استاناداعى «تۇران-پروفي» حالىقارالىق كاسىپتىك اكادەمياسىندا جۇڭگو حالىق رەسپۋبليكاسىنىڭ قۇرىلعان كۇنى مەرەكەسىنە وراي سالتاناتتى جيىن ءوتتى. بۇل تۋرالى قامشى پورتالى ينفورم.كز-كە سىلتەمە جاساي وتىرىپ حابارلايدى.

اتالمىش ءىس-شارانى وتكىزۋدىڭ نەگىزگى ماقساتى وقۋ ورنىنىڭ تۇلەكتەرىنە كورشى جۇڭگو ەلىنىڭ مادەنيەتى مەن تاريحىن ۇعىندىرۋ، قازاقستان مەن جۇڭگو ەلدەرى اراسىنداعى دوستىقتى تۋ ەتكەن ءتۇرلى سالالارداعى ىقپالداستىق بايلانىستاردى ءتۇسىندىرۋ بولىپ تابىلادى، سونداي-اق جۇڭگو ءتىلىن ۇيرەنىپ، وسى ەلدە جوعارى ءبىلىم الۋعا ىنتالى جاستاردىڭ قىزىعۋشىلعىن وياتۋدى كوزدەيدى.

جيىن بارسىندا ءسوز العان «نۇر-وتان» حدپ-نىڭ سا­راپتاۋ، جوبالاۋ جانە الەۋمەتتىك ينستيتۋتتار ورتالىعىنىڭ جەتەكشىسى قازبەك قازكەنوۆ ستۋدەنتتەرگە قازاقستان مەن قىتايدىڭ قارىم-قاتىناسى ۇزدىكسىز ءوسۋ جانە نىعايۋ جولىمەن دامىپ كەلە جاتقاندىعىن، تاريحي كورشىلەردىڭ سىيلاستىعى، دوستىعى ارقاسىندا بۇگىنگى كۇنى قوس ەلدىڭ اراسىندا ورتاق ماقساتتار جولىندا تىعىز بايلانىستار ورناپ وتىرعاندىعىن، سونىمەن بىرگە ەلباسى نۇرسۇلتان نازاربايەۆتىڭ «نۇرلى جولى» مەن جۇڭگو ءتوراعاسى سي ءسزينپيننىڭ «جاڭا جىبەك جولى» باعدارلاماسىنىڭ بىر-بىرىمەن ۇندەسىپ جاتقانىن بايان ەتتى.

القالى باسقوسۋدا «تۇران-پروفي» اكادەمياسىنىڭ  رەكتورى مانەن وماروۆ جانە ءبىلىم ورداسىنىڭ بەلسەندى ستۋدەنت جاستارى جۇڭگو ەلى تۋرالى ءوز ويلارىمەن ءبولىستى. وسى وقۋ ورنىنىڭ وقىتۋشىسى، قىتايدىڭ جوعارى وقۋ ورنىنان ءبىلىم الىپ كەلگەن، جاس جۇڭگو تانۋشى مامان ءجازيرا ەربول قىزى ءوز بايانداماسىن جۇڭگو تىلىندە جاساپ جاستاردىڭ جۇڭگو ءتىلىن ۇيرەنۋگە دەگەن قىزىعۋشىلىعىن وياتتى.

ەستەرىڭىزگە سالا كەتەيىك، قىتايدىڭ باستى مەملەكەتتىك مەرەكەسى -  جۇڭگو حالىق  رەسپۋبليكاسىنىڭ  قۇرىلعان كۇنى -    قازاننىڭ 1-ىندە  تويلانادى. 1949 جىلدىڭ 1 قازانىندا تيانانمەندە ميتينگ ءوتىپ، ماو دزەدۋن جۇڭگو حالىق رەسپۋبليكاسىنىڭ قۇرىلعانىن جاريا ەتتى. سول جىلدىڭ 2 جەلتوقسانىندا جاڭا مەملەكەتتىڭ ورتالىق ۇكىمەتى وتىرىسى بولىپ، 1 قازان - مەملەكەتتىك مەرەكە كۇنى دەپ بەكىتىلدى.