ورال. قازاقپارات - باتىس قازاقستان وبلىسىندا ءسابي سۇيەتىن جاستاعى 3655 ايەل بولسا، سونىڭ 241ء-ى - 15-18 جاس ارالىعىنداعىلار. بۇل تۋرالى وبلىس اكىمىنىڭ ورىنباسارى باقتيار ماكەننىڭ توراعالىعىمەن وتكەن بقو اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا وتىرىسىندا وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى نۇرجامال جۇماعۇلوۆا ءمالىم ەتتى.
ونىڭ ايتۋىنشا، وسى ايەلدەردىڭ 1590-ى نەمەسە 43،5 پايىزى - ەكىنشى توپتاعى مۇگەدەكتەر. ولارعا مەديسينالىق كومەك ساپاسىن جاقسارتۋ ماقساتىندا ەمدەلۋشىلەر مونيتورينگى جۇيەسى جەتىلدىرىلۋدە. بيىلعى تامىزدان باستاپ بارلىق مەديسينا مەكەمەلەرىندە قۇرامىندا رەابيليتولوگ، ەمدەۋ-دەنە شىنىقتىرۋ نۇسقاۋشىسى، ەرگوتەراپيەۆت، پسيحولوگ جانە سىلاۋشى بار ارنايى توپتار قۇرىلدى. ولار ءار ەمدەلۋشىنى ساۋىقتىرۋ ءۇشىن جەكە باعدارلاما جاساۋى كەرەك. سونداي-اق جۇكتىلىكتەن ساقتانۋشىلار وتباسىنى جوسپارلاۋ كابينەتتەرىندە اقىل-كەڭەس پەن تەگىن قۇرالدار الا الادى.

وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ءدىلداش يسقاقوۆانىڭ ءمالىم ەتكەنىندەي، وڭىردەگى مۇگەدەك ايەلدەر اراسىندا پسيحيكالىق-جۇيكە اۋرۋلارى مەن قاتەرلى ىسىككە شالدىققاندار از ەمەس. سوندىقتان ولارعا ەرەكشە كوڭىل ءبولۋ قاجەت-اق. الداعى جىلدىڭ باسىنان مۇگەدەكتەرگە «ءبىر تەرەزە» قاعيداتى بويىنشا قىزمەت كورسەتىلەتىن بولادى.

بالالار اۋلا كلۋبتارىنىڭ وتباسى قۇندىلىقتارىن نىعايتۋ مەن جاس جەتكىنشەكتەر تاربيەسىندەگى ءرولى جونىندە حابارلاما جاساعان ورال قالاسى اكىمىنىڭ ورىنباسارى مارس ساتىبالدييەۆتىڭ سوزىنە قاراعاندا، مۇنداي جۇمىستار جۇيەلى جۇرگىزىلۋدە. شاھاردا 37 مىڭ بالا بولسا، سونىڭ 12 مىڭى 17 اۋلا كلۋبىندا بوس ۋاقىتتارىن ءماندى وتكىزۋدە. جاس جۇبايلار اراسىندا اجىراسۋشىلاردىڭ كوبەيۋىنە بايلانىستى جۇمىسقا ورنالاسۋ، تۇرعىن ءۇي الۋ، ءوز كاسىبىن باستاۋ، بالالار دەمالىسىن ۇيىمداستىرۋ باعىتىندا قۇندى دەرەكتەر ۇسىناتىن كىتاپشالار شىعارىپ، تاراتۋ قولعا الىندى.

اۋىلدىق جەرلەردە مۇگەدەك ايەلدەردى ساۋىقتىرۋ باعىتىنداعى جۇمىستار جونىندە زەلەنوۆ جانە بوكەي ورداسى اۋدانى اكىمىنىڭ ورىنباسارلارى رافيلبەك امانجول مەن لاريسا قايىرعالييەۆا مالىمەت بەردى.

جيىن سوڭىندا ب.ماكەن مۇگەدەكتەر، سونىڭ ىشىندە ايەلدەر نازاردان تىس قالماي، ولارعا ۇنەمى قولداۋ-كومەك كورسەتىلۋى قاجەت ەكەندىگىن اتاپ كورسەتتى. وسى ورايدا سالا باسشىلارى مەن قالا، اۋداندار اكىمدىكتەرىنە ءتيىستى تاپسىرمالار بەرىلدى.

دەرەككوز. قازاقپارات