استانا. قازاقپارات - الماتى وبلىسى جامبىل اۋدانى قاراقىستاق اۋىلىندا جىر سۇلەيى ءسۇيىنباي ارون ۇلىنىڭ 200 جىلدىق مەرەيتويىنا وراي اقىننىڭ ەسكەرتكىشى مەن ساياباعى اشىلدى. بۇل تۋرالى الماتى وبلىسى اكىمىنىڭ باسپا ءسوز قىزمەتىنەن حابارلادى.
ءتورت كۇنگە سوزىلعان اقىننىڭ ءدۇبىرلى تويىنىڭ قورىتىندىسى ىسپەتتەس ايتۋلى شاراعا ەلىمىزدىڭ زيالى قاۋىم وكىلدەرى، عالىمدار، پارلامەنت دەپۋتاتتارى، سونىمەن قاتار جامبىل جانە وڭتۇستىك قازاقستان وبلىستارىنىڭ، تۇركيا مەملەكەتىنىڭ وكىلدەرى ارنايى كەلدى.  

قوناقتار الدىمەن ءسوز سۇلەيىنىڭ كەسەنەسىندە بولىپ، رۋحىنا تاعزىم ەتتى. مۇنان سوڭ اقىننىڭ بيىلعى جىلى كۇردەلى جوندەۋدەن ءوتىپ، جاڭارىپ-جاڭعىرعان مۇراجايىنا اتباسىن تىرەپ، جادىگەرلەرمەن تانىستى.

سونداي-اق وسى كۇنى جاڭادان اشىلعان ساياباقتىڭ ىشىندە ورناتىلعان بيۋست كوپشىلىكتىڭ كوزايىمىنا اينالدى.

مەرەيتويدىڭ العاشقى قۇتتىقتاۋ ءسوزى الماتى وبلىسىنىڭ اكىمى اماندىق باتالوۆقا بەرىلدى. ءوڭىر باسشىسى ءوز سوزىندە اقىننىڭ مۇراسىن قاستەرلەپ، ۇرپاققا جەتكىزۋ باعىتىندا اتقارىلعان يگىلىكتى ىستەردى اتاپ ءوتىپ، جينالعان قاۋىمدى تورقالى تويلارىمەن قۇتتىقتادى. اقىن مۇراجايىنا كولىكتىڭ كىلتىن تابىستاپ، «ءسۇيىنباي سازى» حالىقتىق فولكلورلىق-ەتنوگرافيالىق انسامبلىنە جاقىن كۇندەردە اۆتوبۋس الىنىپ بەرىلەتىنىن دە جەتكىزدى. سونىمەن قاتار كورنەكتى عالىم، ادەبيەت زەرتتەۋشىسى سۇلتانعالي سادىربايەۆتىڭ ءسۇيىنبايتانۋ باعىتىنداعى ەڭبەگىن اتاپ ءوتىپ، عالىمنىڭ جۇبايى زۇكەن كەڭشىلىكقىزىنا سىي-سياپات كورسەتتى.

مۇنان سوڭ ءسوز العان ق ر مادەنيەت جانە سپورت ءمينيسترى ارىستانبەك مۇحامەدي ۇلى، حالىقارالىق تۇركسوي ۇيىمىنىڭ باس حاتشىسى دۇيسەن قاسەيىنوۆ، ق ر پارلامەنتى سەناتىنىڭ دەپۋتاتى، جازۋشىلار وداعىنىڭ باسقارما ءتوراعاسى نۇرلان ورازالين، پروفەسسور عالىم تولەگەن قوجامقۇلوۆ، جامبىل وبلىسى اكىمىنىڭ ورىنباسارى ەرقانات مانجۋوۆتار ءسۇيىنبايدىڭ اقىندىعىن، قايراتكەرلىك قىرىن تىلگە تيەك ەتىپ، بۇل توي كۇللى قازاقتىڭ رۋحانياتىنىڭ تويى ەكەنىن ايتتى.

ال ەۋرازيا جازۋشىلار وداعىنىڭ ءتوراعاسى ياكۋپ ومار ۇلى: «ءبورى - تەك قازاق حالقىنىڭ عانا ەمەس، كۇللى تۇركى حالىقتارىنىڭ سيمۆولى، ەندەشە ءسۇيىنباي جىرلاعان «ءبورىلى بايراق»، ءسۇيىنباي اقىن شاقىرعان بەرەكە-بىرلىك بارشا تۇركى جۇرتىنا ايتىلعان ءسوز دەپ بىلەمىز. سوندىقتان ءسۇيىنباي قازاقتىڭ عانا ەمەس، تۇركى جۇرتشىلىعىنىڭ دا ۇلى اقىنى»، - دەگەن كەلەلى پىكىرىن جەتكىزدى.

وسى كۇنى تويعا ارنايى كەلگەن كوچنۋرين مۋنيسيپاليتەتىنىڭ حالىقارالىق قاتىناس دەپارتامەنتىنىڭ ديرەكتورى مۇستافا اراچ ءسۇيىنباي مەرەيتويىن بيىلعى جىلى تۇركيالىقتار باستاپ، اقىننىڭ قۇرمەتىنە ساياباق اشقانىن اتاپ ءوتىپ، انادولىلىقتاردىڭ تويعا دەگەن تارتۋىن ۇسىندى. اقىن مۇراجايىنا قويىلعان بۇل سىيلىقتاردىڭ قاتارىن جامبىل جانە وڭتۇستىك قازاقستان وبلىستارىنىڭ دا تارتۋ-تارالعىلارى تولىقتىردى.

اقىندار مەن تەرمەشىلەر ءسۇيىنبايدىڭ جىر-تەرمەلەرىن توگىلتىپ، «ءسۇيىنباي سازى» ءانسامبلى ونەرىن پاش ەتتى.

مەرەيتوي سوڭى «كوكباستاۋ» يپپودرومىندا ۇلتتىق ات سپورتى جارىستارىنا ۇلاستى.

جالپى، اقىن مەرەيتويى قارساڭىندا اقىننىڭ بۇرىن باسپا بەتىن جارىق كورمەگەن شىعارمالارى مۇراعات ارقىلى جيناقتالىپ، سونىمەن قاتار ءسۇيىنباي تۋرالى جازعان اقىن-جازۋشىلاردىڭ شىعارمالارى ىرىكتەلىپ، 4 تومدىق كىتاپ بولىپ باسىلىپ شىقتى.

جىر سۇلەيىنىڭ كەسەنەسى قايتا قالپىنا كەلتىرىلىپ، ادەبي-مەموريالدىق مۇراجايىنا كۇردەلى جوندەۋ جۇرگىزىلدى. تۋعان اۋىلى قاراقىستاق اباتتاندىرىلىپ، جاڭا كەيىپكە ەندى.

دەرەككوز: قازاقپارات