الماتىنىڭ اتىشۋلى باراحولكاسىنان تاعى دا شۋ شىقتى. ءبىرازدان بەرى ءۇنسىز جاتقان بازار ساۋداگەرلەرى بۇگىن تاڭەرتەڭ ايقايعا باستى. ارتىنان سابىرعا كەلىپ، الماتىنىڭ جاڭا اكىمىن وزدەرىنە قوناققا شاقىردى. بۇل تۋرالى «قامشى» پورتالى  nur.kz-كە سىلتەمە جاساي وتىرىپ حابارلايدى.

ال تۇرعىنداردىڭ ساۋدا جاساماي، بازار مەن ۇيلەرىنىڭ اراسىندا ساندالىپ جۇرگەنىنە ءبىر ايداي ۋاقىت بولىپتى. وعان سەبەپ – پوليسيا وزدەرىن قاراۋىلداۋدى كۇشەيتكەن كورىنەدى.

ءتىپتى “قۇلاگەردىڭ” قاسىندا ارنايى جاساق ساربازدارى وتىرعان اۆتوبۋس كۇنى-تۇنى تۇراتىن ادەت تاپقان. ال كەيبىرى وزدەرىن، وتكەن جىلى ءجيى ورتەنگەن بازارلاردىڭ بۇرىنعى ساۋداگەرلەرىمىز دەپ تانىستىرعان، نارازى توپ، “ەڭ بولماسا، قىس تۇسكەنشە قالعان تاۋارلارىن ساتىپ الۋعا” رۇقسات سۇراپ وتىر.

“اسحانا سالىپ العان. مىنا جەر بولمايدى، ءبارىمىز نەسيە العانبىز. نەگە مىنالارعا بولادى، بولاتىن نارسە بارلىق جەردە بولادى”، – دەيدى ساۋداگەر.

كەيبىرى،  باسقالارعا بەرىلگەن مۇمكىندىك – نەگە وزدەرىنە بەرىلمەيتىندىگىنە اشۋلى.

“قالالىقتىڭ ءبارى قويعان، اينالىپ كەلگەندە، وسى باراحولكانى قويمايدى. ون بالام بار، كىم باعادى ونى”، – دەيدى ساۋداگەر التىن جولامانوۆا.

“انەۋ كۇنى وسى جەردە قۇلادىم. 180-مەن قۇلادىم. ءولىپ كەتكەندە، ەشكىمنىڭ ەشتەڭەكەسى كەتپەيدى. دەنساۋلىعىم دا جوق. اكىمگە ايتار سالەمىم، جاقسىلاپ ايت. 80 ادام جىلاپ-ەڭىرەپ وتىر دەپ. بىزگە جولدان بەرمەي-اق قويسىن، ءوزىمىزدىڭ كىشكەنتاي جەرىمىزدى بەرسىن دەپ”، – دەيدى ساۋداگەر اياگوز يمانوۆا.

ساۋداگەرلەر، وزدەرىنىڭ جابايى ساۋدا وكىلدەرى ەكەنىن جاسىرمايدى. ءبىراق بۇل كۇيگە وتكەن جىلدارداعى ورتتەردىڭ كەسىرىنەن تۇستىك دەيدى. ايتۋلارىنشا، قالانىڭ بۇرىنعى باسشىلىعى، “ۇلىگەر” بازارىن جاۋىپ جاتقان تۇستا، وزدەرىن وزگە بازارلارعا ورنالاستىرامىز دەپ ۋادە بەرگەن كورىنەدى.

الايدا، ايتىلعان ءسوز – ايتىلعان جەرىندە قالعان. ەندى، ساۋداگەرلەر جاڭا اكىمنىڭ قايىرىمىنان دامەلى، ءتىپتى جاعدايلارىن كورۋگە قالا اكىمى ءوزى كەلىپ كەتكەنىن قالايدى.

“اكىم، ءسىز “نۇر وتاننان” كەلىپ وتىرسىز. حالىقتىڭ جاعدايىن ويلاڭىزشى، كەلىڭىزشى ءبىزدىڭ بازارعا. ون مينۋتىڭىزدى قيىپ”، – دەيدى ساۋداگەر گۇلبارشىن مامىروۆا.

ءبىراق بازار ورنالاسقان الاتاۋ اۋدانىنىڭ باسشىلىعى بولسا، ەشقانداي جابايى ساۋداعا جول جوقتىعىن شەگەلەپ ايتتى.

“بۇل كىسىلەر وسى جەردە كوپ ساۋدا جاسادى. بۇل كىسىلەرگە ورىن بەردىك. ءقازىر 30-40 ادام. بۇرىن 400-500 ادام بولعان. سولاردىڭ ءبارى ورىن الدى. مىنە، ورىن بار”، – دەيدى الاتاۋ اۋدانى اكىمىنىڭ ورىنباسارى جاڭاباي كۇلبايەۆ.

ءبىر كەزدەرى ورتەنگەن تاۋارلارىنىڭ قالدىعىن ءالى كۇنگە ساۋدالاي الماي ءجۇرمىز دەگەن ساۋداگەرلەر، بۇگىنگى ايتىلعان تالاپتارىمىز ورىندالماسا، جول جاۋىپ، ەرەۋىلگە شىعامىز دەيدى.

جانە نارازىلىق شاراسىنا شىعار رۇقساتتى قالا اكىمىنىڭ وزىنەن الماق.

 «قامشى» سىلتەيدى