بۇۇ-نىڭ باس حاتشىسى پان گي مۋن ايەلدەر، بالالار جانە جاسوسپىرىمدەردىڭ دەنساۋلىعىن ساقتاۋ بويىنشا جاھاندىق ستراتەگيانىڭ ىسكە قوسىلعانى تۋرالى جاريالادى. بۇل باستامانىڭ باستى ماقساتى - 2030 جىلعا قاراي ايەلدەر، بالالار جانە جاسوسپىرىمدەردىڭ ءولىم پايىزىن تومەنگى دەڭگەيگە دەيىن قىسقارتىپ، سونداي-اق ولاردىڭ دەنساۋلىعىنىڭ جاقسارۋىنا، اماندىعىنا سەپتىگىن تيگىزۋ. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

الداعى بەس جىلدا باعدارلاماعا 25 ميلليارد اقش دوللارى سالىناتىن بولادى.

جاڭا ستراتەگيا الەمدىك كوشباسشىلاردىڭ تۇراقتى دامۋ سامميتىندە قابىلداعان تۇراقتى دامۋ سالاسىنداعى الداعى 15 جىلداعى ماقساتتار مەن مىندەتتەردى ىسكە اسىرۋدىڭ ءبىر بولىگى بولىپ تابىلادى، دەپ حابارلايدى بۇۇ-نىڭ جاڭالىقتار ورتالىعىنان.

سامميتكە جينالعان مەملەكەت جانە ۇكىمەت باسشىلارى، حالىقارالىق ۇيىمدار مەن جەكەمەنشىك سەكتوردىڭ وكىلدەرى، عالىمدار جانە بۇۇ-نىڭ وزگە سەرىكتەستەرى بۇل باستاماعا قولداۋ ءبىلدىردى. بۇل باستاما ايەلدەر، بالالار جانە جاسوسپىرىمدەردىڭ اراسىنداعى ءولىمدى قىسقارتىپ، سونداي-اق ولاردىڭ دەنساۋلىعىن جاقسارۋىنا، اماندىعىنا سەپتىگىن تيگىزۋگە باعىتتالعان.

«بۇگىن مەن ءسوز ەتىپ وتىرعان ايەلدەر، بالالار جانە جاسوسپىرىمدەردىڭ دەنساۋلىعىن ساقتاۋ سالاسىنداعى جاھاندىق ستراتەگيا ومىرگە بەيىمدى جانە دەنى ساۋ قوعامدى قالىپتاستىرۋعا كومەكتەسە الادى. ءبىز سەرىكتەسىپ جۇرگىزىپ وتىرعان جۇمىسىمىزدىڭ جەمىس بەرىپ وتىرعانىن دالەلدەدىك. مەن دە، بۇۇ-نىڭ بۇكىل جۇيەسى دە الداعى ۋاقىتتا ارامىزداعى نازىك جاندىلاردىڭ ءومىرىن ساقتاۋ جانە جاقسارتۋ ءۇشىن بار كۇشىمىزدى سالاتىن بولامىز»، - دەدى پان گي مۋن.