قاراعاندى وبلىسىنىڭ ءبىرقاتار تۇرعىندارى ءوز ومىرلەرىندەگى ەڭ كۇردەلى ماسەلەلەر بويىنشا «نۇر وتان» پارتياسىنىڭ قوعامدىق قابىلداۋىنان ماتەريالدىق جانە كونسۋلتاتيۆتىك كومەك الدى.
 پارتيا جاقىندا حالىقارالىق بايقاۋدان ءبىرىنشى ورىن العان جاس ءانشىنىڭ بايقاۋعا قاتىسۋىنا جاعداي جاساپ، قارجىلاندىردى، ال كەشە پارتيا مۇگەدەك ادامنىڭ جۇمىسقا ورنالاسۋىنا كومەكتەستى.
سوڭعى جىلداردا «نۇر وتان» پارتياسىنىڭ قوعامدىق قابىلداۋىنىڭ ادام پروبلەمالارىنا ءمان بەرۋدىڭ ءتيىمدى جۇيەسىنە اينالعانىن ۋاقىتتىڭ ءوزى دالەلدەپ وتىر. بۇل مەملەكەتتىك قۇرىلىمدار مەن ازاماتتاردىڭ اراسىنداعى ماڭىزدى بولىك بولىپ وتىر. ءاربىر قازاقستاندىق، اسىرەسە الىس اۋىلداردا تۇراتىندار ءوزىنىڭ پروبلەمالارىن شەشىپ بەرۋدى ايتۋ ءۇشىن باسشىسىنا نەمەسە باسقا باسقارمالاردىڭ باسشىلىعىنا تەز كىرىپ-شىعا المايدى، سول ءۇشىن بىرنەشە ساعات ۋاقىتىن جوعالتادى، ال«نۇر وتان» پارتياسى بولسا وسى ەكى اراداعى كەدەرگىنى جوياتىن، كۇردەلى جاعدايدى شەشۋگە مۇمكىندىك جاسايتىن كوپىر.
پارتيانىڭ قاراعاندى وبلىستىق فيليالىندا جانە اۋداندىق بولىمشەلەرىندە جۇمىس ىستەيتىن قوعامدىق قابىلداۋلار ءارتۇرلى تۇرمىستىق ماڭىزى بار ماسەلەلەردى شەشۋگە كومەك كورسەتەدى. مىسالى، جەزقازعان قالاسىنىڭ تۇرعىنى زاۋرە قوڭىرقۇلجينوۆا «قازاقمىس كورپوراسياسى» ج ش س جانىنداعى «نۇر وتان» پارتياسىنىڭ قوعامدىق قابىلداۋىنا بارىپ، جەتىنشى سىنىپتا وقيتىن ۇلى رايىمبەك ارىستانوۆتى تۋاپسە قالاسىندا وتەتىن «لۋچشيي يز لۋچشيح» اتتى IV حالىقارالىق كونكۋرس-فەستيۆالعا بارۋىنا جاعداي جاساپ، ماتەريالدىق كومەك كورسەتۋىن سۇرادى.
– مەنىڭ ۇلىم ەسترادالىق اندەر بويىنشا ماسكەۋدە وتكەن ۆوكاليستەردىڭ رىكتەۋ تۋرىندا جۇلدەلى ورىن الىپ، حالىقارالىق كونكۋرسقا جولداما الدى. رايىمبەك كىشكەنتاي كەزىنەن ءان ايتادى، ءارتۇرلى مەكتەپتەردە بولاتىن، قالالىق، وبلىستىق شارالارعا، حالىقارالىق كونكۋرستارعا قاتىسادى. 2012 جىلى ول تۇركيادا، ال بىلتىر ماسكەۋدە ونەر كورسەتتى. ول وتە شيراق بالا، وقۋ وزاتى، دەيدى زاۋرە تالعات قىزى.
رايىمبەكتىڭ اناسى ۇلىن كونكۋرس-فەستيۆالعا جىبەرۋگە جەتپەي تۇرعان 100 مىڭ تەڭگە سۇراعان ەكەن. پارتيالىقتار بۇل ءوتىنىشتى دەرەۋ قاراپ زاۋرە قوڭىرقۇلجينوۆا سۇراعان اقشانى بەردى. بالا سەنىمدەرىن اقتادى – ول «ەسترادالىق ۆوكال» نوميناسياسىنىڭ ءى دارەجەلى لاۋرەاتى اتانىپ، جۇلدە الىپ كەلدى.
– ءبىز ۇلىمىز ەكەۋمىز «نۇر وتان» پارتياسى فيليالىنىڭ كورسەتكەن كومەگىنە العىس ايتامىز! رايىمبەك شەت ەلدە قاراعاندى وبلىسىنىڭ اتىنان حالىقارالىق بايقاۋدا ءان ايتىپ، جەڭىمپاز اتاندى. مەنىڭ ويىمشا، وسىنداي بايقاۋلاردا بالالاردىڭ مىنەزى، ليدەرلىك ۇستانىمى قالىپتاسادى، ءوزىن ءوزى جەتىلدىرۋگە ىقپال ەتەدى. ونىڭ ۇستىنە، بۇل الەمدى كورىپ، تاجىريبە جينۋ ءۇشىن ەڭ جاقسى مۇمكىندىك. وسى مۇمكىندىكتى بىزگە «نۇر وتان» پارتياسى بەردى. ۇلكەن راحمەتىمىزدى ايتامىز! – دەپ ويىمەن بولىسەدى زاۋرە قوڭىرقۇلجينوۆا.
