قازاقستان اگراريلەرى استىق جيناۋ ءۇشىن جەڭىلدىكتى جانار جاعارماي ماتەريالدارىمەن تولىق قامتىلدى، دەدى وكق-دا وتكەن باسپا ءسوز كونفەرەنسياسىندا ق ر اۋىل شارۋاشىلىعى ۆيسە-مينيسترى ساپارحان وماروۆ.بۇل تۋرالى قامشى پورتالى http://mgov.kz/-كە سىلتەمە جاساي وتىرىپ حابارلايدى.
«بۇگىنگى تاڭدا تاۋار وندىرۋشىلەر ججم-مەن تولىق قامتىلدى. جىل باسىندا تاۋار وندىرۋشىلەرىنە كوكتەمگى جانە كۇزگى جيناۋ جۇمىستارىن جۇرگىزۋ ءۇشىن ورتاشا باعاسى ليترىنە 81 تەڭگە تۇراتىن 421 مىڭ توننا جەڭىلدىكتى جانار جاعارماي ماتەريالدارى بەرىلدى. اۋىل شارۋاشىلىعى تەحنيكاسىنىڭ ازىرلىگى 98-99 پايىز دارەجەسىندە بولىپ وتىر»، – دەدى س.وماروۆ.
سونداي-اق، ۆيسە-مينيستر اتاپ وتكەندەي، قازاقستاندا استىق ساقتايتىن قويمالار جەتەرلىك.
«بۇگىنگى تاڭدا رەسپۋبليكادا 204 نان قابىلدايتىن ليسەنزيالانعان كاسىپورىن بار، ولار 13،7 ملن توننا استىقتى ساقتاۋعا قاۋقارلى. سونداي-اق، ءاربىر اۋىل شارۋاشىلىعىن وندىرۋشىدە 12،6 ملن توننا استىق ساقتايتىن قويما بار. بۇگىندە رەسپۋبليكادا 26 ملن توننا استىق ساقتايتىن مۇمكىندىك بار»، – دەدى ول.