قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن قازاقستان رەسپۋبليكاسى پرەزيدەنتى جانىنداعى سىبايلاس جەمقورلىققا قارسى كۇرەس ماسەلەلەرى جونىندەگى كوميسسيانىڭ وتىرىسى ءوتتى

كۇن تارتىبىنە سايكەس جەر قاتىناستارى سالاسىنداعى، اق بۇلاق» جانە «بيزنەستىڭ جول كارتاسى – 2020» باعدارلامالارىن ىسكە اسىرۋعا بولىنگەن بيۋدجەت قاراجاتىن يگەرۋ بارىسىنداعى سىبايلاس جەمقورلىققا قارسى قابىلدانىپ جاتقان شارالار تالقىلاندى. بۇل تۋرالى "قامشى" پورتالى akorda.kz-كە سىلتەمە جاساي وتىرىپ حابارلايدى.

گ.ءابدىقالىقوۆا الەمنىڭ دامىعان 30 ەلىنىڭ قاتارىنا ەنۋگە باعىتتالعان «100 ناقتى قادام» ۇلت جوسپارىندا مەملەكەت باسشىسى قويعان مىندەتتەر مەملەكەتتىك باعدارلامالاردى ىسكە اسىرۋعا بولىنەتىن بيۋدجەت شىعىستارىنا قاتاڭ باقىلاۋ جۇرگىزۋدى تالاپ ەتەتىنىن ايتتى.    

مەملەكەت حالىقتىڭ ءومىر ساپاسىن جاقسارتۋعا جانە كاسىپكەرلىكتى دامىتۋعا قولايلى جاعدايلار جاساۋعا باعىتتالعان اۋىز سۋمەن قامتاماسىز ەتۋ جانە «بيزنەستىڭ جول كارتاسى – 2020» باعدارلامالارىن ىسكە اسىرۋ ءۇشىن ءىرى مولشەردە قارجى بولۋدە. ال جاسالعان تالداۋ بارىسى باعدارلامالاردى جۇزەگە اسىرۋ كەزىندە بيۋدجەت قاراجاتىن ءبولۋ ىسىندە سىبايلاس جەمقورلىقتىڭ قاۋىپ-قاتەرى جوعارى بولاتىنىن كورسەتتى.

مەملەكەتتىك حاتشى مەملەكەتتىك ورگاندار نازارىن جەر قاتىناستارى سالاسىندا شەشىمدەر قابىلداۋدىڭ ايقىندىعىن قامتاماسىز ەتۋ بويىنشا قوسىمشا ۇيىمداستىرۋشىلىق-قۇقىقتىق مەحانيزمدەر ازىرلەۋ، جالپى حالىققا ەلەكتروندىق فورماتتا مەملەكەتتىك قىزمەت كورسەتۋ اياسىن كەڭەيتۋ قاجەتتىگىنە اۋداردى.

وتىرىستا ۇلتتىق ەكونوميكا ءمينيسترى ە.دوسايەۆتىڭ، باس پروكۋرور
ا.داۋىلبايەۆتىڭ، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى ا.شپەكبايەۆتىڭ باياندامالارى تىڭدالدى.

كوميسسيا وتىرىسىنىڭ قورىتىندىسى بويىنشا مەملەكەتتىك ورگاندارعا ءبىرقاتار تاپسىرمالار مەن ۇسىنىمدار بەرىلدى.