بۇگىن پارلامەنت ءماجىلىسىنىڭ جالپى وتىرىسىندا پالاتا دەپۋتاتتارى «شانحاي ىنتىماقتاستىق ۇيىمىنا مۇشە مەملەكەتتەردىڭ ۇكىمەتتەرى اراسىنداعى حالىقارالىق اۆتوموبيل تاسىمالدارى ءۇشىن قولايلى جاعدايلار جاساۋ تۋرالى كەلىسىمدى راتيفيكاسيالاۋ تۋرالى» زاڭ جوباسىن ماقۇلدادى. اتالعان كەلىسىم 2014 جىلى دۋشانبە قالاسىندا جاسالعان. بۇل تۋرالى قامشى پورتالى قازاقپارتقا سىلتەمە جاساي وتىرىپ حابارلايدى.

تۇتاستاي العاندا، قۇجات شىۇ مەملەكەتتەرى اراسىنداعى حالىقارالىق اۆتوموبيل تاسىمالدارى ءۇشىن قولايلى جاعداي جاساپ، ونى دامىتۋ ءۇشىن تاراپتاردىڭ كۇش-جىگەرىن ۇيلەستىرۋدى قاراستىرادى. بۇدان بولەك، كەلىسىم اياسىندا حالىقارالىق اۆتوموبيل تاسىمالدارىنا قاتىستى تاراپتاردىڭ قۇجاتتاماسىن، راسىمدەرى مەن تالاپتارىن جەڭىلدەتۋ جانە ۇيلەستىرۋ شارالارى قامتىلادى.

«قۇجاتتا قازاقستان، جۇڭگو، قىرعىزستان، رەسەي، تاجىكستان جانە وزبەكستان اراسىندا رۇقسات جۇيەسى نەگىزىندە كەلىسىلگەن باعىتتار بويىنشا جۇك تاسىمالداۋ كوزدەلىپ وتىر. بۇل ءۇشىن كەلىسىم اياسىندا التى باعىت ايقىندالعان. ولاردىڭ تورتەۋى قازاقستان ارقىلى وتەدى. سونىمەن بىرگە، ءار باعىتتى اشۋ مەرزىمى بەكىتىلگەن ءارى ولاردىڭ مەرزىمى 2020 جىلدان كەشىكتىرىلمەيدى. كەلىسىم كۇشىنە ەنگەننەن كەيىن ۇيىمعا مۇشە مەملەكەتتەردىڭ تاسىمالداۋشىلارى بەكىتىلگەن باعىتتار بويىنشا تاسىمالداردى جۇزەگە اسىرۋعا، سونىڭ ىشىندە قىتايدىڭ شىعىس بولىگىنەن باتىس ەۋروپاعا دەيىن جۇك تاسۋعا مۇمكىندىك الادى»، - دەدى زاڭ جوباسى بويىنشا بايانداعان ق ر ينۆەستيسيالار جانە دامۋ ءمينيسترى اسەت يسەكەشيەۆ.

ونىڭ ايتۋىنشا، كەلىسىم قابىلدانعان جاعدايدا قازاقستان ارقىلى اۆتوموبيل كولىگىمەن وتەتىن ترانزيتتىك جۇكتەردىڭ كولەمى 2020 جىلدان باستاپ، 73 ملن تونناعا دەيىن ارتاتىنى كۇتىلەدى.