ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا 2024 جىلعى 6 قاراشادا ق ر ۇكىمەتىنىڭ وتىرىسىندا سوڭعى ءۇش جىلدا قازاقستاندا مۇگەدەك بالالاردىڭ سانى ارتقانىن ايتتى.

ودان بولەك، مينيستر بۇگىندە ەلىمىزدە مۇمكىندىگى شەكتەۋلى 732 مىڭ ادام تۇراتىنىن، بۇل حالىقتىڭ جالپى سانىنىڭ 3،6%-ىن قۇرايتىنىن اتاپ ءوتتى.

"ونىڭ 57 پايىزى ەڭبەككە قابىلەتتى جاستاعى ادامدار، 27 پايىزى زەينەتكەرلىك جاستاعى ادامدار، 15 پايىزى — بالالار. 18 جاستان اسقان جاستار اراسىندا اۋرۋدىڭ نوزولوگيالىق فورمالارىنىڭ قۇرىلىمىندا پسيحيكالىق بۇزىلۋلار، قان اينالىمى جۇيەسىنىڭ اۋرۋلارى، بارلىق لوكاليزاسيانىڭ جاراقاتتارى باسىم. ال بالالار مۇگەدەكتىگى بويىنشا جۇيكە جۇيەسىنىڭ اۋرۋلارى، تۋا بىتكەن اقاۋلار، پسيحيكالىق بۇزىلۋلار باسىم"، — دەدى سۆەتلانا جاقىپوۆا.

ونىڭ ايتۋىنشا، جۇرگىزىلگەن تالداۋ سوڭعى ءۇش جىلدا بالالاردىڭ مۇگەدەكتىگى 11 پايىزعا وسكەنىن كورسەتەدى. مۇمكىندىگى شەكتەۋلى بالالاردىڭ كوپشىلىگى 7 جاستان 18 جاس ارالىعىندا.

"مۇگەدەكتىگى بار ادامداردى الەۋمەتتىك قامسىزداندىرۋعا ارنالعان شىعىستار بازالىق جانە مىندەتتى دەڭگەيدە جۇزەگە اسىرىلادى. جىل سايىن رەسپۋبليكالىق بيۋدجەت پەن مەملەكەتتىك الەۋمەتتىك ساقتاندىرۋ قورىنىڭ جيىنتىق شىعىستارى شامامەن 22 پايىزعا ۇلعايادى. بيىل ولار 748،5 ملرد تەڭگەنى قۇرادى"، – دەدى مينيستر.