ءماجىلىس ءتوراعاسى قابيبوللا جاقىپوۆتىڭ جەتەكشىلىگىمەن وتكەن پالاتانىڭ كەشەگى جالپى وتىرىسىندا جيىرمادان استام زاڭ جوباسى قارالدى. بۇل جولى دەپۋتاتتار نازارىنا اقپاراتقا قول جەتكىزۋ، ورگانيكالىق ءونىم ءوندىرۋ، ەڭبەك قاتىناستارى، مەملەكەتتىك ساتىپ الۋ جانە وزگە دە ماسەلەلەر ۇسىنىلىپ، جان-جاقتى تالقىدان ءوتتى. بۇل تۋرالى "قامشى" پورتالى http://egemen.kz/-كە سىلتەمە جاساي وتىرىپ حابارلايدى.

«اقپاراتقا قول جەتكىزۋ تۋرالى» زاڭ جوباسى ىلەسپە تۇزەتۋلەرىمەن ەكى وقىلىمدا قارالىپ، ماقۇلداندى. زاڭ جوباسىنىڭ جاڭاشىلدىعى سول، وندا بارلىق مۇددەلى ادامدارعا «ەلەكتروندى ۇكىمەتتىڭ ۆەب-پورتالىنا ورنالاستىرىلاتىن مەملەكەتتىك ورگانداردىڭ نورماتيۆتىك-قۇقىقتىق اكتىلەرى تۇجىرىمدامالارىنىڭ جانە ماتىندەرىنىڭ جوبالارىمەن تانىسۋعا جانە ونى تالقىلاۋعا قاتىسۋعا مۇمكىندىك بەرىلەدى. سونىمەن قاتار، بيۋدجەتتىك ەسەپتىلىك پەن مەملەكەتتىك اۋديت جانە قارجىلىق باقىلاۋ ناتيجەلەرى، مەملەكەتتىك ورگاندار قىزمەتىن باعالاۋ تۋرالى اقپارات، ستراتەگيالىق جوسپارلاردىڭ جانە اۋماقتاردى دامىتۋ باعدارلامالارىنىڭ ماقساتتى ينديكاتورلارىنا قول جەتكىزۋ تۋرالى ەسەپ تە اتالعان ۆەب-پورتالدان كورىنىس تاباتىن بولادى. بۇل رەتتە، مەملەكەتتىك ورگانداردىڭ قىزمەتىن جاريا تالقىلاۋ، سونداي-اق، اقپارات يەلەنۋشىلەردىڭ ۇدايى نەگىزدە اشىق دەرەكتەردى ينتەرنەت-پورتالدا ورنالاستىرۋ مىندەتى كوزدەلىپ وتىرعاندىعىن دا ايتا كەتۋ كەرەك. جانە دە جازباشا سۇراۋ سالۋلاردى قاراۋدىڭ بارىنشا ۇزاق مەرزىمى 15 كۇن، ال ول تۋرالى اقپاراتتى سۇراتاتىن ادامدى مىندەتتى تۇردە حاباردار ەتۋ جانە دە كۇردەلى سۇراۋ سالۋلار ءۇشىن 30 كۇن بەلگىلەنىپ وتىر.

بۇدان كەيىن ءبىرىنشى وقىلىمدا قارالعان جاڭا ەڭبەك كودەكسىنىڭ جوباسى قولداۋ تاپتى. كودەكس جوباسىندا مەملەكەتتىڭ جۇمىسكەرلەرگە بەرىلەتىن كەپىلدەمە مەن وتەماقىنىڭ ەڭ تومەنگى دەڭگەيدەگى ەڭبەك ستاندارتتارىن انىقتاپ، جۇمىس بەرۋشىنىڭ بۇل مىندەتتەمەلەردى ورىنداۋىن قاتاڭ باقىلايتىنى كوزدەلگەن. جانە دە كاسىپوداقتاردىڭ ءرولى دە كەڭەيتىلىپ وتىر ەكەن. جۇمىس بەرۋشىنىڭ قىزمەتكەرلەر سانىن قىسقارتۋدىڭ ورنىنا تولىق ەمەس جۇمىس ۋاقىتى رەجىمىن ەنگىزۋ جانە قىزمەتكەرلەردى ۋاقىتشا وزگە جۇمىسقا اۋىستىرۋ سياقتى ءتيىمدى تەتىكتەردى قولدانۋى دا كورىنىس تاپقان. سونداي-اق، جۇمىس بەرۋشىنىڭ قىزمەتكەردىڭ دەنساۋلىعىنا زيان تيگىزبەيتىن كەز كەلگەن بوس ورىنعا اۋىستىرۋ قۇقىعى دا قارالعان. اتقارىلاتىن جۇمىس، كورسەتىلەتىن قىزمەت كولەمىنىڭ ازايۋى سالدارىنان ۇيىم جاعدايىنىڭ ناشارلاۋىنا بايلانىستى جۇمىس بەرۋشىنىڭ ەڭبەك شارتتارىن بۇزۋ نەگىزدەمەسى دە ەنگىزىلىپتى. بۇل جاعدايدا قىزمەتكەر 1 اي بۇرىن حابارلاندىرىلادى جانە قىسقارتۋ جاعدايىندا ءبىر ايلىق ورتاشا ەڭبەكاقى كولەمىندە وتەماقى الادى.

