ءبىلىم جانە عىلىم ءمينيسترى تۇرعىنداردىڭ جەكە سۇراقتارى بويىنشا قابىلداۋ وتكىزدى
«نۇر وتان» پارتياسى رەسپۋبليكالىق قوعامدىق قابىلداۋىندا ۇكىمەت مۇشەلەرى ازاماتتارمەن جەكە كەزدەسىپ، ولاردىڭ تۇيىتكىلدى ماسەلەلەرىن شەشۋگە اتسالىسۋدا. وتكەن اپتادا ءبىلىم جانە عىلىم ءمينيسترى اسلان ءسارىنجىپوۆ ەلىمىزدەگى ءبىلىم سالاسىندا ورىن العان ولقىلىقتارمەن تانىستى. تۇرعىندار تۇيتكىلدى ماسەلەلەر جونىندەگى ساۋالدارىن مينيسترگە تىكەلەي قويۋعا مۇمكىندىك الىپ، ءتىپتى، ونلاين جۇيەسى ارقىلى الماتى قالاسى، قاراعاندى وبلىسى، جامبىل وبلىسى، وڭتۇستىك قازاقستان وبلىستارى دا بايلانىسقا شىقتى.
بۇل جولى ءمينيستردىڭ قابىلداۋىنا كىرىپ، ارىزىن ايتۋعا نيەت بىلدىرگەندەردىڭ قاراسى قالىڭ. تۇرعىنداردان كەلىپ تۇسكەن ارىز-شاعىمنىڭ باسىم كوپشىلىگى مەملەكەت تاراپىنان بولىنگەن گرانتقا، جوو-نا قابىلداۋ، ارنايى شاكىرتاقىمەن قامتاماسىز ەتۋ، مەكتەپكە دەيىنگى مەكەمەلەردە بالالارمەن جۇمىس جۇرگىزۋدى ارتتىرۋ، مەكتەپتەردەگى بيۋدجەتتىڭ قىسقارۋى جانە ارنايى مەكتەپتەردىڭ جابىلۋى يا بولماسا قىسقارۋى سياقتى ءوز شەشىمى تابىلماعان ماسەلەلەردى ءسوز ەتپەك.
اسلان سارىنجىپوۆپەن كەزدەسۋگە كەلگەن اقمولا وبلىسى ەسىل اۋدانىنىڭ ۇستازدارى اۋداندىق ءبىلىم ءبولىمى شىعارعان بۇيرىق بويىنشا ءوز ەڭبەكتەرىنە تولەنۋى ءتيىس قاراجاتتان قاعىلىپ وتىرعاندارىن ايتىپ، شاعىمداندى. اۋدانداعى س.سەرىكوۆ اتىنداعى مەكتەپتىڭ ۇستازى اشكەن ورازالينانىڭ ايتۋىنشا، قازاق تىلىنەن ورىس سىنىپتارىنا بەرەتىن 26 ساعاتىنىڭ 18 ساعاتى ءۇشىن عانا اقشا تولەنەدى. بۇل بۇيرىقتى اۋدانداعى ءبىلىم ءبولىمى باسشىسى ساماتوۆ نۇرلان ءماجيت ۇلى شىعارعان بولىپ شىقتى. ەسەپكە الىنباعان ساعاتتار ءۇشىن ءار ۇستاز جالاقىسىنان 20 مىڭ تەڭگەدەي جوعالتقان. قابىلداۋ بارىسىندا مۇنداي بۇيرىق تەك اقمولا وبلىسى، ەسىل اۋدانىندا عانا بەرىلگەندىگى انىقتالدى. ۇستازداردىڭ ايتۋىنشا، رەسپۋبليكا تۇرماق، كورشىلەس اۋدانداردىڭ وزىندە مۇنداي بۇيرىق شىقپاعان. ەندى اۋداندىق ءبىلىم ءبولىمى باسشىسىنىڭ ارەكەتى سالدارىنان 300-دەن استام ۇستاز از جالاقى الۋعا ءماجبۇر بولىپ وتىر.
ءمان-جايعا قانىق بولعان اسلان ءسارىنجىپوۆ بۇل ماسەلەنى تەكسەرۋ ءۇشىن اۋدانعا ارنايى كوميسسيا جىبەرىپ، جاۋاپتى اۋداننىڭ ءبىلىم ءبولىمى باسشىلارىنان ەستيتىنىن جەتكىزدى. ءمينيستردىڭ قابىلداۋىندا بولعان ۇستازدار ماسەلەنىڭ اق-قاراسى انىقتالاتىندىعىنا سەنىمدەرى مول. ال جالاقى ماسەلەسىنە جەكە توقتالعان باس پەداگوگ جاڭا جىلدان باستاپ مۇعالىمدەردىڭ ەڭبەك اقىلارى وسەتىندىگىن ايتتى. مىسالى، جوعارى ساناتتاعى مۇعالىمدەردىڭ جالاقىسى 60 پايىزعا ارتپاق. ال استانا قالاسىنىڭ تۇرعىنى دانا بوگەنباي قىزى مۇمكىندىگى شەكتەۋلى بالالارعا ارنالعان مەكتەپكە دەيىنگى مەكەمەلەرگە قابىلداۋ 4-جاستان باستالاتىندىعىنا نارازى. سونداي-اق شەتەلدەردەگى تاجىريبەنى نەگىزگە الاتىن ۋاقىتتىڭ جەتكەندىگىن، مۇمكىندىگى شەكتەۋلى بالالاردىڭ اسىرەسە داۋن سيندرومىنا شالدىققان بالالاردىڭ قوعامدىق مەكتەپتەر مەن بالاباقشالارعا بارۋىنا ەشقانداي كەدەرگىنىڭ بولماۋى كەرەكتىگىن تىلگە تيەك ەتتى. ونىڭ ايتۋىنشا، ناۋقاس بالالارمەن قوعامدىق مەكەمەلەردە دە جۇمىس جۇرگىزۋگە بولادى. تەك قارجىلاندىرۋ ماسەلەسىن مەملەكەت ءوز قاراماعىنا السا دەگەن تىلەگىن جەتكىزدى.
