وتشاشۋلار كەز كەلگەن مەرەكەنىڭ ءسانىن قىزدىرارى ءسوزسىز. الايدا ونىڭ دا قولدانۋ ەرەجەلەرى بار جانە ونى كەلە جاتقان مەرەكەدە ەسكەرگەن ءجون. مەديسينا قىزمەتكەرلەرىنىڭ ۇسىنعان دەرەگىنە سۇيەنسەك، جىلدا جاڭا جىل تۇنىندە 20-30-عا جۋىق ادام ءدال سول پيروتەحنيكانى قولدانۋ كەزىندە جاراقات الىپ، اۋرۋحاناعا تۇسەدى، دەپ حابارلايدى Almaty.tv ءتىلشىسى.

بالاسىنىڭ امانداعىن تىلەگەن اتا-انالار وتشاشۋلاردىڭ ساتىلىمىن ەرەكشە باقىلاۋعا الۋ كەرەگىن ايتادى. سەبەبى پيروتەحنيكا ساۋداسىمەن اينالىساتىندار بالالاردىڭ جاسىنا دا ءمان بەرمەي، سۇراعانىن قولىنا ۇستاتا سالادى دەيدى.

«پيروتەحنيكا تۇرماق ۇيدەگى تۇرمىستىق تەحنيكا زاتتارىنىڭ قاۋىپسىزدىگىنە كۇمان كەلتىرەتىن بولىپ جاتىرمىز عوي. پيروتەحنيكانىڭ كەسىرىنەن قانشا ادام كۇيىك شالۋ بولىمشەسىنە ءتۇسىپ جاتادى. سوندىقتان دا قارسىمىز وعان»، – دەدى اتا-انا گۇلدەراي اۋەزبەك.

داۋرىققان اتا-انالاردىڭ ءسوزىن مەديسينا قىزمەتكەرلەرى دە جوققا شىعارمادى. ولاردىڭ ايتۋىنشا، مەرەكە كەزىندە دەنەسىن كۇيىك شالعان ناۋقاس سانى ارتادى.

«ولار قولىندا قالاي جارىلىپ كەتكەنىن تۇسىنبەي قالادى. بىر-بىرىمەن ويناپ، كيىمىنىڭ استىنا لاقتىرىپ جاتادى. پيروتەحنيكادان تۇسكەن جاراقاتالعاندار سانى جىلدان-جىلعا كوبەيىپ جاتىر. الاتاۋ، جەتىسۋ اۋدانىندا كوپ»، – دەدى بالالار شۇعىل مەديسينالىق كومەك كورسەتۋ ورتالىعى كۇيىك بولىمشەسىنىڭ مەڭگەرۋشىسى

ال توتەنشە جاعدايلار دەپارتامەنتىنىڭ ماماندارىنىڭ ايتۋىنشا، پيروتەحنيكا قاۋپىنەن ساقتانۋ ءۇشىن قاۋىپسىزدىك ەرەجەسىنەن بولەك، ساتىپ الۋ كەزىندە تاۋاردىڭ ساپاسىنا نازار اۋدارعان ابزال. سەبەبى جايما بازارلاردا، اسىرەسە مەرەكە قارساڭىندا، مەرزىمى مەن نورماسى ەرەجەگە ساي كەلمەيتىن وتشاشۋلار سانى كۇرت ارتاتىن كورىنەدى.

«وتكەن جىلدىڭ جاڭا جىلدىق مەرەكەلەرىندە پيروتەحنيكالىق بۇيىمدارمەن ابايسىزدا جۇمىس ىستەۋدىڭ ناتيجەسىندە مەديسينا مەكەمەسىنە 39 ادام، ونىڭ ىشىندە 29 بالا كومەككە جۇگىندى. 8 ادام اۋرۋحاناعا جاتقىزىلدى، ولاردىڭ اراسىندا 7 بالا بار»، – دەدى اۋەزوۆ اۋداندىق تجب اعا ينجەنەرى يسلامبەك بايگەلوۆ

توتەنشە جاعدايلار مينيسترلىگىنىڭ مالىمەتىنشە، پيروتەحنيكالىق زاتتاردى دۇرىس قولدانباۋ سالدارىنان، 31 جەلتوقسان مەن 5 قاڭتار ارالىعىندا، ەلىمىزدىڭ ءىرى قالالارىندا ورتا ەسەپپەن العاندا ءۇش ءورت وقيعاسى تىركەلگەن. سونداي-اق ءاربىر وبلىس ورتالىعىندا ستاتيستيكا بويىنشا، 3-5 ادام ءتۇرلى كۇيىك جاراقاتىن الادى. توتەنشەلىكتەردىڭ ايتۋىنشا، قىس مەزگىلىندەگى ءورتتىڭ 20 پايىزى پيروتەحنيكالىق زاتتاردى پايدالانۋ كەزىندە تۇتانىپ جاتادى. ال وعان تاۋاردىڭ ءتيىستى نورماعا سايكەس كەلمەۋى، ەرەجەنىڭ ساقتالماۋى سىندى دەرەكتەر سەبەپ بولادى. سوندىقتان قۇتقارۋشىلار وتشاشۋدى ساتىپ الاردا ساتۋشىدان انىقتاما تالاپ ەتىپ، مۇقيات بولۋعا شاقىرادى.