مەملەكەت باسشىسى نۇرسۇلتان نازاربايەۆ اتىراۋدا اقتوبە، باتىس قازاقستان، اتىراۋ جانە ماڭعىستاۋ وبلىستارىنىڭ اكىمدەرىمەن جانە مۇنايلى ولكەدەگى ءىرى ءوندىرىس باسشىلارىمەن كەزدەسىپ، كەڭەيتىلگەن كەڭەس وتكىزدى.
جيىن بارىسىندا نۇرسۇلتان نازاربايەۆ ەلدى يندۋستريالاندىرۋدىڭ جانە
«نۇرلى جول» جوباسىن جۇزەگە اسىرۋدىڭ جايىنا توقتالدى. بۇل تۋرالى اقوردانىڭ باسپا ءسوز قىزمەتى حابارلادى.
— جۇڭگو حالىق رەسپۋبليكاسىنا ساپار بارىسىندا ءبىز جۇڭگو تاراپىمەن سوماسى 23 ميلليارد دوللار بولاتىن كەلىسىمشارت جاساستىق، ونداعان نىساندى ىسكە قوسۋ جوسپارلانىپ وتىر. بىرلەسكەن كاسىپورىندار ءارتۇرلى شارتتار نەگىزىندە قۇرىلاتىن بولادى، — دەدى نۇرسۇلتان نازاربايەۆ. سونىمەن قاتار، مەملەكەت باسشىسى «نۇرلى جول» باعدارلاماسى قازاقستان ءۇشىن ءتيىمدى ترانسقۇرلىقتىق لوگيستيكالىق جوبا بولىپ سانالاتىن «جىبەك جولى» ەكونوميكالىق بەلدەۋىن قۇرۋ باستاماسىمەن ساباقتاساتىنىن ايتتى.
— بۇل باعىتتا ءقازىردىڭ وزىندە از جۇمىس ىستەلگەن جوق. بۇگىندە قىتايداعى ليانيۋنگان پورتىنداعى ءبىزدىڭ تەرمينالمەن اتم (ازيا-تىنىق مۇحيت) ەلدەرىنەن قازاقستان ارقىلى ەۋروپاعا 250 مىڭ كونتەينەر جىبەرىلىپ جاتىر. 2020 جىلعا قاراي ول ەكى ەسەلەنەدى. بۇل پويىزداردىڭ ءجۇرىپ وتەتىن جولىندا بيزنەس-قۇرىلىمدار پايدا بولادى. سونىمەن قاتار باتىس ەۋروپا — باتىس جۇڭگو جولىنىڭ قۇرىلىسى اياقتالۋعا تاياپ قالدى. بۇل جوبا دا زور مۇمكىندىكتەرگە يە. «نۇرلى جول» باعدارلاماسى اياسىندا باتىس وڭىردە سوماسى 345 ميلليارد تەڭگە بولاتىن جوبالار جۇزەگە اسىرىلادى. ءبىرىنشى رەت ءبىزدىڭ ەلدە كەمەلەر مەن پارومدار قۇراستىراتىن كومبينات سالىنۋدا. رەسەيگە شىعاتىن اقتوبە — اتىراۋ، اتىراۋ — استراحان، ورال — كامەنكا اۆتوموبيل جولدارى سالىنىپ جاتىر. بۇل جوبالاردىڭ بارلىعى ەكونوميكامىزعا سەرپىن بەرىپ، جاڭا جۇمىس ورىندارىن اشۋعا سەپتىگىن تيگىزەتىن بولادى، — دەدى مەملەكەت باسشىسى.
كەڭەستە ەلباسى قازاقستانداعى ونەركاسىپتىك ونىمدەردىڭ جارتىسى ەلدىڭ باتىس وڭىرىندەگى ءتورت وبلىستا وندىرىلەتىنىن اتاپ ءوتتى.
— بۇل وبلىستاردىڭ دامۋىنىڭ بۇكىل ەكونوميكامىز ءۇشىن ماڭىزى زور. جەر اۋماعىنىڭ ۇلكەندىگىنە بايلانىستى ەلدىڭ ءار ءوڭىرىنىڭ وزىندىك ەرەكشەلىگى بار. باتىس مۇناي وندىرۋگە جانە وڭدەۋگە ماماندانعان. سوعان بايلانىستى ءبىز ناق وسى سالانىڭ دامۋىنا مول ينۆەستيسيا سالىپ جاتىرمىز، — دەدى ەلباسى.
