استانا. قازاقپارات - «استانا ەكسپو-2017» ۇلتتىق كومپانياسى» اق باسقارماسىنىڭ ءتوراعاسى احمەتجان ەسىموۆ الماتى وبلىسىنىڭ اكىمى اماندىق باتالوۆپەن كەزدەستى، دەپ حابارلايدى اكىمدىكتىڭ باسپا ءسوز قىزمەتىنەن.  
وبلىستىڭ اكىمدىگى جانە «استانا ەكسپو-2017» ۇك» اق اراسىندا وتاندىق تاۋار وندىرۋشىلەردى «استانا ەكسپو-2017» حالىقارالىق مامانداندىرىلعان كورمەسىنىڭ نىساندارىن سالۋعا قاتىستىرۋعا باعىتتالعان مەموراندۋمعا قول قويىلدى.

«جاقىندا عانا ەلباسى اتاپ وتكەندەي، قازىرگى داعدارىس 2007 جىلدارداعىدان الدەقايدا كۇردەلىرەك. سوندىقتان جاڭا جۇمىس ورىندارىن عانا ەمەس، قازىرگى جۇمىس ورىندارىن ساقتاپ قالۋ ەرەكشە ماڭىزدى. سوندىقتان دا ءبىز وسى كەلىسىمشارتتارعا قول قويىپ جاتىرمىز »، - دەدى احمەتجان ەسىموۆ.

ارنايى ۇيىمداستىرىلعان كورمەدە تاپسىرىس بەرۋشىلەر ءونىمنىڭ ساپاسىن ءوزى كورىپ، باعالاۋ مۇمكىندىگىنە يە بولدى.

«وزدەرىڭىزگە بەلگىلى، الماتى وبلىسىنىڭ الەۋەتى اۋقىمدى. ەكسپو-2017» سياقتى ۇلكەن جوباعا ءبىزدىڭ تاۋار وندىرۋشىلەرىمىزدىڭ قاتىساتىندىعىنا ءبىز قۋانىشتىمىز» - دەدى وبلىس اكىمى اماندىق باتالوۆ. 

«ەكسپو» باس مەردىگەرلەرى ىقتيمال جابدىقتاۋشىلارمەن بولاشاقتاعى بيزنەس ارىپتەستىگىن ىنتىماقتاستىق تۋرالى مەموراندۋمدار مەن ناقتى شارتتارمەن باياندى ەتتى.

كەزدەسۋ بارىسىندا ۇلتتىق كومپانيانىڭ باس مەردىگەرلەرى وتاندىق تاۋار وندىرۋشىلەرمەن 11 كەلىسىمشارتقا قول قويدى.

اتاپ ايتساق، باس مەردىگەر او «سەمبول ينشاات» بىردەن 4 كەلىسىمشارتقا قول قويىپ، «Plast Invest Production» ج ش س، «كومپانيا Sonik» ج ش س، «پوليمەرمەتالل-ت» ج ش س جانە «اليۋگال» ج ش س كومپانيالارىمەن جۇمىس ىستەۋگە كەلىستى.

وسىنداي كەلىسىمدەر  «Mabco constructions s.a.» مەردىگەرى ءۇش شارت- «كناۋفگيپسكاپشاگاي» ج ش س،  «حەنكەل باۋتەحنيك كازاحستان» ج ش س جانە «گالاكسي» ج ش س كومپانيالارىمەن جاساستى. سونىمەن قاتار، «ابك كۇرىلىس-1» كومپانياسى«كناۋفگيپسكاپشاگاي» جشس- مەن جانە «جەتىسۋ گرانيت» جشس-مەن كەلىسىمشارتقا قول قويدى.  

«Turkuaz YDA Stroy» كومپانياسى «تابيعي رەسۋرستاردى پايدالانۋ جانە تابيعاتتى پايدالانۋدى رەتتەۋ» مەملەكەتتىك مەكەمەسىمەن، «ساەس سرەدازەنەرگوستروي» كومپانياسى «اسپمك-519» اكسيونەرلىك قوعامىمەن؛ «سك «بازيس» كومپانياسى «مەكادا» ج ش س، «تەكەلي-گرانيت» ج ش س، «كناۋفگيپسكاپشاگاي» ج ش س بىرگە جۇمىس ىستەۋ نيەتىن مەموراندۋمدا بەكىتتى.   

سونىمەن قاتار، «استانا ەكسپو-2017» ۇلتتىق كومپانياسى» اق مەملەكەتتىك ۇلتتىق تابيعي پاركتەرىمەن دە، اتاپ ايتقاندا «كولساي وزەنى»، «التىن ەمەل»، «ىلە الاتاۋ» مەكەمەلەرىمەن، سونداي اق «جىبەك جولى» جانە «Asia Discovery» تۋروپەراتورلارىمەن مەموراندۋمعا قول قويىلدى

كومپانيا قاراعاندى، قىزىلوردا، سولتۇستىك قازاقستان، پاۆلودار، شىعىس قازاقستان، جامبىل وبلىستارىنىڭ اكىمدىكتەرىمەن، سونىمەن قاتار استانا قالاسىنىڭ اكىمدىگىمەن وتاندىق تاۋار وندىرۋشىلەردى قاتىستىرۋ تۋرالى مەموراندۋمدار جاساپ، قول قويدى.  

دەرككوز: قازاقپارات