قازاقستاندا ورىس ءتىلىن قولداۋ جانە ناسيحاتتاۋ جونىندەگى حالىقارالىق ۇيىم قۇرىلادى. جارلىق جوباسى «اشىق نقا» پورتالىندا جاريالانعان. قۇجاتتى قازاقستان رەسپۋبليكاسى عىلىم جانە جوعارى ءبىلىم مينيسترلىگى ازىرلەگەن.
«ورىس ءتىلى جونىندەگى حالىقارالىق ۇيىم قۇرۋ تۋرالى شارتقا قول قويۋ تۋرالى» قازاقستان رەسپۋبليكاسىنىڭ پرەزيدەنتى جارلىعى جوباسى اشىق تالقىلاۋدا ءبىر كۇن بولادى، دەپ جازادى kursiv.media.
جارلىق جوباسىندا جاڭا حالىقارالىق ۇيىم قۇرۋ تۋرالى شارت جوباسى بار. بۇل قۇجاتقا قول قويۋ تمد ەلدەرى مەملەكەت باسشىلارى كەڭەسىنىڭ 2022 جىلعى 14 قازانداعى شەشىمىن جۇزەگە اسىرۋدى بىلدىرەدى.
سول كۇنى قاسىم-جومارت توقايەۆ تمد جانىنان ورىس ءتىلىن قولداۋ جانە ناسيحاتتاۋ جونىندەگى ۇيىم قۇرۋدى ۇسىندى. تمد ەلدەرىنىڭ، سونىڭ ىشىندە رەسەي پرەزيدەنتتەرى ونىڭ باستاماسىن قولداپ، مەملەكەتتىك ورگاندارعا ۇيىمنىڭ قىزمەتىن رەتتەيتىن قۇجاتتاردى ازىرلەۋدى تاپسىردى.
جارلىق جوباسىندا ۇيىمنىڭ ماقساتى مەملەكەتارالىق قاتىناس ءتىلى جانە قارىم-قاتىناس قۇرالى رەتىندە ورىس ءتىلىن قولداۋ جانە ناسيحاتتاۋ ماسەلەلەرى بويىنشا ىنتىماقتاستىقتى نىعايتۋ ەكەنى جازىلعان.
جوبا راتيفيكاسيادان وتكەن سوڭ، ونى جۇزەگە اسىرۋعا مەملەكەت قازىناسىنان قارجى بولىنەدى.
2023 جىل تمد ەلدەرىندە 2023 جىل ورىس ءتىلى جىلى بولىپ جاريالاندى.
تمد اتقارۋ كوميتەتىنىڭ مالىمەتىنشە، بۇل تىلدە دۇنيە جۇزىندە 250 ميلليون ادام سويلەيدى. ورىس ءتىلى – بۇۇ-نىڭ التى رەسمي ءتىلىنىڭ ءبىرى.
پىكىر قالدىرۋ