆتى شىنى ءوندىرۋ تەحنولوگياسى مىناداي، ارنايى قوسپا بەلگىلى ءبىر تەمپەراتۋرادا شىنىمەن قوسا قىزدىرىلىپ، مونوليت پايدا بولادى، وسى رەتتە بەلگىلى تەمپەراتۋرا دەڭگەيىنەن اسىرماعان ءجون، سەبەبى شىنى شىتىناپ كەتۋى مۇمكىن»، - دەيدى ازامات.

ونىڭ ايتۋىنشا، دايىن ءونىمدى كەز كەلگەن ينتەرەردە پايدالانۋعا بولادى.

«بۇل تەحنولوگيانىڭ ەرەكشەلىگى نەدە: ءونىمنىڭ تۇستىك گامماسى، بىزدە ونىڭ سانى – 28. ولاردى ۇتىمدى ۇيلەستىرە وتىرىپ، قاجەتتى فاكتۋراعا قول جەتكىزۋگە بولادى. ماسەلەن، قازاقستاندا از-كەم وندىرىلەتىن ءمارمار، اعاش فاكتۋرالارى. ونىڭ ءبارى بىزدە نەگىزىنەن رەسەيدەن اكەلىنەدى، ال قىمباتتارى يتاليا مەن يسپانيادان»، - دەپ ەسكەردى ا.چالگىزبايەۆ.

وسىناۋ بىرەگەي تەحنولوگيانىڭ اۆتورى ازامات قاجەتتى ناتيجەگە ىشكى سەزىمىنە قۇلاق تۇرە وتىرىپ جەتكەنىن ايتادى.

«يدەيانىڭ وزىنە سىناپ كورۋ جانە قاتەلەسۋ ءادىسى ارقىلى كەلدىم. ءوزىم تەحنيكالىق زەرتحانانىڭ جەتەكشىسى بولىپ جۇمىس ىستەدىم. وسى زەرتحانادا تالداۋ جاساپ، سىناپ كورىپ، قىزدىرىپ، ءپىسىرىپ، قۇرامىن وزگەرتىپ، اقىرى وسىنداي ناتيجەگە قول جەتكىزدىم. بىرىنشىدەن، ول مىقتى ءارى ۇزاق قىزمەت اتقارادى، ەكىنشىدەن، سىز بەن ىلعال وتكىزبەيدى. بۇل تاقتانى ىرگەگە دە، ەدەنگە دە، ءتىپتى، عيماراتتىڭ سىرتىن قاپتاۋعا دا پايدالانۋعا كەلەدى»، - دەپ ءتۇسىندىردى مامان.

تاياۋدا قازاقستاندىق كاسىپكەر ەلوردالىق شىنى وندىرۋشىلەرمەن كەزدەسىپ، بىرەگەي تەحنولوگيا كوڭىلدەرىنەن شىققان ولار ازاماتتى استاناعا جۇمىس ىستەۋگە شاقىرىپتى.

الايدا ازامات «دامۋ» قورىنىڭ «Startup «Bolashak» ستارتاپ-جوبالار بايقاۋىنا قاتىسىپ، 3 پەن 7 ملن تەڭگە اراسىندا گرانت جەڭىپ السام دەيدى. سونداي-اق ءوز يدەياسىن قۇرىلىس سالاسىنداعى ينۆەستورلارعا دا تانىستىرسام دەگەن ويى بار. بولاشاقتا ءوز ءوندىرىس وشاعىن اشۋعا دا نيەتتى.

«ەگەر ءبارى ويداعىداي وتسە، جۇمىسقا 6-12 ادام الام با دەپ وتىرمىن. لوگيستيكا جاعىن دا ويلاستىرۋ كەرەك. دەگەنمەن، اسا ۇلكەن قيىندىق تۋىندامايدى دەپ ويلايمىن، سەبەبى ءبىزدىڭ پريوزەرسك تاسجولداردىڭ قيىلىسىندا ءساتتى ورنالاسقان. ءقازىر، ەڭ باستىسى، بەدەرلى ساندىك شىنى تاقتالاردىڭ ءبىزدىڭ ەلىمىزدە دە ءارى ارزان باعاعا وندىرىلەتىن الدەقايدا كوپ ادام بىلسە ەكەن، ەستىسە ەكەن دەيمىن»، - دەپ ويىن تۇيىندەدى ازامات ەسىمدى جاس كاسىپكەر.