ەڭبەك جانە الەۋمەتتىك قورعاۋ مينيسترلىگىنىڭ مالىمەتىنشە، 2024 جىلى قاڭتار ايىندا ەلەكتروندىق ەڭبەك بيرجاسىندا جۇمىس بەرۋشىلەر 97،3 مىڭ بوس جۇمىس ورنىن ۇسىنسا، ال جۇمىس ىزدەۋشىلەر 191،1 مىڭ تۇيىندەمە ورنالاستىردى.

وتكەن جىلدىڭ جەلتوقسان ايىمەن سالىستىرعاندا بوس ورىندار سانى 22،3 مىڭعا (-19%) ازايىپ، ال تۇيىندەمە سانى 132 مىڭعا (+223%) وسكەن.

«قاڭتار ايىندا ەڭ كوپ بوس جۇمىس ورىندارى «ءبىلىم جانە تاربيە» (17،5 مىڭ بوس جۇمىس ورنى) جانە «مەديسينا جانە فارماسيەۆتيكا» (8،5 مىڭ) كاسىپتىك سالالارىندا ورنالاستىرىلدى. ءوز كەزەگىندە جۇمىس ىزەۋشىلەر اراسىندا «ءبىلىم جانە تاربيە» (17،3 مىڭ تۇيىندەمە) جانە «تكش جانە اباتتاندىرۋ» (8،2 مىڭ تۇيىندەمە) كاسىپتىك سالالارىنىڭ قىزمەتكەرلەرى تاراپىنان بەلسەندىلىك بايقالدى»، دەيدى كاميللا ماناكوۆا.

جالاقىنىڭ ەڭ جوعارى مولشەرىن كوبىنە ءوز تۇيىندەمەلەرىندە «ۇلكەن دەرەكتەرمەن جۇمىس جونىندەگى مامان» (ورتا ەسەپپەن 1،3 ملن تەڭگەدەن باستاپ)، «بيزنەس-پروسەستەردى وڭتايلاندىرۋ جونىندەگى باسشى» (1،2 ملن تەڭگەدەن باستاپ)، سونداي-اق «وندىرىستىك وپەراسيالار جونىندەگى ينجەنەر» (1،2 ملن تەڭگەدەن باستاپ) ماماندىقتارى بويىنشا جۇمىس ىزدەۋشىلەر كورسەتكەن.

ەڭ كوپ جالاقىنى جۇمىس بەرۋشىلەر وندىرىستەگى بازا باستىقتارىنا (900 مىڭ تەڭگەدەن باستاپ)، جوبالاۋشى ينجەنەرلەرگە (800 مىڭ تەڭگەدەن باستاپ) جانە باس قۇرىلىسشىلارعا (790 مىڭ تەڭگەدەن باستاپ) ۇسىندى.