قىزىلوردا. قازاقپارات - بۇگىن «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆ جۇمىس ساپارىمەن قىزىلوردا وبلىسىندا بولدى.
 الدىمەن وبلىس اكىمدىگىنىڭ احۋالدىق ورتالىعىندا وبلىستىق پارتيا اكتيۆىمەن كەزدەسىپ، الداعى جۇمىس باعىتتارىن تالقىلادى. ماجىلىسكە قالا مەن اۋدانداردان بارلىعى 400 نۇروتاندىق سەلەكتورلىق بايلانىس ارقىلى قاتىستى. پارتيا بەلسەندىلەرىمەن كەزدەسۋ بارىسىندا ا.مىرزاحمەتوۆ وڭىردەگى باستاۋىش پارتيا ۇيىمدارىنا اسا ءمان بەرىلىپ، جەرگىلىكتى فيليالدارداعى قىزمەتكەرلەر سانى 43 پايىزعا-عا، ياعني 358 ادامعا ارتقانىن ايتتى.

 - شاعىن جانە ورتا بيزنەستى دامىتۋدى پارتيالىق باقىلاۋعا العالى وتىرمىز. سەبەبى ول حالىقتى جۇمىسپەن قامتاماسىز ەتۋگە مول مۇمكىندىك بەرەدى. قازىرگى داعدارىس جاعدايىندا ءبىز وسىعان باسىمدىق بەرۋىمىز كەرەك،- دەگەن  اسقار مىرزاحمەتوۆ سىر وڭىرىندە جاسالىپ جاتقان جۇمىستارعا وڭ باعاسىن بەردى. - «جالپى قىزىلوردا وبلىسىنىڭ دامۋ قارقىنى وزگە وڭىرلەرگە ۇلگى بولارلىقتاي. ەلباسىنىڭ سىر وڭىرىنە ساپارى اياسىندا قىزىلوردا وبلىسىنا بەرگەن جوعارى باعاسى وسىنىڭ ايعاعى»، -دەدى ول.

       وبلىس اكىمى قىرىمبەك كوشەربايەۆ «نۇرلى جول» باعدارلاماسىنىڭ جۇزەگە اسىرىلۋ بارىسىن بايانداپ، داعدارىس جاعدايىندا ەكونوميكانى ءارتاراپتاندىرۋعا جانە جۇمىس ورىندارىن ساقتاپ قالۋعا باستى نازار اۋدارۋ كەرەكتىگىنە توقتالدى.

       -  ءبىزدىڭ ەڭ باستى مىندەتىمىز - بار جۇمىس ورىندارىن ساقتاپ قالىپ، جاڭا جۇمىس ورىندارىن اشۋعا جاعداي جاساۋ. قازىرگى ەكونوميكالىق جاعداي نۇر وتانعا بۇرىنعىدان دا جوعارى كۇش جۇكتەيدى. سوندىقتان، ۇرەيدى - ۇكىلى ۇمىتكە، سەكەمدى - سەيىلگە اينالدىرۋ كەرەك، - دەدى وبلىس اكىمى ق.كوشەربايەۆ.

       جۇمىس ساپارى بارىسىندا ا.مىرزاحمەتوۆ ۆاگون جوندەۋ دەپوسىندا بولدى. جۇمىسشىلارمەن كەزدەسىپ، كاسىپورىننىڭ جۇمىسىمەن تانىستى. 80 جىلدىق تاريحى بار تەمىر جولدىڭ توزعان ۆاگوندارىن قالىپقا كەلتىرەتىن بۇل ءوندىرىس ورنىندا ءقازىر 405 ادام جۇمىس ىستەسە، ونىڭ 228ء-ى «نۇر وتان» پارتياسىنىڭ مۇشەسى.

    ءمۇنان سوڭ قوناقتار «ءوندىرىس» يندۋستريالدى ايماققا ات باسىن بۇردى. 50 گەكتار اۋماقتى الىپ جاتقان شىنى زاۋىتىنىڭ قۇرىلىسىمەن تانىستى. زاماناۋي تەحنولوگياعا نەگىزدەلگەن بۇل ءوندىرىس ورنى كۇنىنە 600 توننا شىنى تاباقشاسىن شىعارۋعا قۋاتتى. ءقازىر قۇرىلىس جۇمىستارى قارقىندى جۇرگىزىلۋدە. زاۋىتقا قاجەت قويما سالىنىپ، 100-دەن استام ادام جۇمىس ىستەپ جاتىر. جوسپارعا سايكەس ءوندىرىس ورنىن 2017 جىلى ىسكە قوسۋ كوزدەلىپ وتىر. شىنى زاۋىتىنىڭ ونىمدەرى جاڭا تەحنولوگيا بويىنشا وندىرىلەتىن بولادى. سوندىقتان، ونىڭ ەكسپورتتىق الەۋەتى دا جوعارى بولماق.

دەرەككوز: قازاقپارات