ۇلتتىق قۇندىلىقتاردى دارىپتەيتىن ۇلتتىق ونىمدەردىڭ ءبىرى «ەلەكتروندى قازاق ءۇي» – بۇگىندە ەلىمىزدەگى جۇرت ىزدەپ جۇرەتىن باعالى تاۋارعا اينالعان.

بۇلدىرشىندەرگە قازاقتىڭ اڭىز-ەرتەگىلەرىن، بەسىك جىرىن، ابايدىڭ قارا سوزدەرىن، ءداستۇرلى اندەرى مەن كۇيلەرىن تىڭداتۋعا جانە ۇيرەتۋگە ارنالعان «ەلەكتروندى قازاق ءۇي» ءونىمىن «ۇلاس-ەلەكترون» ج ش س جاساپ شىعارعان. ەرەكشەلىگى سول، اتى ايتىپ تۇرعانداي ەلەكتروندى قۇرىلعىنىڭ سىرتقى ءپىشىنىن قازاقتىڭ اق بوز ۇيىنە كەلتىرىپ جاساعان. جوبانىڭ اۆتورى عالىمبەك قىزىربەك ۇلىنىڭ ايتۋىنشا، بۇل قۇرىلعىدا توپتاستىرىلعان 1200 دانا اۋديوماتەريال بار.

«قازاق ءۇيدى» قولدانۋشىلار ءۇشىن وتە ىڭعايلى ەتىپ جاساعان. ول ءۇشىن ءتيىستى تۇيمەشىكتەرىن باسۋ ارقىلى مازمۇنى مەن جانرى ءارتۇرلى ءتورت بولىمگە ءوتىپ، قالاعان ان-كۇيىڭىزدى نەمەسە ەرتەگىلەردى، بەسىك جىرلارىن، ابايدىڭ قارا سوزدەرىن تىڭداۋعا بولادى.

ءبىرىنشى ءبولىم – ەرتەگىلەر. ەرتەگى-اڭىزدار تانىمال اكتەر ايدوس بەكتەمىر مەن راديو جۇرگىزۋشى  ساۋىق جاقانوۆانىڭ داۋسىمەن جازىلعان. ەكىنشى ءبولىم – بالالار ءانى. بالالارعا ارنالعان جۇزدەن استام اندەر توپتاماسىن تالانتتى جەتكىنشەكتەر ورىندايدى. ءۇشىنشى ءبولىم – كۇيلەر. بۇل بولىمدە قۇرمانعازى، تاتتىمبەت، داۋلەتكەرەي سىندى داۋلەسكەر كۇيشىلەردىڭ مۋزىكالىق مۇرالارى جانە جيىرماسىنشى عاسىرداعى قازاق كومپوزيتورلارىنىڭ كۇيلەرى توپتاستىرىلعان. مۇندا بالدىرعاندار دومبىرا، قوبىز، سىبىزعى، جەتىگەن سىندى اسپاپتار ارقىلى ورىندالعان كۇيلەرمەن سۋسىندايدى. ءتورتىنشى بولىمدە – ءداستۇرلى اندەر، تەرمە-تولعاۋلار، بەسىك جىرلارى، باتىرلار جىرلارى جانە داستاندار، ابايدىڭ قارا سوزدەرى جازىلعان.

ۇلتتىق ونىمگە ەلىمىزگە بەلگىلى عالىمدار مەن پەداگوگ ماماندار جوعارى باعا بەرىپ وتىر. ماسەلەن،فيلولوگيا عىلىمدارىنىڭ دوكتورى باۋىرجان جاقىپ:

– «ەلەكتروندى قازاق ءۇي جوباسى» – ويلاستىرىلىپ جاسالعان دۇنيە. مازمۇنىنداعى شىعارمالاردى تىڭداپ كوردىم. بالالارعا ارنالعان ەرتەگى، بەسىك جىرى، ءارتۇرلى اسپاپپەن ورىندالاتىن كۇيلەردىڭ جەكە-جەكە بەرىلۋى، حالىق اندەرى، ابايدىڭ 45 قارا ءسوزى، وسىنشاما ۇشان-تەڭىز بايلىق ءبىر جەرگە توپتاستىرىلعان. ال كيىز ءۇي — قازاقتىڭ برەندتى. قازاقتىڭ كيىز ءۇيىنىڭ ىشىنە اسىل مۇرالاردىڭ جيناقتالعانى وتە جاقسى يدەيامەن جۇزەگە اسقان. ءار قازاقتىڭ تورىندە تۇراتىن دۇنيە. وسى قازاق ءۇي ارقىلى شالقار، قازاق راديوسىنىڭ باعدارلامالارىن دا تىڭداۋعا بولادى ەكەن. جالپى قازاق ءۇيدىڭ بىرنەشە فۋنكسيالارى بار. وسىنىڭ ءبارى ماعان ۇنادى. بولاشاقتا وسى كۇيىندە قالىپ قالماي، كولەمىن وزگەرتىپ، باسقا دا كۇيلەر مەن حالىق اندەرىمەن مازمۇنىن بايىتا ءتۇسۋ كەرەك،– دەيدى.

«ەلەكتروندى قازاق ءۇي» تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى اياسىندا جاسالعانىن ايتا كەتۋ كەرەك. جوبا اۆتورى، «ۇلاس-ەلەكترون» ج ش س ديرەكتورى عالىمبەك قىزىربەك ۇلى:

– «ەلەكتروندى قازاق ءۇي» جوباسى ءبىزدىڭ 3 جىل بويى جاساعان جۇمىسىمىزدىڭ جەمىسى. ونداعى 1200 اۋديوماتەريالدار «قازاق ۇيدەن» عانا ەمەس، ونىڭ فلەشكاسىن قوسۋ ارقىلى ءوزىڭىز قالاعان باسقا دا قۇرىلعىدان تىڭداۋىڭىزعا بولادى. سونداي-اق، انتەنناسىن قوسىپ، راديو تىڭداۋعا دا بولادى. ساتىپ الام دەۋشىلەر ءۇشىن، باعاسى شامامەن 10 مىڭ تەڭگە توڭىرەگىندە،– دەيدى.

بالالاردىڭ دەنساۋلىعى اسا ماڭىزدى ەكەنىن ەسكەرە وتىرىپ، قۇرىلعى ISO  الەمدىك ساپا ولشەمدەرىنە ساي ماتەريالداردان جاسالعانىن دا ايتا كەتۋ كەرەك.

دەرەككوز: "تۇركىستان" گازەتى