ءمينيستردىڭ اتىنا تۇسكەن تالاپ-تىلەكتەردىڭ ىشىندە مەكتەپتەگى ۇيىرمەلەردىڭ، ارنايى مامانداندىرىلعان مەكتەپتەردىڭ قارجىلاندىرۋ ماسەلەسى ءجيى قوزعالدى. سونىڭ ءبىر مىسالى، نادەجدا اندرەيەۆانىڭ باستاۋىمەن قاراعاندى قالاسىنداعى №86 ورتا مەكتەبىنىڭ ۇجىمى ۇزارتىلعان توپتى ساقتاپ قالۋ ءۇشىن ءوتىنىش ءبىلدىردى. «بيىلعى قاراشا ايىنىڭ 1-نەن باستاپ ءبىزدىڭ مەكتەپتە ۇزارتىلعان توپ جابىلماق. ول جايلى بىزگە قالالىق ءبىلىم بەرۋ باسقارماسى حابارلادى. ءتۇرلى ماسەلەلەرگە بايلانىستى اتا-انالار وزدەرىنىڭ بالالارىن مەكتەپتەن ۋاقىتىندا الىپ كەتە المايدى. ءبىز سىزدەردەن مەكتەپتەگى ۇزارتىلعان توپتى ساقتاپ قالۋدى سۇرايمىز»، – دەدى نادەجدا اندرەيەۆا. اتالعان ماسەلەگە اسلان ءسارىنجىپوۆ: «ءسىزدىڭ ءوتىنىشىڭىز، مەكتەپتەگى ۇزارتىلعان توپتى قوسىمشا قارجىلاندىرۋ ماسەلەسىن قاراستىرۋ ءۇشىن، قاراعاندى قالاسىنىڭ اكىمدىگىنە جىبەرىلەتىن بولادى»، ̶ دەپ جەرگىلىكتى اتقارۋشى ورگاندارعا ماسەلەنى وڭتايلى شەشۋدى تاپسىردى. الداعى ۋاقىتتا قابىلداۋعا كەلگەن تۇرعىنداردىڭ، كوتەرىلگەن ءار تۇيىتكىلدى ماسەلەلەردىڭ شەشىمى تابىلىپ، مينيسترلىك پەن ءتيىستى مەكەمەلەر بىرلەسە جۇمىس جۇرگىزبەك.
«نۇر وتان» پارتياسىنا قاراستى رەسپۋبليكالىق قوعامدىق قابىلداۋ ءبولىمى باسشىلىعى ءوز كەزەگىندە ۇكىمەت مۇشەلەرىنىڭ قاتىسۋىمەن مۇنداي شارالاردىڭ جالعاساتىنىن جەتكىزدى. «نۇر وتان» پارتياسى رەسپۋبليكالىق قوعامدىق قابىلداۋ ءبولىمى مەڭگەرۋشىسى ابىلايحان وسپانوۆ: «بىزدە اپتا سايىن ءماجىلىس دەپۋتاتتارى، ۇكىمەت مۇشەلەرى قابىلداۋ وتكىزەدى. مىسالى، وسى ايدىڭ اياعىنا دەيىن باقىت سۇلتانوۆ، ەربولات دوسايەۆ جانە بەرىك يماشيەۆ ازاماتتاردى قابىلدايدى دەپ جوسپارلانۋدا. وسىنداي كەزدەسۋلەر جەرگىلىكتى فيليالداردا دا ءوز جالعاسىن تاپپاق. ياعني وبلىس اكىمدەرى مەن ءبولىم باسشىلارى تۇرعىندارمەن قابىلداۋلار وتكىزەدى»، ̶ دەيدى. ايتا كەتەرلىگى رەسپۋبليكالىق قوعامدىق قابىلداۋعا 9 ايدىڭ ىشىندە 65 مىڭعا جۋىق ازامات كەلسە، ونىڭ 15 مىڭعا جۋىعى ءماجىلىس دەپۋتاتتارى مەن مينيسترلەردىڭ قابىلداۋىندا بولعان. پارتيانىڭ تىكەلەي ۇيىمداستىرۋىمەن باستاۋ العان بۇل شارانىڭ جەرگىلىكتى حالىققا بەرەرى مول. سوڭعى كورسەتكىش بويىنشا رەسپۋبليكالىق قوعامدىق قابىلداۋدىڭ ناتيجەسىندە حالىقتى جۇمىسپەن قامتۋ ماسەلەسى مەن ەڭبەكاقىنىڭ ۋاقىتىلى تولەنۋىنە قاتىستى ءبىرقاتار تۇيىتكىلدى ماسەلەلەردىڭ 20،7 پايىزى ءوز شەشىمىن تاپقان. الداعى ۋاقىتتا دا اتالعان ءۇردىستىڭ تۇراقتى وتكىزىلۋىن، ۇيىمداستىرۋىن باس پارتيا ءوز باقىلاۋىنا الماق.
دەرەككوز: "جاس قازاق" گازەتى
