رەسەي سىرتقى ىستەر ءمينيسترى سەرگەي لاۆروۆ ۋكرايناداعى قاقتىعىستىڭ ءۇشىنشى دۇنيەجۇزىلىك سوعىسقا ۇلاسىپ كەتۋ ءقاۋپى بارىن جانە ناتو كييەۆتى قارۋ-جاراقپەن قامتاماسىز ەتۋ ارقىلى ماسكەۋمەن جاناما سوعىسىپ جاتقانىن ەسكەرتتى.
رەسەيلىك اقپارات اگەنتتىكتەرىنە سۇحبات بەرگەن لاۆروۆ كييەۆتىڭ كەلىسسوزدەرگە دەگەن كوزقاراسىن سىنادى.
"ءبىراق ءبىز [ۋكراينا پرەزيدەنتى ۆلاديمير] زەلەنسكييدىڭ دەلەگاسياسىمەن كەلىسسوزدەر جۇرگىزۋدى جالعاستىرىپ جاتىرمىز. بۇل بايلانىستار جالعاسا بەرەدى" دەدى لاۆروۆ.
ول "بۇرىنعى اكتەر زەلەنسكييدى كەلىسسوزدەر جۇرگىزىپ جاتقانداي كەيىپ تانىتتى" دەپ ايىپتادى.
"ول جاقسى اكتەر. ەگەر ونىڭ ايتقانىن مۇقيات قاراپ، مۇقيات وقىساڭىز، مىڭ قايشىلىق تاباسىز" دەيدى لاۆروۆ.
لاۆروۆ ءۇشىنشى دۇنيەجۇزىلىك سوعىستىڭ ءقاۋپى شىنايى ەكەنىن ايتادى. ول "ينتەرفاكس" اگەنتتىگىنە بەرگەن سۇحباتىندا "قاۋىپ-قاتەر اۋىر، ءۇشىنشى دۇنيەجۇزىلىك سوعىس ءقاۋپى – شىن، ونى باعالاماۋعا بولمايدى" دەدى.
ونىڭ ايتۋىنشا، كييەۆ بيلىگى ادال كەلىسسوزدەر جۇرگىزىپ جاتقان جوق. بۇرىنعى اكتەر ۆلاديمير زەلەنسكيي بريتان پرەمەر-مينيسترى بوريس دجونسون سياقتى كەلىسسوزدەرگە ەمەس، العا قويىلعان مىندەتكە جۇگىنبەي، جۇرتشىلىق الدىندا ويناعان.
لاۆروۆ مالىمدەمەسىنەن بىرنەشە ساعات بۇرىن اقش مەملەكەتتىك حاتشىسى انتوني بلينكەن مەن اقش قورعانىس ءمينيسترى للويد وستين كييەۆكە بارىپ، ۋكرايناعا كوبىرەك اسكەري كومەك كورسەتۋگە ۋادە بەرگەن. وستين امەريكا قۇراما شتاتتارى رەسەيدىڭ السىرەگەنىن كورگىسى كەلەتىنىن جانە ماسكەۋدى جەڭۋ ءۇشىن ۋكراينانى قارۋلاندىرۋعا ۋادە بەرگەنىن ايتتى.
اقش سونداي-اق وسى اپتادا ۋكرايناعا قاتىستى 40-تان استام ەلدىڭ باسىن قوسىپ، جينالى وتكىزبەك. ول جەردە ۋكرايناعا كوبىرەك قارۋ-جاراق جەتكىزىلىمىنە نازار اۋدارىلادى دەپ كۇتىلىپ وتىر.
لاۆروۆتىڭ ايتۋىنشا، رەسەي قانداي جاعدايدا دا يادرولىق سوعىستى بولدىرماۋعا ۇمتىلۋ ءپرينسيپىن ساقتاۋ ءۇشىن كوپ جۇمىس ىستەپ جاتىر.
"بۇل – ءبىزدىڭ بارلىعىن نەگىزگە الاتىن نەگىزگى ۇستانىمىمىز. ءقازىر ريسك ايتارلىقتاي" دەدى لاۆروۆ. رەسەي سوڭعى ۋاقىتتا يادرولىق كۇشتەرىن جوعارى دايىندىققا قويعان.
رەسەيدىڭ ەكى ايدان بەرگى ۋكرايناعا شابۋىلى 1945 جىلدان بەرى ەۋروپالىق مەملەكەتكە جاسالعان ەڭ ءىرى شابۋىل بولىپ وتىر. سوعىس مىڭداعان ادامنىڭ ءومىرىن قيدى، قالالار مەن ەلدىمەكەندەر قيراندىعا اينالدى، 5 ميلليوننان استام ادام شەتەلگە قاشۋعا ءماجبۇر بولدى.
ماسكەۋ ءوز ارەكەتتەرىن ۋكراينانى قارۋسىزداندىرۋ جانە ونى فاشيستەردەن قورعاۋ جولىنداعى ارنايى اسكەري وپەراسيا دەپ اتايدى. كييەۆ پەن باتىس مۇنى رەسەي پرەزيدەنتى ۆلاديمير ءپۋتيننىڭ ەگەمەن ەلگە قارسى سەبەپسىز باسقىنشىلىق سوعىسى ءۇشىن ويلاپ شىعارعان جالعان سىلتاۋى دەيدى.
"Financial Times" گازەتى رەسەي پرەزيدەنتىمەن اڭگىمەلەسكەن ءۇش ادامعا سىلتەمە جاساي وتىرىپ، پۋتين ەندى مۇمكىندىگىنشە ۋكراينا اۋماعىن باسىپ الۋعا نيەتتى ەكەنىن دەپ حابارلادى.
ماسكەۋ ەندى ۋكراينانىڭ شىعىسىنداعى نەگىزىنەن ءورىستىلدى ونەركاسىپتىك ايماق دونباستى الۋ ماقساتىن ايتادى. ەكى جاق تا شىعىستا اسكەري ارەكەتتەر ءجۇرىپ جاتىر دەپ مالىمدەگەنىمەن، رەسەي ءالى تولىق قۇرلىق شابۋىلىن باستاعان جوق جانە ايتارلىقتاي جەتىستىكتەرگە جەتكەن جوق دەپ ەسەپتەلىنەدى.
پىكىر قالدىرۋ