ءال-فارابي اتىنداعى قازاق ۇلتتىق ۋنيۆەرسيتەتى الەمدەگى ەڭ وزىق 300 ۋنيۆەرسيتەتتىڭ قاتارىنا قوسىلدى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

ءال-فارابي اتىنداعى قازۇۋ تۇلەكتەر قاۋىمداستىعىنىڭ پرەزيدەنتى قايرات ءمامي ۇلتتىق ۋنيۆەرسيتەتتىڭ باسشىلىعىن، بارلىق پروفەسسورلار مەن وقىتۋشىلار قۇرامىن الەمدەگى ەڭ وزىق 300 ۋنيۆەرسيتەتتىڭ قاتارىنا قوسىلۋىمەن قۇتتىقتادى.

«ۋنيۆەرسيتەت رەيتينگىسىنىڭ تەك سوڭعى جىلى 30 پوزيسياعا جاقسارۋى ۇيلەسىمدى، ماقساتقا باعىتتالعان جانە كاسىبي جۇمىستىڭ تىكەلەي ناتيجەسى بولىپ تابىلادى. بۇل - ۋنيۆەرستيتەت ۇجىمىنىڭ مۇمكىندىكتەرى مەن وراسان الەۋەتىنىڭ ايقىن ايعاعى.

قازاق ۇلتتىق ۋنيۆەرسيتەتىنىڭ الدا دا ۇلكەن جەتىستىككە جەتۋى وتە ماڭىزدى. بۇگىندە ول يننوۆاسيالىق ءبىلىم مەن ولاردى قوعامدىق ومىردە ءىس جۇزىندە قولدانۋدىڭ ناعىز كلاستەرىنە اينالدى. ۋنيۆەرسيتەتتىڭ كوپتەگەن عىلىمي-زەرتتەۋ جوبالارى مەن تاجىريبەلىك-كونسترۋكتورلىق زەرتتەۋلەرى الەمنىڭ 30 وزىق ەلىنىڭ قاتارىنا كىرۋدى ماقسات تۇتقان رەسپۋبليكامىزدىڭ ودان ءارى دامۋى ءۇشىن بەرىك ىرگەتاس بولىپ تابىلادى.

ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورلارى مەن وقىتۋشىلار قۇرامىنا تاۋەلسىز قازاقستاننىڭ يگىلىگى ءۇشىن الداعى ۋاقىتتا دا جەمىستى ەڭبەك، تولايىم تابىس جانە جاڭا جەتىستىكتەر تىلەيمىن!»، دەلىنگەن حاتتا.