الماتىدا رەسپۋبليكالىق "امان كەلەشەك" مادەني-سپورتتىق فەستيۆالى اياسىندا الما جەۋدەن جاڭا رەكورد جاسالدى. بۇل ءۇشىن ق ر تۇڭعىش پرەزيدەنتى - ەلباسى قورىنىڭ سپورتتىق-جاتتىقتىرۋ كەشەنىنىڭ فۋتبول ستاديونىنا جۇزدەرى بال-بۇل جانعان 3،5 مىڭ مەكتەپ وقۋشىسى شىقتى. كەيىن ولارعا الما تاراتىلدى. بۇدان سوڭ، فەستيۆال جۇرگىزۋشىسىنىڭ بۇيرىعى بويىنشا بارلىق بالا ءبىر مەزەتتە الما جەۋگە كىرىستى. وسىلايشا، قازاقستاننىڭ رەكوردتار كىتابى - قازاقستاننىڭ اقپاراتتىق-ەنسيكلوپەديالىق انىقتاماسىنا جاڭا رەكورد ەنگىزىلدى. بۇل تۋرالى قامشى پورتالى http://today.kz/-كە سىلتەمە جاساي وتىرىپ حابارلايدى.
"بۇل الما جەۋ يدەياسى - ق ر تۇڭعىش پرەزيدەنتى - ەلباسى قورىنا تيەسىلى. فەستيۆالگە ءار ورتانىڭ بالالارى جينالدى عوي. سوندىقتان ءبىز ولاردى قالايدا بىرىكتىرگىمىز كەلدى. ولاردى بىرىكتىرەتىن قانداي دا ءبىر مەيىرىمدى شارا ۇيىمداستىرعىمىز كەلدى. سودان وسى يدەيا تۋىندادى. ونىڭ ۇستىنە الما - الماتىنىڭ سيمۆولى. مۇنداي رەكورد بۇعان دەيىن قازاقستاندا جاسالماعان"، - دەدى ق ر تۇڭعىش پرەزيدەنتى - ەلباسى قورىنىڭ PR مەنەدجەرى ءاليا قادىروۆا.
رەكورد جاسالعان سوڭ، قازاقستاننىڭ رەكوردتار كىتابىنىڭ باس رەداكتورى قۋانىش تازابەكوۆ ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورى ساعىندىق نۇراحانوۆقا ءتيىستى سەرتيفيكاتتى تابىس ەتتى.
