مەملەكەتتىك كىرىستەر جونىندەگى كوميتەت ءتوراعاسىنىڭ ورىنباسارى قايرات مياتوۆ "قازاقستان رەسپۋبليكاسى ازاماتتارىنىڭ تولەم قابىلەتتىلىگىن قالپىنا كەلتىرۋ جانە بانكروتتىعى تۋرالى" زاڭ جوباسىنىڭ اشىق تالقىلاۋى كەزىندە كوپتى تولعاندىرعان سۇراقتارعا جاۋاپ بەردى.
قايرات مياتوۆتىڭ ايتقاندارى تومەندە تەزيس تۇرىندە ۇسىنىلىپ وتىر:
♦ سوتتان تىس بانكروتتىقتى (قارىزدى تولەي المايتىنىن راستاپ، ونى تولەۋدەن بوساتىلۋ - رەد) بانك الدىنداعى بەرەشەگى 1600 اەك – 4 ملن 900 مىڭ تەڭگەدەن، وتباسىداعى ءار ادامنىڭ تابىسى تومەنگى كۇنكورىس دەڭگەيىنەن (36 018 تەڭگە) اسپايتىن جەكە تۇلعالار راسىمدەي الادى؛
♦ بانكروت دەپ جاريالانعان ادام ءۇش جىل بويى ەلدەن شىعا المايدى، بەس جىل بويى كرەديت پەن ميكروقارجى ۇيىمدارىنان قارىز الا المايدى، قايتادان ءوزىن بانكروت دەپ جاريالاۋعا تەك جەتى جىلدان كەيىن رۇحسات ەتىلەدى؛
♦ زاڭ قابىلدانعاننان كەيىن بانكتەر كرەديت بەرۋ ساياساتىن قاتاڭداتىپ، قارىز الۋشىنىڭ تولەم قابىلەتىن ءجىتى تەكسەرۋى مۇمكىن، ويتكەنى وتەلمەگەن قارىز كرەديتوردىڭ موينىنا ىلىنەدى؛
♦ ءوزىن قاساقانا بانكروت دەپ جاريالاعاندار انىقتالعان جاعدايدا الاياقتىق بابى بويىنشا قىلمىستىق جاۋاپكەرشىلىككە تارتىلۋى مۇمكىن؛
♦ بانكروت دەپ جاريالانعان ازاماتتار قارجى ساۋاتىن ارتتىراتىن كۋرستاردان وتۋگە مىندەتتەلەدى.
