ورتالىق ازيا ەلدەرى ارال تەڭىزى مەن سەمەي يادرولىق سىناق پوليگونىنىڭ ەكولوگيالىق پروبلەمالارىمەن كۇرەستە كومەك كۇتەدى. بۇگىن  بۇۇ باس اسسامبلەياسىنىڭ 70ء-شى مەرەيتويلىق سەسسياسى اياسىنداعى «پوست-2015» سامميتىندە ءسوز سويلەگەن ەلباسى نۇرسۇلتان نازاربايەۆ وسىلاي دەدى. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

«قازاقستان مىڭجىلدىقتى دامىتۋ ماقساتتارى مەن مىندەتتەرىن ورىنداۋدا جاقسى جۇمىس ىستەدى.  بۇگىنگى كۇنى اتقارىلعان جۇمىستار جايىندا ايتۋعا بولادى.  بىرىنشىدەن، ءبىز مەملەكەتتىلىك نەگىزىن نىعايتتىق، ازاماتتىق قوعام دامۋى ءۇشىن جاعداي جاسادىق. ەكىنشىدەن، ەلدىڭ ءجىو-سى 19 ەسە ءوسىپ، ءبىزدىڭ حالقىمىزدىڭ جان باسىنا شاققانداعى تابىسىمىز 13 مىڭ اقش دوللارىنا جەتتى. ۇشىنشىدەن، قازاقستاندىقتاردىڭ ءومىر ءسۇرۋ ۇزاقتىعى 71 جاستان اسىپ جىعىلادى. كەدەيشىلىك دەڭگەيى 34-تەن 4 پايىزعا،  11 ەسەگە تومەندەدى. انا مەن بالا ءولىم-جىتىمى دەڭگەيى 65 پايىزعا ازايدى. ءبىز جيتس، بەزگەك، تۋبەركۋلەز سىندى اۋرۋلارمەن كۇرەستە ايتارلىقتاي ناتيجەگە قول جەتكىزدىك»، - دەدى مەملەكەت باسشىسى.

ق ر پرەزيدەنتى  تورتىنشىدەن، قازاقستان پارنيكتى گازدار شىعارىندىلارىن قىسقارتىپ، عالامشارىمىزدىڭ بيولوگيالىق الۋانتۇرلىلىگىن ساقتاۋ ءۇشىن قامقورلىق جاساپ وتىرعاندىعىن باسا اتاپ ءوتتى.

«بىزدەر «جاسىل ەكونوميكاعا» كوشۋ تۇجىرىمداماسىن بەكىتتىك. جوعالىپ بارا جاتقان ارال تەڭىزىنىڭ پروبلەماسى تەك ءبىزدىڭ وڭىرگە عانا ەمەس، سونىمەن بىرگە بۇكىل الەمگە ءقاۋىپ توندىرۋدە. ونىڭ تارتىلۋى سالدارىنان جىل سايىن 75 ملن. تونناعا دەيىنگى شاڭ-توزاڭ مەن ۋلى تۇزدى جەل اۋەگە كوتەرۋدە. بۇگىندە ولار ەۋروپادا، ءتىپتى انتاريكتيدا دا تابىلۋدا. دۇنيەجۇزىلىك بانكتىڭ قولداۋىمەن بىزدەر ارال تەڭىزىنىڭ سولتۇستىك بولىگىن قالپىنا كەلتىرە الدىق»، - دەدى ن.نازاربايەۆ.

سونىمەن قاتار ەلباسى قازاقستان بۇۇ-مەن جانە حالىقارالىق قوعامداستىقپەن بۇرىنعى سەمەي يادرولىق پوليگونى ايماعىن قالپىنا كەلتىرۋدە بەلسەندى ىنتىماقتاسا جۇمىس ىستەپ كەلە جاتقانىن اتاپ ءوتتى.

«ورتالىق ازيا ەلدەرى ءوڭىردىڭ اتالعان ەكولوگيالىق پروبلەمالارىمەن كۇرەسۋ ءۇشىن كومەك كۇتەدى»، - دەدى ق ر پرەزيدەنتى.