وسىدان ءبىراز بۇرىن جازعانىمىزدا، الماتى وبلىسىنداعى ءتاتتى ءتۇبىر وسىرۋشىلەردىڭ بيىلعى ءونىمىن قابىلداپ، قايتا وڭدەۋدەن وتكىزۋگە ءتيىستى بىردەن-بىر كاسىپورىن – «كوكسۋ قانت زاۋىتى» جاۋاپكەرشىلىگى شەكتەۋلى سەرىكتەستىگى الداعى ناۋقانعا تولىق دايىن ەكەنى جونىندە ايتقان ەدىك. بۇل تۋرالى قامشى پورتالى ايقىن-اقپاراتقا سىلتەمە جاساپ حابارلايدى.
كۇنى كەشە اتالعان كاسىپورىنعا الماتى وبلىسىنىڭ تالدىقورعان ايماعىنداعى اۋدانداردا، ناقتىراق ايتقاندا، ەسكەلدى، سارقان، اقسۋ اۋداندارىندا وسىرىلگەن قانت قىزىلشاسىنىڭ العاشقى ءونىمىن تيەگەن ۇلكەن كەرۋەن كەلىپ جەتتى.
بيىل قانت قىزىلشاسىن وسىرۋشىلەر جيىن-تەرىم ناۋقانىنا ۇلكەن ءۇمىت ارتىپ وتىر. ەرتە كوكتەمنەن باستاپ، ولارعا مەملەكەت، وبلىس، اۋدان تاراپىنان بارلىق قامقورلىق پەن قولداۋ جاسالدى. تۇقىممەن، تىڭايتقىشپەن، جانار-جاعارمايمەن قامتاماسىز ەتۋدە ىركىلىس بولعان جوق. ءتاتتى ءتۇبىردىڭ ءار گەكتارىنا 60 مىڭ تەڭگەدەن دەمەۋقارجى تولەنەتىنى، الىنعان ءونىمنىڭ ءار تونناسى 13 مىڭ تەڭگەدەن قابىلداناتىنى جونىندە دە ءجيى ايتىلعان ەدى. ۋادەگە سەنگەن ديقاندار الا جازداي القاپتا ايانباستان تەر توكتى. تابان ەت، ماڭداي تەرلەرى اقتالىپ، بيىلعى كۇزدەرى بەرەكەلى بولىپ تۇر. ءدال قازىرگى كەزدە العاشقى جينالعان القاپتار مەن وتكىزىلگەن ءونىمدى ەسەپتەگەندە، ورتاشا العاندا، گەكتارىنان 350-400 سەنتنەردەن ءتاتتى ءتۇبىر جينالۋدا. سونىمەن بىرگە قانت زاۋىتىنىڭ قابىلداۋ الاڭىنا توگىلگەن قانت قىزىلشاسىنىڭ ىرىلىگى دە كوزگە بىردەن بايقالادى. ورتاشا العاندا ءار دانا ءتاتتى ءتۇبىردىڭ سالماعى 1،5 كەلىگە جۋىقتايتىن كورىنەدى. الداعى اپتالار قازىرگىدەن دە ءونىمدى بولادى دەگەن ءۇمىت زور. ءماسەلەن، 25 گەكتار جەرگە قانت قىزىلشاسىنىڭ تۇقىمىن ءسىڭىرگەن، ەرتە كوكتەمنەن قوڭىر كۇزگە دەيىن بەل جازباعان سارقان اۋدانىنداعى «اققۇدىق» شارۋا قوجالىعىنىڭ جەتەكشىسى سەرىكجان ەسىمجانوۆ العاشقى ءونىمنىڭ كولەمى مەن ساپاسىنا ساراپتاما جاساي وتىرىپ، قورىتىندىسىندا ءار گەكتاردان 650-700 سەنتنەردەن اينالۋى مۇمكىن دەپ بولجاپ وتىر.