بۇل ورايدا نۇرسۇلتان نازاربايەۆ وڭىردە ينفراقۇرىلىمدىق قۇرىلىس اۋقىمىن كەڭەيتۋ قاجەتتىگىن ايتتى.
مەملەكەت باسشىسى ءتورت وبلىستىڭ اكىمىنە مۇناي-گاز سالاسىنىڭ اينالاسىندا شاعىن جانە ورتا بيزنەستى دامىتۋدى تاپسىردى.
— اتىراۋ وبلىسىندا شاعىن جانە ورتا بيزنەس ۇلەسى 8 پايىزعا، ماڭعىستاۋ جانە اقتوبە وبلىستارىندا 17 پايىزعا تەڭ. ءبىراق مۇنايلى وڭىردە شىعارىلاتىن ءونىم كولەمىن كەڭەيتۋگە ىقپال جاساۋ كەرەك. سونىڭ ارقاسىندا جاڭا جۇمىس ورىندارى اشىلادى، — دەدى مەملەكەت باسشىسى.
ەلباسى ءوندىرۋشى كاسىپورىنداردىڭ قاجەتتىلىكتەرىن قامتاماسىز ەتۋ ءۇشىن يندۋستريالىق ايماق قۇرۋ ماسەلەسىن قوزعادى.
— مىسال رەتىندە شيەۆرون كومپانياسىن ايتۋعا بولادى، ونىڭ جۇمىسىن ارماتۋرا جانە قۇبىر شىعاراتىن زاۋىتتار قامتاماسىز ەتەدى، سايكەسىنشە ءوڭىردىڭ الەۋمەتتىك دامۋىنا قاجەتتى قاراجات تۇسۋدە، — دەدى ن.نازاربايەۆ.
ەلباسى سونداي-اق يندۋستريالاندىرۋ جانە ينفراقۇرىلىمدار قۇرىلىسى جونىندەگى جوسپارلاردى جاڭا ەكونوميكالىق جاعدايدى ەسكەرە وتىرىپ قايتا قاراۋدى تاپسىردى.
جيىندا ءسوز العان ءبىزدىڭ وبلىستىڭ اكىمى بەردىبەك ساپاربايەۆ اتقارىلاتىن جۇمىس جوسپارلارى تۋرالى ايتا كەلە، ۇكىمەتكە ءوتىنىشىن ءبىلدىردى.
— ءبىر ءوتىنىشىم بار. اقتوبە مەن اتىراۋدىڭ اراسىنداعى سالىنىپ جاتقان جول ەرتەڭ رەسەي شەكاراسىنا شىعادى. اسەت ورەنتايۇلىنا، ءوتىنىش. بارلىق قۇجات دايىن. قىركۇيەكتە تەندەر وتكىزىلەدى. سول تەز ءوتىپ، سول جۇمىس بيىل باستالسا ەكەن، — دەدى بەردىبەك ساپاربايەۆ.
مەملەكەت باسشىسى نۇرسۇلتان نازاربايەۆ اقتوبە وبلىسىنىڭ اكىمى بەردىبەك ساپاربايەۆپەن كەزدەستى.
كەزدەسۋ بارىسىندا نۇرسۇلتان نازاربايەۆ رەسۋرستاردىڭ باعاسى تومەن بولعان جاعدايدا ايتارلىقتاي جوعارى قوسىمشا قۇندى قامتاماسىز ەتە الاتىن مۇناي حيمياسى سالاسىن دامىتۋعا ايرىقشا كوڭىل ءبولۋدى تاپسىردى. سونداي-اق، جاڭا جۇمىس ورىندارىنىڭ اشىلۋىنا سەبەپ بولاتىن ءبىرقاتار يندۋستريالىق جوبالاردى دامىتۋ پەرسپەكتيۆالارى دا تالقىلاندى.

ينتەرنەت ماتەريالدارى بويىنشا ازىرلەندى

قامشى سىلتەيدى

دەرەككوز: qazaquni.kz