قازاقستاندىق دۇنگەن دەلەگاسياسى ينچۋان قالاسىندا (قحر) قىتاي-اراب ەكونوميكالىق ىنتىماقتاستىعى فورۋمىنا قاتىستى. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

ەسكە سالساق، نينسيا-حۋەي اۆتونوميالىق اۋدانىنىڭ ينچۋان قالاسىندا 80-نەن استام ەلدەن جانە جۇڭگو وڭىرلەرىنەن 10 مىڭنان استام قوناقتار قاتىسقان قىتاي-اراب ىنتىماقتاستىعى فورۋمى ءوتتى.

«فورۋم بارىسىندا قازاقستاندىق دەلەگاسيا ءبىرقاتار شارتتار جاساسۋعا نيەت تانىتتى. بۇعان قازاقستان مەن جۇڭگو اراسىنداعى ىنتىماقتاستىقتىڭ ماڭىزدى بۋىنى سانالاتىن قازاقستان دۇنگەن قاۋىمداستىعى باستاماشى بولدى»، - دەپ مالىمدەدى «قازاقپارات» حاا تىلشىسىنە قازاقستاندىق دەلەگاسيا مۇشەسى «قازاقستانداعى دۇنگەندەر قاۋىمداستىعى» ەتنومادەني بىرلەستىگى باسقاراتىن «جاڭا جىبەك جولى» حالىقارالىق اكادەمياسى» قق پرەزيدەنتى حۋسەي داۋروۆ.

ونىڭ ايتۋىنشا، قازاقستاننان كەلگەن دەلەگاسيا نينسيا فورۋمىندا ماڭعىستاۋ وبلىسىنداعى «يننوۆاسيالىق وندىرىستىك پارك» قۇرىلىسى تۋرالى، سونداي-اق الماتى وبلىسىنداعى اۋىل شارۋاشىلىعى سالاسىنداعى ىنتىماقتاستىق تۋرالى كەلىسىمدەرگە قول قويدى.

«نينسيا ساۋدا جانە ونەركاسىپ دەپارتامەنتىمەن كەزدەسۋدە قانت زاۋىتىن سالۋ بويىنشا الماتى وبلىسىمەن ىنتىماقتاستىق ماسەلەلەرى، اۋىل شارۋاشىلىعى ونىمدەرىنىڭ  ءوندىرىسى مەن ولاردى قايتا وڭدەۋدىڭ وزىق تەحنولوگيالارىنا ينۆەستيسيا قۇيۋ مۇمكىندىگى تالقىلاندى. ءبىزدىڭ وڭىرلەردىڭ  ىنتىماقتاستىق جوبالارىن العا جىلجىتاتىن ىسكەرلىك كەڭەس قۇرۋ ۇسىنىلدى»، - دەدى سۇحبات بەرۋشى.

فورۋم اياقتالعاندا نينسيا-حۋەي اۆتونوميالىق اۋدانىنىڭ ۆيسە-گۋبەرناتورى ازامات ۆان حەسان تۇسكى اس بەردى، سونىڭ بارىسىندا ول نينسيا ۇكىمەتىنىڭ اتىنان قازاقستان دۇنگەن قاۋىمداستىعىن قحر مەن ق ر اراسىنداعى ەكىجاقتى قاتىناستاردى دامىتۋعا قوسىپ جاتقان وراسان ۇلەسى ءۇشىن العىس ءبىلدىردى. «2014 جىلى نينسيا دەلەگاسياسى قازاقستانعا بارعان، سول كەزدە قازاقستان دۇنگەن قاۋىمداستىعى جۇڭگو وكىلدەرىمەن جىلى كەزدەۋ وتكىزگەن»، - دەپ اتاپ ءوتتى ح. داۋروۆ.

ورتالىق ازيادا 130 مىڭداي دۇنگەن بار، ولاردىڭ باسىم بولىگى قازاقستاندا، قىرعىزستان، وزبەكستاندا تۇرادى. قازاقستان اۋماعىندا 50-60 مىڭ دۇنگەن بار، ولاردىڭ بابالارى قىتايدىڭ شەنسي، گانسۋ جانە نينسيا  اۋماقتارىنىڭ تۋمالارى، ولار وندا 138 جىل بۇرىن وسى پروۆينسيالاردا   انتيسيندىك كوتەرىلىستىڭ قىسىمىنان قاشىپ بارعان بولاتىن. جامبىل وبلىسىندا 35 مىڭنان استام دۇنگەن تۇرادى.

«بۇگىندە نينسيا - قىتايدىڭ بەس ۇلتتىق اۆتونوميالىق اۋداندارىنىڭ ءبىرى، وندا 2،5 ملن-نان استام دۇنگەن (حۋەيسزۋ) تۇرادى. مۇندا سوڭعى جىلدارى بالامالى ەنەرگەتيكا، اۋىل شارۋاشىلىعى، ونەركاسىپ دامۋ ۇستىندە. قحر ۇكىمەتى جەرگىلىكتى تۇرعىندار ءۇشىن ەلەۋلى جەڭىلدىكتەر مەن ارتىقشىلىقتار بەرە وتىرىپ، ۇلتتىق اۆتونوميانىڭ ۇيلەسىمدى دامۋى مەن گۇلدەنۋىنە باسا ءمان بەرەدى»، - دەدى ول.

2014 جىلى قىتاي-اراب ىنتىماقتاستىعى فورۋمىنىڭ قۇرىلعانىنا 10 جىل تولدى، ونى قۇرۋعا نەگىز بولعان 22 ەلدى بىرىكتىرەتىن قىتايدىڭ اراب مەملەكەتتەرى ليگاسى (امل ) ەلدەرىمەن قاتىناسى بولاتىن. امل حالقىنىڭ جالپى سانى 300 ملن ادامدى قۇرايدى، جالپى الاڭى - 13،6 ملن. شارشى مەتر.