بۇدان باسقا، جۇمىس بەرۋشىلەر مەن قىزمەتكەرلەر وكىلدەرىنە تۇنگى ۋاقىتتاعى، دەمالىس جانە مەيرام كۇندەرىندەگى، سونىمەن قاتار، شامادان تىس جۇمىس ىستەگەنى ءۇشىن تولەماقى مولشەرىن ەڭبەك جانە ۇجىمدىق شارتتار ارقىلى رەتتەۋ ۇسىنىلادى. شامادان تىس جۇمىس ىستەگەنى ءۇشىن تولەنەتىن تولەماقى نەگىزگى مولشەرلەمە كولەمىنىڭ ءبىر جارىم ەسەسىنەن كەم بولماۋى شارت. قوعامدىق باقىلاۋ سالاسىن كۇشەيتۋ دە نازاردان تىس قالماعان. كاسىپوداق ۇسىناتىن قىزمەتكەرلەر اراسىنان تەحنيكالىق ينسپەكتورلار ينستيتۋتىن قۇرىپ، ولاردىڭ ەڭبەك قاۋىپسىزدىگى مەن ونى قورعاۋ بويىنشا تەپە-تەڭدىك نەگىزىندە قۇرىلاتىن وندىرىستىك كەڭەستەر اياسىندا قۇزىرەتتىلىگىن قاراستىرۋ ۇسىنىلعان. وندىرىستىك كەڭەستى تەپە-تەڭ شارتتار نەگىزىندە قىزمەتكەرلەر وكىلدەرى مەن جۇمىس بەرۋشى 2 جىل مەزگىلدىك روتاسيا نەگىزىندە باسقاراتىن بولادى. جۇمىس بەرۋشى ءۇشىن وندىرىستىك كەڭەستىڭ شەشىمى مىندەتتى. ءوز كەزەگىندە، مۇگەدەكتەردى شامادان تىس جۇمىستارعا پايدالانۋعا تىيىم سالۋدى ساقتاۋ دا قاراس­تى­رىلعان. جۇمىس ۋاقىتى مەن قىسقارتىلعان جۇمىس ۋاقىتىنىڭ جالپى ەسەبى (اپتاسىنا 36 ساعاتتان كەم ەمەس) وزگەرىسسىز قالاتىنى دا قاراستىرىلىپتى.

سونداي-اق، دەپۋتاتتار «قازاق­ستان رەسپۋبليكاسىنىڭ كەيبىر زاڭ­نامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىس­تەر مەن تولىقتىرۋلار ەنگىزۋ تۋرالى» زاڭ جوباسىن دا ءبىرىن­شە وقىلىمدا قاراپ، ماقۇلدادى. زاڭ جوباسى بويىنشا بايانداما جاساعان دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ەتنوستىق قازاقتاردىڭ تاريحي وتانىنا ورالۋىن ىنتالاندىرۋ ماقساتىندا زاڭ جوباسىمەن ولاردىڭ قونىستانۋ وڭىرىنە قاراماستان ورالمان مارتەبەسىن الۋ، شەتەلدىك ازاماتتارعا قاراعاندا تولەم قابىلەتىن راستاۋ­سىز ۋاقىتشا تۇرۋ ىقتيارحاتىن الۋ مۇمكىندىگى بەرىلەتىندىگىن ەرەكشە اتادى. ءمينيستردىڭ سوزىنە قاراعاندا، ۇكىمەت بەلگىلەگەن وڭىرلەرگە قونىستانعان جاعدايدا ورالماندارعا جاعدايلار جاسالادى. اتاپ ايتقاندا، جۇمىسپەن قامتۋ بويىنشا شارالار شەڭبەرىندەگى ەتنوستىق قازاقتار ءۇشىن كولىك شىعىندارىن وتەيتىن، قىزمەتتىك باسپانا نەمەسە جاتاق­حانادان بولمە بەرۋدى قۇرايتىن الەۋمەتتىك پاكەتتەر قاراستىرىلاتىن بولادى. ۇكىمەت بەلگىلەگەندەي، ەلىمىزدىڭ ءبىر وڭىرىنەن ەكىنشىسىنە قونىستانعان ورالماندار ءۇشىن دە ءدال جوعارىداعىداي الەۋمەتتىك توپتامالار قاراستىرىلعان. قونىستانعان ادام بەس جىل مەرزىمنەن بۇرىن ءوز بەتىنشە كوشىپ-قونىپ نەمەسە قونىس اۋدارسا، مەملەكەتتىك قولداۋلاردى قايتاراتىنى دا بەلگىلەنىپتى. ورالماندارعا قازاقستان رەسپۋبليكاسىنىڭ ازاماتتىعىن بەرۋ مەرزىمىن تۇراقتى تۇرۋ ىقتيارحاتىن العاننان كەيىن ءبىر جىل ىشىندە شەشۋ كوزدەلەدى.

زاڭ جوباسىنا سيپاتتاما بەرە كەتكەن ءماجىلىس ءتوراعاسى قارالىپ وتىرعان زاڭ جوباسىنىڭ وتە كۇردەلى ءارى قاجەتتى قۇجات ەكەندىگىن، زاڭ جوباسىندا كوپتەگەن ماسەلەلەردىڭ وڭ شەشىمىن تاپقانىن، ونىڭ مەملەكەتىمىز ءۇشىن، حالقىمىز ءۇشىن، ورالمان اعايىندار ءۇشىن اسا ماڭىزدى ەكەنىن اتاپ ءوتتى.

كۇن تارتىبىنە سايكەس قالعان ماسەلەلەر دە جان-جاقتى قارالىپ، ءتيىستى شەشىمدەر قابىلداندى.