جاقىندا قازاق مەملەكەتتىك قىزدار پەداگوگيكالىق ۋنيۆەرسيتەتىندە ق ر ءبىلىم جانە عىلىم ءمينيسترى اسلان ءسارىنجىپوۆتىڭ قاتىسۋىمەن ارۋلار ورداسىندا بوي كوتەرگەن ءۇش بىردەي نىسان – 9 قاباتتى جاتاقحانا، «اققۋ» اتتى ءجۇزۋ باسسەينى جانە «اق شاتىر» جازعى ويىن-ساۋىق الاڭىنىڭ رەسمي تۇساۋكەسەر ءراسىمى ءوتتى. بۇل تۋرالى "قامشى" پورتالى ايقىن-اقپاراتقا سىلتەمە جاساي وتىرىپ حابارلايدى.
ءۇش بىردەي نىساننىڭ لەنتاسىن قيعان ق ر ءبىلىم جانە عىلىم ءمينيسترى اسلان باكەن ۇلى مەن قازمەمقىزپۋ رەكتورى دينار ءجۇسىپالى قىزى، سونداي-اق سىيلى قوناقتار ءاربىر عيماراتتىڭ ىشكى جابدىقتالۋىمەن تانىسىپ، ريزاشىلىقتارىن ءبىلدىردى. ستۋدەنتتەردىڭ داستارقانىنان ءدام تاتقان مينيستر شاكىرتتەرمەن تىلدەسىپ، ءوقۋ-بىلىم جايىندا سىر شەرتتى.
«اق شاتىر» جازعى الاڭىندا قۇتتىقتاۋ ءسوز سويلەگەن ا.باكەن ۇلى: «قازىرگى تاڭدا قازاقستاندا جاستار ءۇشىن بارلىق جاعداي جاسالىپ وتىر. جىل سايىن مەملەكەت 150 مىڭ وقۋ گرانتىن بولەدى. كەلەسى جىلدان باستاپ گرانتپەن وقيتىن ستۋدەنتتەردىڭ ستيپەندياسى 25 پايىزعا وسەدى. تەحنيكالىق ماماندىقتى يگەرىپ، ءوندىرىستە جۇمىس ىستەيمىن دەگەن جاستار ءۇشىن يندۋستريالاندىرۋ باعدارلاماسى بويىنشا جاڭا جۇمىس ورىندارى، عىلىممەن اينالىسامىن دەگەن شاكىرتتەر ءۇشىن زەرتحانالىق ورىندار اشىلىپ جاتىر. وسى وقۋ ورنىندا وقيتىن ستۋدەنتتەر ۇستازدىق جولدى تاڭداعان. وزدەرىڭىز بىلەسىزدەر، ءمۇعالىمنىڭ ءرولى وتە مارتەبەلى. ۋنيۆەرسيتەتتى ءبىتىرىپ، مەكتەپكە باراتىن ستۋدەنتتەرگە جاقسى جاڭالىق بار. ەلباسىنىڭ شەشىمىمەن كەلەسى جىلدان باستاپ مۇعالىمدەردىڭ جالاقىسى 30-50 پايىزعا وسەتىن بولادى. سوندىقتان جاستار ءۇشىن بارلىق جاعداي جاسالىپ وتىر. تەك قانا جاقسى وقىپ، ەڭبەك ەتۋىمىز كەرەك. وسىنداي كەرەمەت عيماراتتار اشىلا بەرسىن. قازاقستانىمىز وركەندەي بەرسىن!» – دەگەن جۇرەكجاردى تىلەگىن ايتتى.
