استانا. 9 قازان. بۇگىن قازاق حاندىعىنىڭ 550 جىلدىعى شەڭبەرىندە تارازداعى «تاراز ارەنا» سپورت كەشەنىندە قازاق كۇرەسىنەن ءىىى حالىقارالىق «ەۋرازيا بارىسى» ءتۋرنيرى ءوتتى. سەگىز مەملەكەتتىڭ بالۋاندارى سىنعا تۇسكەن ءدۇبىرلى دودادا قازاقستان قۇراماسى توپ جارىپ، جارىستىڭ ەكى دۇركىن جەڭىمپازى اتاندى. ءبىزدىڭ جىگىتتەر فينالدا وزبەكستان قۇراماسىنان 5:2 ەسەبىمەن باسىم ءتۇستى. بۇل تۋرالى egemen.kz حابارلادى.
جەرەبە بويىنشا العاش بولىپ كىلەمگە گرۋزيا مەن موڭعوليا قۇرامالارى كوتەرىلدى. وتكەن جىلعى سايىستىڭ باس جۇلدەسىن ەنشىلەگەن موڭعول بالۋاندارىنان بيىل دا جوعارى ناتيجە كۇتكەندەر از بولعان جوق. تارتىستى وتكەن بەلدەسۋلەردە قوس قۇراما ءبىرىن ءبىرى كەزەكتەسىپ جەڭىپ وتىردى. ناتيجەسىندە كەزدەسۋ تاعدىرى اسا اۋىر سالماقتا (+100 كگ) سىنعا تۇسكەن بالۋانداردىڭ بەلدەسۋىندە شەشىلدى. بۇل سىندا بەكا بەردزەنەشۆيلي قارسىلاسى داۆاانيام التانگەرەلدەن باسىم ءتۇسىپ، گرۋزيا قۇراماسى 4:3 ەسەبىمەن جەڭىسكە جەتتى.
ال ءبىرىنشى اينالىمدا پولشامەن كەزدەسكەن قازاقستان قۇراماسى 5:2 ەسەبىمەن جەڭىسكە جەتتى. جەرلەستەرىمىزدەن مارات نيگماتوللايەۆ (55 كگ)، باعداۋلەت ءسابيتوۆ (66 كگ)، ماقسات مازىبايەۆ (82 كگ)، نۇرىم سالىمگەرەيەۆ جانە بەيبىت ىستىبايەۆ قارسىلاستارىنان ايلاسىن اسىرسا، رينات ماحمۇتوۆ (74 كگ) پەن بەكزات احمەتبەكوۆ (90 كگ) جەڭىلىسكە ۇشىرادى.
ودان بولەك، سايىستىڭ وسى ساتىسىندا وزبەكستان قىرعىزستاننان – 5:2، ال رەسەي تۇركيادان 5:1 ەسەبىمەن باسىم ءتۇستى.
جارتىلاي فينالدا گرۋزيا وزبەكستان قۇراماسىمەن كۇش سىناستى. قاپ تاۋىنىڭ ەتەگىنەن كەلگەن بالۋاندار بىلتىر قولا جۇلدەگە قول جەتكىزگەنى ەسىمىزدە. دەگەنمەن، بيىل وزبەك بالۋاندارىنىڭ تىڭعىلىقتى دايىندىقپەن كەلگەنى انىق بايقالدى. ءار بەلدەسۋدە ساۋاتتى ءادىس جاساعان ولار گرۋزيندەردى 5:2 ەسەبىمەن تىزە بۇكتىرىپ، فينالعا شىقتى.
ال ەكىنشى جارتىلاي فينالدىق جۇپتى قۇراعان قازاقستان مەن رەسەي قۇرامالارى اراسىنداعى ايقاس ءبىزدىڭ پايدامىزعا 6:1 ەسەبىمەن اياقتالدى. بۇل كەزدەسۋدە كوماندامىز ەكىنشى قۇراممەن شىقتى. جاتتىقتىرۋشىلاردىڭ شەشىمىمەن رەسەيگە قارسى ايدوس سەيپىل ۇلى (55 كگ)، عالىمجان ابدراحمانوۆ (66 كگ)، ايدوس عالىموۆ (74 كگ)، سۇڭعات زاكارييەۆ (82 كگ)، اسىل بارمەنوۆ (90 كگ)، مۇحيت تۇرسىنوۆ (100 كگ) جانە ايبەك نۇعىماروۆ (+100 كگ) بەلدەستى.
ءۇشىنشى ورىنعا تالاستا گرۋزيا رەسەيدى 6:1 ەسەبىمەن جەڭىپ، قاتارىنان ەكىنشى رەت قولا «تايقازاندى» يەمدەندى.
فينالدا قازاقستان جارتىلاي فينالداعى قۇراممەن سىنعا ءتۇستى. ناتيجەسىندە بالۋاندارىمىز وزبەكستان قۇراماسىن 5:2 ەسەبىمەن جەڭىپ، ءتۋرنيردىڭ ەكى دۇركىن جەڭىمپازدارى اتاندى. بۇل سىندا ۇلتتىق قۇرامادان اسىل بارمەنوۆ پەن ايبەك نۇعىماروۆ قارسىلاستارىنا ەسە جىبەرگەنىن ايتا كەتەيىك.
بيىلعى ءتۋرنيردىڭ جالپى جۇلدە قورى 18 800 000 تەڭگەنى قۇرادى. اتاپ ايتقاندا، 1-ورىنعا – 9 400 000، 2-ورىنعا – 5 640 000 جانە 3-ورىنعا 3 760 000 تەڭگە تاعايىندالدى. تاعى ءبىر ەسكەرتە كەتەتىن جايت، سەگىز ساعاتقا سوزىلعان سايىستى وتاندىق «قازاقستان» ۇلتتىق تەلەارناسى مەن رەسەيدىڭ «بوەس» تەلەارناسى تىكەلەي ەفيردە كورسەتتى. سونداي-اق، كۇللى تۇركى الەمىنە تارايتىن تۇركيانىڭ «TRT Avaz» تەلەارناسى دا ءاپايتوس بالۋانداردىڭ ايقاسىن تىكەلەي كورسەتىپ، ءتۇبى ءبىر تۋىس حالىقتاردىڭ نازارىن قازاقستانعا اۋداردى.