كورەيانىڭ كۆاندجۋ قالاسىندا وتكەن 28ء-شى جازعى ۋنيۆەرسيادا ويىندارىندا قازاقستان قۇراماسى 146 ەلدىڭ ىشىندە 11ء-شى ورىن يەلەندى. بۇگىن تۇڭعىش پرەزيدەنت كىتاپحاناسىندا وسى ويىنداردا ەل نامىسىن قورعاپ، جەڭىسپەن ورالعان وتانداستارىمىز ماراپاتتالدى. جالپى، كوماندامىزدىڭ ويىنشىلارى التى التىن جانە ءتورت قولا جۇلدەگە قول جەتكىزدى. بۇل تۋرالى "قامشى" پورتالى  inform.kz-كە سىلتەمە جاساي وتىرىپ حابارلايدى.

سپورتشىلاردى ماراپاتتاعان مادەنەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ ءتوراعاسى ەلسيار قاناعاتوۆ سوڭعى جىلدارى ۋنيۆەرسيادا ويىندارىندا قازاقستان الدىڭعى 10-20 كوماندانىڭ اراسىندا جۇرگەنىن جانە بۇل جاقسى جەتىستىك ەكەنىن اتاپ ءوتتى. 

«جالپى، دۇنيەجۇزىلىك جازعى جانە قىسقى ۋنيۆەرسيادا ويىندارى -دارەجەسى مەن مارتەبەسى بويىنشا وليمپيادا ويىندارىنان كەيىن تۇراتىن جارىس. جانە وسىنداي ۇلكەن جارىستاردا قازاقستاننىڭ ستۋدەنتتەرى مەن جاستارى جىل سايىن مەدال سانىن كوبەيتىپ، تۋىمىزدى جەلبىرەتىپ جۇرگەنى وتە قۋانتادى»، - دەيدى ە.قاناعاتوۆ. 

28ء-شى جازعى ۋنيۆەرسيادادا جەرلەسىمىز - جەڭىل اتلەت ۆيكتوريا زيابكينا 100 جانە 200 مەتر قاشىقتىققا جۇگىرۋدەن قاتارىنان ەكى التىن مەدال جەڭىپ العان. ەستافەتاعا قاتىسقان يۋليا راحمانوۆا، سۆەتلانا يۆانچۋكوۆا،اناستاسيا تۋلپانينا مەن ۆيكتوريا زيابكينا بىرگە قازاقستاننىڭ ءۇشىنشى التىن جۇلدەسىن يەلەندى. سونىمەن قاتار، سىرىقپەن سەكىرۋدەن نيكيتا فيلليپوۆ، تاەكۆوندو ونەرىنەن نۇرسۇلتان مامايەۆ جانە سۋدا جۇزگەن دميتريي بالانديندەر كومانداعا تاعى ءۇش التىن مەدال سىيلادى. دميتريي بالاندين بۇل التىن جۇلدەسى ارقىلى ريو وليمپياداسىنا جولداما ۇتىپ الدى.

قولا مەدال يەلەرىن اتاپ وتسەك، ولار - جانار قاشقىن، دميتريي بالاندين، قىزدار اراسىندا كوماندامەن ستەند اتۋدان اسەم ورىنباي، ءجانيا ايدارحانوۆا، انگەلينا ميششۋك، ەرلەر قۇراماسىنداعى ستەند اتۋدان اندرەي فلوروۆ، الەكساندر ياششەنكو، ۆلاديمير پوچيۆالوۆتار.