بالالى وتباسىلارعا قانداي الەۋمەتتىك قولداۋ كورسەتىلەدى:

- جۇكتىلىك پەن بوسانۋ بويىنشا الەۋمەتتىك تولەم؛

- بالا تۋعاندا تولەم؛

- بالا ءبىر جارىم جاسقا تولعانعا دەيىن ونىڭ كۇتىمى بويىنشا جاردەماقى؛

- مۇگەدەكتىگى بار بالا تاربيەلەپ وتىرعان اتا-انالارعا ارنالعان جاردەماقى.

ۇكىمەت باسشىسى ولجاس بەكتەنوۆ ءماجىلىس دەپۋتاتتارىنىڭ ساۋالىنا بەرگەن جاۋابىندا ەلىمىزدە كوپبالالى وتباسىلارعا كورسەتىلەتىن قولداۋ جۇيەسى جايلى ءتۇسىندىرىپ بەردى.

بيىل رەسپۋبليكالىق بيۋدجەتتەن مەملەكەتتىك جاردەماقىلاردىڭ 5 ءتۇرىن جانە مەملەكەتتىك الەۋمەتتىك ساقتاندىرۋ قورىنان الەۋمەتتىك تولەمنىڭ 2 ءتۇرىن تولەۋگە 1،5 ترلن تەڭگە قاراجات ءبولىندى. بيىل 1 قازانداعى جاعداي بويىنشا بۇل تولەمدەردى 2،3 ملن استام ادام الدى، بۇل وتكەن جىلدىڭ وسىنداي كەزەڭىمەن سالىستىرعاندا 10،5%-عا جوعارى. وسىلايشا، مەملەكەتتىڭ ازاماتتار الدىنداعى الەۋمەتتىك مىندەتتەمەلەرى جىل سايىن ءوسىپ كەلەدى، - دەلىنگەن رەسمي جاۋاپتا.

سونداي-اق كوپبالالى وتباسىلارعا الەۋمەتتىك قولداۋ كورسەتۋ ماقساتىندا مەملەكەتتىك جاردەماقى وتباسىنداعى بالالار سانىنا قاراي سارالانعان مولشەردە تولەنەدى.

ولار:

- 4 بالاسى بار وتباسىلارعا – 59 183 تەڭگە؛

- 5 بالاسى بار – 73 988 تەڭگە؛

- 6 بالاسى بار – 88 793 تەڭگە؛

- 7 بالاسى بار – 103 598 تەڭگە؛

8 جانە ودان دا كوپ بالالارى بار وتباسى ءۇشىن – ءار بالاعا 14768 تەڭگەدەن قوسىلادى.

بۇدان باسقا، بەس جانە ودان دا كوپ بالاسى بار وتباسىلار (2020 جىلى – 8،4%، 2024 جىلى – 9،8%) ۇلەسى مەن ناگرادتالعان انالار سانىنىڭ (2020 جىلى – 232 320 ادام، 2024 جىلى – 237 636 ادام) سوڭعى 5 جىلدا وسكەن. بۇل قولدانىستاعى الەۋمەتتىك قورعاۋ جۇيەسىنىڭ تيىمدىلىگىن بىلدىرەدى.