450 ورىنعا ارنالعان جاڭا جاتاقحانا ەلباسىنىڭ تاپسىرماسىنا وراي ستۋدەنتتەردى جاتاقحانامەن قامتۋعا باعىتتالعان «ستۋدەنتتىك باسپانا» مەملەكەتتىك باعدارلاماسىنىڭ اياسىندا سالىندى. زامان تالاپتارىنا ساي سالىنعان جاتاقحانا جاڭا جيھازدارمەن تولىق جابدىقتالعان، ينفراقۇرىلىمدىق مۇمكىندىگى دە جوعارى. ءبىرىنشى قاباتىندا قىزدارعا ارنالعان مەديسينالىق ورتالىق ورنالاسقان. سونىمەن قاتار قىزداردىڭ ءسان سالونى، جاتتىعۋعا ارنالعان فيتنەس زالى، كومپيۋتەر، دەمالىس بولمەلەرى جۇمىس ىستەيءدى. ءار قاباتتا كىر جۋاتىن بولمەلەر، كەرەك-جاراقتارمەن جابدىقتالعان اسۇيلەر بار. زاماناۋي تەلەكوممۋنيكاسيالىق جەلى، Wi-Fi سىمسىز جەلىلەرى تارتىلعان. ءبىر سوزبەن ايتقاندا، جاڭا ستۋدەنتتەر ۇيىندە بويجەتكەندەردىڭ بوس ۋاقىتتى ۇتىمدى وتكىزۋلەرىنە بارلىق جاعداي ويلاستىرىلعان. قىزدار ۋنيۆەرسيتەتىندە ەلىمىزدىڭ بارلىق الىس ايماقتارىنان كەلەتىن ستۋدەنت-قىزداردىڭ كوپ كەلىپ وقيتىنىن ەسكەرسەك، بۇل مەملەكەتتىڭ ۇلت تاربيەشىلەرىنە دەگەن قامقورلىعى ەكەنى انىق.
ماسەلەن، ءجۇزۋ باسسەينى جاستاردىڭ دەنساۋلىعىن جاقسارتۋ ماقساتىن كوزدەيتىن «سالاماتتى قازاقستان» باعدارلاماسى اياسىندا بوي كوتەردى. سەبەبى ەلىمىز ءۇشىن دەنى ساۋ، رۋحى تازا ۇرپاق ءوسىرىپ تاربيەلەۋ ەڭ ماڭىزدى دا نەگىزگى ماسەلە. ەلباسى ن.ءا.نازاربايەۆ «قازاقستان – 2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋىندا «سالاۋاتتى ءومىر سالتىن قالىپتاستىرۋ – ۇلت دەنساۋلىعىنىڭ كىلتى بولىپ تابىلادى. ءبىز بالالارىمىزدىڭ دەنساۋلىعىن قامتاماسىز ەتۋگە جاڭا تاسىلدەر ەنگىزۋ ماسەلەسىمەن جۇمىس ءجۇرگىزۋىمىز قاجەت، جاستار دەنساۋلىعىنا ءمان بەرۋىمىز كەرەك» دەگەن بولاتىن. وسى ورايدا، پايدالانۋعا بەرىلەتىن ءجۇزۋ باسسەينى سپورتپەن اينالىسۋعا، دەنى ساۋ ۇرپاق قالىپتاستىرۋعا، جاستاردىڭ سالاۋاتتى ءومىر سالتىن ۇستانۋىنا ءوز ىقپالىن تيگىزەرى ءسوزسىز.
ءۇشىنشى نىسان – «اق شاتىر» جازعى ويىن-ساۋىق الاڭى. بۇل ەلوردادا ورنالاسقان «حان شاتىرى» ىسپەتتى سالىنعان. كەڭ دە اسەم ءارى ۇلتتىق ناقىشتا تۇرعىزىلعان الاڭنىڭ ىشكى ساۋلەتى قازاق ءۇي سياقتى اسپەتتەلىپ، توبەسىندەگى شاڭىراققا اينالا ۋىقتار قويىلعان.
سالتاناتتى راسىمنەن كەيىن اسلان باكەن ۇلى، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى سەرىك پىرالييەۆ پەن الماتى قالالىق جاستار ساياساتى ماسەلەسى جونىندەگى باسقارمانىڭ باسشىسى مىندەتىن اتقارۋشى نۇرلان سىدىقوۆ باستاعان قوناقتار قىزدار ۋنيۆەرسيتەتى ونەرپازدارىنىڭ سالتاناتتى كونسەرتىن تاماشالادى.
