رۋزا اپاي پسيحياتريالىق ديسپانسەرگە جاتقىزىلعاندا، ونىڭ سەبەبىن دولبارلاپ، كەيبىر ينتەرنەت باسىلىمدار بولجام جاريالادى. سونىڭ بىرىندە بۇعان وبلىس اكىمى اسايىن بايحانوۆتىڭ قاتىسى بار كورىنەدى دەلىنگەن. Qamshy.kz سايتىنىڭ رەداكسياسى كەشە كەشكىسىن ءوڭىر باسشىسىنا ساۋال جولدادى.

كوپ ۇزاماي تاڭەرتەڭ اسايىن بايحانوۆتان مىنانداي سيپاتتا جاۋاپ كەلىپ جەتتى:

«قايىرلى كۇن. بۇعان مەنىڭ ەش قاتىسىم جوق. مەن رۋزا بەيسەنبايتەگىنىڭ پاۆلودار وبلىستىق پسيحيكالىق دەنساۋلىق ورتالىعىنا جاتقىزىلۋى تۋرالى اقپاراتتى الەۋمەتتىك جەلىلەردەن بىلىپ-كوردىم. كەيىنىرەك پوليسيا دەپارتامەنتىنىڭ حابارلاماسىنا سايكەس، 102 ءنومىرى بويىنشا پوليسيانى جەكە كەڭسە عيماراتىنا شاقىرتۋ فاكتىسى بەلگىلى بولدى، سودان كەيىن جەدەل جاردەم بريگاداسى دا سول جەرگە شاقىرىلعان. اتالعان شاقىرۋلار بويىنشا قىزمەتتەردىڭ شىعۋى ناتيجەسىندە وقيعاعا قاتىسۋشىلاردىڭ ءبىرىن اۋرۋحاناعا جاتقىزۋ تۋرالى شەشىم قابىلداندى. ق ر دەنساۋلىق ساقتاۋ جانە دەنساۋلىق ساقتاۋ جۇيەسى تۋرالى كودەكسىنىڭ 273-بابىنا سايكەس وزگە دەرەكتەر جاريا ەتىلمەيدى. سوڭعى مالىمەت بويىنشا، بۇگىن دارىگەرلەر كونسيليۋم وتكىزەدى، اپايدىڭ دەنساۋلىعى دۇرىس بولعان جاعدايدا، ارينە ول كىسى ۇيىنە جىبەرىلەدى دەگەن ۇمىتتەمىز».

ال تۇسكە قاراي رۋزا بەيسەنبايتەگىنىڭ بوساپ شىققانى بەلگىلى بولدى. الايدا ول كىسى پسيحولوگيالىق ورتالىقتىڭ ەسەبىنە الىنعان.

"وقيعا ورنىنا كەلگەن مەديسينالىق بريگادا پسيحيكالىق اۋىتقۋلارى بەلگىلەرىمەن ر.ب. ەسىمدى 66 جاستاعى ايەل ادامدى پاۆلودار وبلىستىق پسيحيكالىق دەنساۋلىق ساقتاۋ ورتالىعىنا جەتكىزدى. ورتالىق دارىگەرلەرى تاراپىنان ناۋقاسقا ەكى كۇن بويى ەم قابىلداۋ شارالارى جاسالدى. مەديسينا قىزمەتكەرلەرىنىڭ قاراۋىنان كەيىن دەنساۋلىق جاعدايىنىڭ جاقسارۋىنا وراي، كونسيليۋم شەشىمىمەن ناۋقاس ديسپانسەرلىك باقىلاۋ ۇسىنىسىمەن ۇيىنە قايتارىلدى. دەنساۋلىق ساقتاۋ سالاسىنداعى زاڭناماعا سايكەس، الداعى ۋاقىتتا ناۋقاستىڭ پسيحيكالىق اۋىتقۋلارى ناشارلاپ، اينالاسىنداعى ادامدارعا زيان كەلتىرۋ ىقتيمالدىعى قايتا بايقالعان جاعدايدا، ول ەمدەۋگە جىبەرىلەتىن بولادى"، – دەپ حابارلادى وبلىستىق دسب.