قىركۇيەكتىڭ 21-22 كۇندەرى «قتج» ۇك» اق-نىڭ پرەزيدەنتى اسقار مامين باستاعان دەلەگاسياسى ليانيۋنگان (قحر) قالاسىنداعى «قىتاي-جىبەك جولى» ەكىنشى حالىقارالىق كورمەسىنە قاتىستى. فورۋمعا جۇڭگو، جاپونيا، وڭتۇستىك كورەيا، قازاقستان، تايۆان، ەۋروپالىق ەلدەردىڭ 200-دەن استام لوگيستيكالىق جانە تەڭىز كەمە كومپانيالارى قاتىستى، - دەپ حابارلايدى «قتج» ۇك» اق باسپا ءسوز قىزمەتى. بۇل تۋرالى "قامشى" پورتالى Baq.kz-كە سىلتەمە جاساي وتىرىپ حابارلايدى.

كورمەدە «قتج» ۇك» اق باسشىسى قازاقستاننىڭ ترانزيتتىك الەۋەتى تۋرالى بايانداما جاسادى. بايانداما بارىسىندا قازاقستاننىڭ «نۇرلى جول» جاڭا ەكونوميكالىق ساياساتى اياسىنداعى جۇڭگو حالىق رەسپۋبليكاسىمەن سينەرگيالىق «ءبىر بەلدەۋ- ءبىر جول» باعدارلاماسىن ۇيلەستىرۋ جايى ايتىلدى. سونداي-اق، 2015 جىلعى سەگىز ايدا قىتاي-ەۋروپا-قىتاي باعدارىنداعى كونتەينەرلىك پويىزداردىڭ 2014 جىلمەن سالىستىرعاندا 105 كونتەينەرلىك پويىزدان 291-گە ارتقاندىعى اتالىپ ءوتىلدى. «ليانيۋنگان قالاسىنداعى قازاقستان –جۇڭگو حالىقارالىق لوگيستيكالىق كومپانياسى» 14 ايدا 150 مىڭ كونتەينەردى وڭدەگەن. بۇل كورسەتكىشتى 2020 جىلدارعا قاراي 500 مىڭ كونتەينەرگە جەتكىزۋ جوسپارلانىپ وتىر.

ساپار بارىسىندا سزيانسۋ پروۆينسياسىنىڭ گۋبەرناتورى ليۋ سيۋەيۋن مەن ليانيۋنگان قالاسىنىڭ مەرى چجاو سياوسزيانمەن ەكىجاقتى كەزدەسۋلەر وتكىزىلدى. كەزدەسۋلەر بارىسىندا 2015 جىلعى تامىزدىڭ 31-ىندەگى قازاقستان رەسپۋبليكاسى پرەزيدەنتىنىڭ قحر-عا ساپارى بارىسىندا قول قويىلعان «قورعاس-شىعىس قاقپاسى» اەا دامىتۋعا ارنالعان ينۆەستيسيالىق 600 ملن. اقش دوللارى كولەمىندەگى قارجىنى يگەرۋ جايى ساراپتالدى. ونىڭ سىرتىندا «ليانيۋنگان قالاسىنداعى قازاقستان-قىتاي حالىقارالىق بىرلەسكەن لوگيستيكالىق كومپانياسىن» ودان ءارى دامىتۋ مەن ليانيۋنگان پورتى ماڭىنداعى شاڭحاي ىنتىماقتاستىعى ۇيىمىنا قاتىسۋشى مەملەكەتتەردىڭ لوگيستيكالىق پاركىنىڭ تەحنيكالىق-ەكونوميكالىق دايەكتەمەسىن جاساۋ جايى قاراستىرىلدى.

ايتا كەتەيىك، سزيانسۋ پروۆينسياسى ىشكى جالپى ءونىمى جىلىنا 1،2 تريلليون دوللاردى قۇرايتىن 78 ميلليون تۇرعىنى بار دامىعان ءوڭىر. ليانيۋنگان پورتى قىتايدىڭ سەرپىندى دامىپ كەلە جاتقان جىلىنا 200 ميلليون توننا جۇك وڭدەيتىن پورتى سانالادى. ليانيۋنگان قالاسىندا 5 ميلليون حالىق تۇرادى.