وسى جەڭىستەن كەيىن جاس ونەرپاز رايىمبەك ونەرگە ءبىرجولاتا بەت بۇرۋعا، ءومىرىن شىعارماشىلىققا ارناۋعا بەل بايلادى.
مۇنداي بايقاۋلارعا قاتىسۋ وڭاي ەمەس. ءار ەلدەردەن جينالعان قاتىسۋشىلاردىڭ ىشىندە كىلەڭ مىقتىلار بولادى. الايدا، اتا-انامنىڭ قولداۋىمەن جانە پارتيانىڭ قارجىلاي كومەگى ارقاسىندا مەن جەڭىسكە جەتتىم! – دەيدى رايىمبەك ارىستانوۆ، – مەن ءالى دە ءان ايتۋمەن اينالىسا بەرەمىن، بايقاۋلارعا قاتىسامىن. مەنىڭ اناما راحمەت! «نۇر وتانعا» جانە مەنىڭ شىعارماشىلىق جەتەكشىمە راحمەت!
قاراعاندى وبلىسىندا ەكىنشى توپتاعى مۇگەدەك تە پارتيا تاراپىنان قولداۋ تاپتى. بۇقار جىراۋ اۋدانىنداعى بوتاقارا اۋىلىنىڭ تۇرعىندارىمەن كەزدەسۋ جاساعان «نۇر وتان» پارتياسىنىڭ قاراعاندى وبلىستىق فيليالى ءتوراعاسىنىڭ ءبىرىنشى ورىنباسارى قاديشا وسپانوۆاعا ءوتىنىش جاساعان ەربولات قىزداربەكوۆ التى ايدان بەرى جۇمىس تابا الماي جۇرگەنىن ايتتى. وبلىستىق پارتيا فيليالى ءتوراعاسىنىڭ ءبىرىنشى ورىنباسارى سول جەردە جۇمىسپەن قامتۋ ورتالىعىمەن بايلانىس جاساپ ءبىرقاتار قۇرىلىمدارداعى ۆاكانتتىق جۇمىس ورىندارىن انىقتادى. ءبىر ساعاتتىڭ ىشىندە مۇگەدەك اۋداندىق ءبولىمنىڭ تۇرعىنۇي-كوممۋنالدىق شارۋاشىلىعىنىڭ، جولاۋشىلار كولىگى جانە اۆتوكولىك جولدارىنىڭ ديسپەچەرى بولىپ جۇمىسقا ورنالاستى.
– مەن سياقتى مۇمكىندىكتەرى شەكتەۋلى كوپتەگەن ازاماتتارعا جۇمىس تابۋ وتە قيىن. ادام جۇمىس ىستەپ جۇرگەندە ءوزىنىڭ مۇمكىندىكتەرىن پايدالانا الادى. مەنى جۇمىسقا ورنالاستىرعان «نۇر وتان» پارتياسىنا ءوتىنىش جاساعانىم وتە اقىل بولدى، قاتتى قۋانىپ وتىرمىن، – دەيدى ريزاشىلىعىن بىلدىرگەن ەربولات قىزداربەكوۆ.
وسى اۋىلدىڭ تاعى ءبىر تۇرعىنى، بەس بالانى باعىپ وتىرعان جالعىز باستى اكە باقتىباي قازبەكوۆ، وقۋشى ءۇش بالاسىن مەكتەپكە قاجەتتى زاتتارمەن قامتاماسىز ەتۋدى سۇراپ پارتيانىڭ وبلىستىق فيليالى ءتوراعاسىنىڭ ءبىرىنشى ورىنباسارىنا ءوتىنىش جاساعان ەكەن. بۇل ماسەلەنى شەشۋ دە ۇزاققا سوزىلعان جوق – پارتيالىق «مەكتەپكە جول» اكسياسى اياسىندا كومەك كورسەتىلىپ، جارتى ساعاتتىڭ ىشىندە وعان بارلىق مەكتەپ جابدىقتارىن
– كوز جاسىمدى ارەڭ تەجەپ قالدىم. بەس بالانى جالعىز اسىراۋ وڭاي ەمەس. پارتيالىقتار ماعان ۇلكەن كومەك كورسەتتى. ەڭ باستىسى – ولار مەنىڭ بالالارىما قۋانىش سىيلادى، ءقازىر ولار پارتيا سىيلاعان فلوماستەرلەرمەن سۋرەت سالادى، پەنال، سىزعىش، پلاستيلين، اسپالى سومكەلەردى پايدالانىپ ءجۇر. وسىنىڭ ءوزى بىزگە ناقتى، جەدەل جانە ەڭ باستىسى، جاناشىرلىقپەن جانە سىيلاستىقپەن كورسەتىلگەن قامقورلىق، – دەيدى جالعىزباستى اكە باقتىباي قىزداربەكوۆ.

دەرەككوز. ايقىن-اقپارات