"Kazakhstan Rubber Resycling" مەكەمەسى قازاقستاننىڭ ينۆەستيسيالىق قورىنىڭ قولداۋىمەن كاسىبىن قايتا دوڭگەلەتتى. وڭدەلگەن قالدىق قاي جەرلەردە قولدانىلادى؟ قالدىقتار قاراۋسىز قالمايدى. بۇل تۋرالى "قامشى" پورتالى Baq.kz -كە سىلتەمە جاساي وتىرىپ حابارلايدى.

ءاۆتوموبيلدىڭ مىناداي جارامسىز شينالارى ەندى كادەگە اسپاق. استانادا 2010 جىلى اشىلعان بۇل زاۋىت قارجى قولبايلاۋ بولىپ، جۇمىسى توقتاعان. وسى كۇزدەن باستاپ تۇرالاعان كاسىپورىن قىزمەتى قايتا جانداندى. قازاقستاننىڭ دامۋ بانكى بۇل كاسىپورىنعا 6،8 ملن دوللار ءبولىپ، تىنىسىن اشتى. قارىز قامىتىن كيىپ، تىعىرىققا تىرەلمەۋ ءۇشىن بانك جايلى جاعداي جاساعان. ناتيجەسىندە 3 جىل بويى شاڭ باسىپ تۇرعان اپپاراتتارعا جان ءبىتىپ، قان جۇگىرىپ، قايتا ىسكە قوسىلدى.

ايان ەسجانوۆ،«قازاقستاننىڭ ينۆەستيسيالىق قورى» اق ينۆەستيسيالىق جوبالار دەپارتامەنتىنىڭ ديرەكتورى:

- بۇل مەكەمەنىڭ نەسيەنى تولەۋگە مۇمكىندىگى بولمادى. قازاقستاننىڭ ينۆەستيسيالىق قورى ءوز قول ۇشىن بەردى. بۇل جوبا استانانىڭ ەكولوگيالىق جاعدايىن جاقسارتۋعا ۇلكەن ۇلەسىن قوسادى دەگەن سەنىمدەمىز.

ات شاپتىرىم اۋماقتىڭ 9 مىڭ شارشى مەتر الاڭىن الىپ تۇرعان مەكەمە جىلىنا 30 مىڭ توننا شينا وڭدەۋگە قاۋقارلى. ازىرگە زاۋىت جۇمىسىنا 30 ادام تارتىلعان.

ەرمەك ابدييەۆ Kazakhstan Rubber Resycling زاۋىتىنىڭ ديرەكتورى:

- ناۋرىزدان باستاپ سىناق جۇمىستارىن جۇرگىزگەنبىز. ەلوردا توڭىرەگىنەن جينالعان مىڭ تونناداي شينانى وڭدەدىك. ءقازىر زاۋىت تولىقتاي ءوز قىزمەتىنە كىرىستى. بۇل جوبانىڭ قۇنى 10 ملن دوللاردان اسادى.

قالدىق ۇنتاعىنان بالالار مەن سپورت الاڭىنا توسەنىشتەر ازىرلەنەدى. باستىسى – بالا ومىرىنە ءقاۋىپسىز. اڭسات يساتاي زاۋىتپەن كەلىسىم-شارت جاساسقان كاسىپكەرلەردىڭ ءبىرى. الداعى ۋاقىتتا 3D ويىنشىقتاردى شىعارۋدى جوسپارلاۋدا.

اڭسات يساتاي كاسىپكەر:

- ءقازىر نەشە ءتۇرلى گيپستەن جاسالعان ويىنشىقتار قويىلىپ جاتىر. ءبىراق، ولاردىڭ ءبارى ءقاۋىپسىز ەمەس بالالارعا. ازىرشە بۇنداي جوبا جوق، قۇداي قالاسا كەلەسى جىلدان باستاپ، ءبىز انىق وسىنى باستايمىز دەپ جوسپارلاپ وتىرمىز.

استانادا جىلىنا 480 مىڭداي جارامىز شينا قوقىسقا تاستالادى. قالدىقتى قاراۋسىز قالدىرۋ ەكولوگياعا كەسىرىن تيگىزەرى انىق. سوندىقتان زاۋىت قالا تۇرعىندارىن جارامسىز شينانى مەكەمەلەرىنە وتكىزىپ، شاھار تازالىعىنا ءوز ۇلەسىن قوسۋعا ۇندەپ وتىر.