تالدىقورعاندا جىلداعى قالىپتاسقان ءۇردىس بويىنشا بيىل دا «قالا كۇنى» جوعارى دەڭگەيدە اتالىپ ءوتتى. كەشە قالا تۇرعىندارى كوپتەگەن يگى ىستەردىڭ كۋاسى بولدى، دەپ حابارلايدى الماتى وبلىسى اكىمدىگىنىڭ باسپا ءسوز قىزمەتى. بۇل تۋرالى قامشى پورتالى قازاقپاراتقا سىلتەمە جاساي وتىرىپ حابارلايدى.

قالا كۇنىنە ارنالعان مادەني-كوپشىلىك شارالار لەگى الماتى وبلىسىنىڭ اكىمى اماندىق باتالوۆ باستاعان قوناقتاردىڭ داڭق وبەليسكىنە گۇل شوقتارىن قويۋ راسىمىنەن باستالدى. باتىرلاردىڭ ەرلىگىنە تاعزىم ەتكەن ءوڭىر باسشىسى تالدىقورعان قالاسىنىڭ اسكەري گارنيزونىنىڭ قازاقستان رەسپۋبليكاسىنىڭ قارۋلى كۇشتەرىندە قولدانىستا تۇرعان قارۋ-جاراقتار مەن اسكەري تەحنيكالار قويىلعان كورمەسىن تاماشالادى. بۇل كورمە كوپشىلىكتىڭ كوزايىمىنا اينالدى.

مەرەكە كۇنىنە وراي قالانىڭ تاعام سالاسىندا ەڭبەك ەتىپ جۇرگەن كاسىپكەرلەرى دە وزدەرىنىڭ سۇبەلى ۇلەستەرىن قوستى. اتاپ ايتقاندا «قالا كۇنى» مەن قازاق حاندىعىنىڭ 550 جىلدىعىنا ارنايى ديامەترى 550 سم. بولاتىن الىپ پيسسا مەن 80 كەلى تارتاتىن كولەمدى تورت ازىرلەنىپ، قالا تۇرعىندارىنا تارتۋ ەتىلدى.

سونىمەن قاتار قالانىڭ كاسىپورىندارى مەن ءوندىرىس ۇجىمدارى ءوز ونىمدەرىنەن كورمە ۇيىمداستىرىپ، حالىقتىڭ قىزىعۋشىلىعىن وياتتى. قالانىڭ ونەرلى جاس بۇلدىرشىندەرىنىڭ ازىرلەگەن كونسەرتتىك باعدارلاماسى جيىلعانداردىڭ كوڭىلدەرىنەن شىعىپ، ىقىلاسىنا بولەندى.

مەرەكەلىك شارالار تالدىقورعان قالاسىنىڭ ورتالىق ستاديونىندا جالعاستى. وسى كۇنى ستاديون دا جۇرتشىلىققا تولى بولدى. شارانى وبلىس اكىمى اماندىق باتالوۆ اشىپ، تالدىقورعاندىقتاردى مەرەكەلەرىمەن قۇتتىقتادى:

- ءقادىرلى تالدىقورعاندىقتار! سىزدەردى قالا كۇنى مەرەكەسىمەن جانە قۇربان ايت مەيرامىمەن شىن جۇرەكتەن قۇتتىقتايمىن.

پرەزيدەنتىمىز نۇرسۇلتان ءابىش ۇلى نازاربايەۆتىڭ كورەگەن ساياساتىنىڭ ارقاسىندا، ۇلت جوسپارى «100 ناقتى قادام» باعدارلاماسى اياسىندا قارجىلىق داعدارىسقا قاراماستان ەلىمىزدە تۇرعىن ۇيلەر، مەكتەپ، بالاباقشا، اۋرۋحانالار سالىنىپ، جولدار جاڭارتىلۋدا.

سونىڭ ىشىندە جەتىسۋدىڭ كىندىك قالاسى تالدىقورعاننىڭ كەلبەتى كوز الدىمىزدا جاڭارىپ، جاقسارىپ كەلەدى.

دانا حالقىمىزدىڭ «ىرىس الدى ىنتىماق» دەگەن اتالى ءسوزى بار. حالىقتىڭ ىنتىماعى، تاتۋلىعى، بىر-بىرىنە دەگەن قۇرمەتى - ەل وركەندەۋىنىڭ كەپىلى. ەندەشە، اسەم قالامىز - باق-بەرەكە بەسىگى بولسىن دەپ تىلەيىك. ەلىمىزدىڭ بولاشاعى باياندى بولسىن! ءار شاڭىراققا جاقسىلىق، مول باقىت تىلەيمىن! - دەدى اكىم.  

مەرەكەلىك شارا قالانىڭ ۇزدىك ونەر ۇجىمدارى ازىرلەگەن گالا كونسەرتىنە ۇلاستى.

قالا كۇنىنە ورايلاستىرىلعان مەرەكەلىك شارالار كەشقۇرىم قازاقستان ەستراداسى انشىلەرىنىڭ قاتىسۋىمەن وتكەن قالا جاستارىنا ارنالعان بي كەشىمەن جانە مەرەكەلىك وتشاشۋمەن ءوز مەجەسىنە جەتتى.