بۇگىن سەناتتىڭ ەكونوميكالىق ساياسات، ينۆەستيسيالىق دامۋ جانە كاسىپكەرلىك كوميتەتىنىڭ وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنداعى جەرگىلىكتى ءوزىن-وزى باسقارۋدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلاندى. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

زاڭ جوباسى ەلباسىنىڭ «100 ناقتى قادام» ۇلت جوسپارىنداعى 97-98 قادامدارىن جۇزەگە اسىرۋعا باعىتتالادى. قۇجات الداعى ۋاقىتتا پالاتانىڭ جالپى وتىرىسىنا شىعارىلاتىن بولادى. 

«ۇلت جوسپارىنا سايكەس، اۋىل اكىمدەرىنە جانە جەرگىلىكتى قاۋىمداستىقتىڭ جينالىسىنا جەرگىلىكتى ماڭىزى بار ماسەلەلەردى شەشۋ بويىنشا قوسىمشا فۋنكسيالار بەرۋ تۋرالى ايتىلعان. بۇدان بولەك، جەرگىلىكتى ءوزىن-وزى باسقارۋدىڭ بيۋدجەتىن كەزەڭ-كەزەڭىمەن ەنگىزۋ، سونداي-اق، ازاماتتاردى جەرگىلىكتى بيۋدجەتتىڭ جوباسىن قالىپتاستىرۋ مەن ونىڭ ورىندالۋىن تالقىلاۋعا قاتىستىرۋ تۋرالى تاپسىرمالار جۇزەگە اساتىن بولادى. بۇل رەتتە زاڭ جوباسىمەن ءبىرقاتار مىندەتتەر ايقىندالادى»، - دەيدى ۇلتتىق ەكونوميكا ۆيسە-مينيسترى قايىربەك وسكەنبايەۆ. 

تۇتاستاي العاندا، قۇجات تۇرعىنداردىڭ جەرگىلىكتى ماڭىزدى ماسەلەلەردى شەشۋدەگى ءرولىن ارتتىرۋعا، جەرگىلىكتى ءوزىن-وزى باسقارۋ ورگاندارىنا ناقتى قارجىلىق جانە ماتەريالدىق رەسۋرستاردى بەرۋگە، سونداي-اق جەرگىلىكتى جەردەگى ماڭىزدى ماسەلەلەردى شەشۋ ءۇشىن اكىمدەردىڭ قارجىلىق جانە ەكونوميكالىق دەربەستىگىن كەزەڭ-كەزەڭىمەن جانە رەت-رەتىمەن بەكىتۋگە باعىتتالعان. 

بۇل رەتتە زاڭ جوباسىندا جەرگىلىكتى ءوزىن-وزى باسقارۋدىڭ اۋماقتىق كەڭەسى مەن ونىڭ جۇمىس ىستەۋ ءتارتىبى ەنگىزىلەدى. اتالعان كەڭەس ءبىر نەمەسە بىرنەشە سايلاۋ وكرۋگىنىڭ شەكارالارىندا قۇرىلاتىن قالا اكىمىنىڭ حالىقپەن ءوزارا ءىس-قيمىل جاساۋ ماسەلەلەرى بويىنشا وبلىستىق ماڭىزى بار قالانىڭ، رەسپۋبليكالىق ماڭىزداعى قالا جانە استانانىڭ اكىمدىگى جانىنداعى كونسۋلتاسيالىق-كەڭەسشى ورگان بولماق.

بۇدان بولەك، تۇرعىنداردىڭ جەرگىلىكتى ماڭىزداعى ماسەلەلەردى شەشۋدەگى ءرولىن ارتتىرۋ جانە ولاردى ساپالى شەشۋى ءۇشىن جەرگىلىكتى قوعامداستىقتىڭ جينالىستارىندا تالقىلاناتىن ماسەلەلەردىڭ تىزبەسى كەڭەيتىلەدى. جەرگىلىكتى ءوزىن-وزى باسقارۋ ورگاندارىنا ناقتى قارجىلىق جانە ماتەريالدىق رەسۋرستاردى بەرۋ ماقساتىندا جەر ۋچاسكەسى اۋداندىق ماڭىزداعى قالادا، اۋىلدا، كەنتتە تىركەلگەن زاڭدى تۇلعالاردان الىناتىن جەر سالىعى، كولىك قۇرالدارى سالىعى جەرگىلىكتى ءوزىن-وزى باسقارۋ ورگاندارىنا ترانسفەرتتەر تۇرىندە تۇسەتىن تىزبە بەكىتىلەدى. سونداي-اق، زاڭ جوباسىمەن جەرگىلىكتى ءوزىن-وزى باسقارۋدىڭ قاراجاتى ەسەبىنەن الىنعان مۇلىك اۋداندىق ماڭىزداعى قالانىڭ، كەنتتىڭ، اۋىلدىڭ، اۋىلدىق وكرۋگتىڭ اكىمى اپپاراتىنىڭ بالانسىنا بەكىتىلىپ بەرىلەتىندىگى قاراستىرىلعان.