بۇگىن قازاقستاندا ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى. 31 مامىر ءاربىر قازاقستاندىق ءۇشىن ەل ومىرىندەگى قايعىلى وقيعالار تۋرالى ەسكە الۋ كۇنى بولدى. جۇزدەگەن مىڭ ادام ادىلەتسىز سوتتالىپ، قۋدالانىپ، اشارشىلىققا ۇشىرادى. شقو اكىمى دانيال احمەتوۆ قۋعىن-سۇرگىنگە ۇشىراعان قازاقستاندىقتاردىڭ وتباسىلارىمەن كەزدەسىپ، كىناسىز سوتتالعان ادامداردى اقتاۋ بويىنشا جۇرگىزىلىپ جاتقان جۇمىستار تۋرالى ايتىپ بەردى.

"ادىلەتسىز سوتتالعانداردى ەستە ساقتاي وتىرىپ، ءبىز تاۋەلسىزدىگىمىزدىڭ نەگىزى بولىپ تابىلاتىن جارقىن بولاشاقتى قۇرا الامىز. وتكەن عاسىردىڭ ەڭ قاتىگەز تراگەديالارىنىڭ بىرىندە جازىقسىز زارداپ شەككەندەردىڭ بارلىعىنا قۇرمەت كورسەتۋ – ءارقايسىمىزدىڭ پارىزىمىز" - دەپ اتاپ ءوتتى مەملەكەت باسشىسى قاسىم-جومارت كەمەل ۇلى توقايەۆ.

سول قايعىلى جىلدارى قازاقستان ميلليونداعان ءتۇرلى ۇلت پەن ءدىن وكىلدەرىن قابىلدادى. كۇشتەپ جەر اۋدارۋ بارىسىندا بەس ميلليونعا جۋىق ادام قازاق جەرىنەن پانا تاۋىپ، جاڭا وتانىنا يە بولدى.

بۇگىن وسكەمەن قالاسىنداعى ساياسي قۋعىن-سۇرگىن قۇرباندارىن ەسكە الۋ مۇراجايىندا ماڭىزدى ءىس-شارا ءوتتى. شاقىرىلعانداردىڭ ىشىندە رەپرەسسيا، دەپورتاسيا قۇرباندارىنىڭ ۇرپاقتارى مەن وبلىستىق دوستىق ءۇيىنىڭ ەتنومادەني بىرلەستىكتەرىنىڭ وكىلدەرى، سونداي-اق ستۋدەنتتەر مەن وقۋشىلار بولدى.

قاسىم-جومارت كەمەل ۇلى توقايەۆتىڭ تاپسىرماسى بويىنشا 2020 جىلى ساياسي قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا قۇرىلعانى بەلگىلى.

"شىعىس قازاقستان وڭىرلىك كوميسسياسى ءبىر جارىم جىل ىشىندە 373 قوردى زەردەلەپ، 19 مىڭنان استام ماتەريالدى قارادى. 1213 ءىس دايىندالىپ، مەملەكەتتىك كوميسسيانىڭ قاراۋىنا جىبەرىلدى. بۇل جاي عانا ستاتيستيكا ەمەس، جاي عانا ءىس ەمەس – بۇل ادامداردىڭ تاعدىرى، ءبىز ولاردىڭ ەسىمدەرى اقتالىپ، ۇرپاقتارى الدىندا تاريحي ادىلەتتىلىكتى قالپىنا كەلتىرۋىمىز كەرەك" دەدى شقو اكىمى دانيال احمەتوۆ.

كەزدەسۋ بارىسىندا قاتىسۋشىلار قۋعىن-سۇرگىنگە ۇشىراعانداردىڭ ناقتى وقيعالارىمەن، سوتتالعانداردىڭ تۇرمىستا پايدالانعان زاتتارىمەن، تۋعان-تۋىسقاندارى ءۇشىن جازىلعان حاتتارمەن تانىستى. رەپرەسسياعا ۇشىراعان بيجامال ابەسوۆ پەن ليديا رووتتىڭ ۇرپاقتارى ءوز ەستەلىكتەرىمەن ءبولىستى.

"ءبىزدىڭ اتامىز كارىم قۇنداقبايەۆ زايسان اۋدانىنىڭ كەڭساي اۋىلىندا قاراپايىم جۇمىسشى وتباسىندا دۇنيەگە كەلگەن. ىسكەرلىگى مەن ۇيىمداستىرۋشىلىق قابىلەتىنىڭ ارقاسىندا الدىمەن بولشەنارىم اۋداندىق پارتيا كوميتەتىنىڭ ەكىنشى حاتشىلىعىنا، كەيىن كوكپەكتى اۋداندىق پارتيا كوميتەتىنىڭ ءبىرىنشى حاتشىلىعىنا تاعايىندالدى. وكىنىشكە وراي، 1937 جىلدىڭ 7 جەلتوقسانىندا كارىم قۇنداقبايەۆ تۇتقىندالدى. 1938 جىلى ول اتىلدى. كەزىندە ساياسي قۋعىن - سۇرگىننىڭ قۇربانى بولعان اتامىز كارىم قۇنداقبايەۆتىڭ ءومىر تاريحى مۇقيات زەردەلەۋدى تالاپ ەتەدى" - دەدى بيجامال ابەسوۆا.

ساياسي قۋعىن-سۇرگىن قۇرباندارىنا ارنالعان مۇراجاي 2012 جىلى وسكەمەن قالاسىندا اشىلدى. بارلىق ەكسپوناتتار سول قايعىلى جىلدارى قايتىس بولعانداردىڭ تۋىستارىنان الىندى.

شقو اقپارات ورتالىعى