بۇگىن استاناداعى تاۋەلسىزدىك سارايىندا ءوتىپ جاتقان X Kazenergy ەۋرازيالىق فورۋمىندا ەلىمىزدىڭ ەنەرگەتيكا ءمينيسترىنىڭ ءبىرىنشى ورىنباسارى ۇزاقباي قارابالين «ەۋرازيا» جوباسىن جۇزەگە اسىرۋعا قاتىستى ماسەلەلەرگە ەرەكشە توقتالىپ، ونىڭ بولاشاعىنا قاتىستى پىكىر ءبىلدىردى. بۇل تۋرالى قامشى پورتالى  Baq.kz-كە سىلتەمە جاساي وتىرىپ حابارلايدى.

«ەۋرازيا وڭىرىندەگى ەنەرگيا قاۋىپسىزدىگى: جاڭا ىنتىماقستاستىق مەحانيزمى» تاقىرىبى اياسىنداعى كونفەرەنسيادا ءسوز العان ۇزاقباي قارابالين «ەۋرازيا» جوباسىنىڭ ەرەكشەلىگىنە توقتالىپ ءوتتى.

- بۇل جوبانىڭ باستى ەرەكشەلىگى – كاسپيي تەڭىزى ماڭىنداعى ۇڭعىمالاردى تەرەڭ زەرتتەپ، زەردەلەۋگە نەگىزدەلگەن. سوندىقتان دا بۇل جوبا تەحنولوگيالىق جانە قولدانبالى اسپەكتىلەردىڭ كەڭ سپەكترىن عىلىمي تۇرعىدا جۇزەگە اسىرۋدى قامتاماسىز ەتەدى دەپ ويلايمىن. سونىمەن قاتار، ۇڭعىمالاردى تەرەڭدەتە بۇرعىلاۋ بويىنشا دا وسى سالادا الەم بويىنشا رەكوردتتىق كورسەتكىشكە قول جەتكىزۋىمىز نەعايبىل ەمەس، - دەدى ۇزاقباي سۇيلەيمەن ۇلى.

ونىڭ ايتۋىنشا، قازاقستاننىڭ ورتا ازيا ءوڭىرىن ەنەرگەتيكالىق قاۋىپسىزدىكپەن قامتاماسىز ەتۋ مۇمكىندىگىن جوققا شىعارۋعا بولمايتىن كورىنەدى. ونىڭ ۇستىنە «ەۋرازيا» سىندى عالامات جوبانىڭ جۇزەگە اسۋىنا قىتايلىق CNPC كومپانياسىنىڭ قىزىعۋشىلىق تانىتۋى ءبىزدىڭ ەلىمىزدىڭ كەيبىر مۇمكىندىكتەرىن ودان سايىن ارتتىرا تۇسەدى.