تاراز. قازاقپارات - جۋالى اۋدانىنداعى بورالداي اۋىلدىق وكرۋگىنىڭ ەرتاي اۋىلىندا، حالىق قاھارمانى، گەنەرال-لەيتەنانت، ق ر قارۋلى كۇشتەرىنىڭ بۇرىنعى باس شتاب باستىعى، ق ر پارلامەنتى ءماجىلىسىنىڭ دەپۋتاتى باقىتجان ەرتايەۆتىڭ اۋىلىندا جاڭا مەكتەپ اشىلدى.
كەڭ سىنىپ بولمەلەرى، زاماناۋي اكت جانە سپورت زالدارى بار 120 ورىندىق ءبىلىم مەكەمەسىنىڭ قۇرىلىسىن «سامعاۋ» ج ش س جۇرگىزدى.

جاڭا مەكتەپتىڭ اشىلۋ سالتاناتىندا كومپانيا باسشىسى سوۆەتحان مىقتىبەكوۆ مەكتەپ ديرەكتورى التىن ابدۋالييەۆاعا سيمۆولدىق كىلتتى تاپسىردى.

جۋالىلىق جۋرناليست گۇلميرا دەمبايەۆانىڭ ايتۋىنشا، وسى اۋىلدىڭ تۇلەگى حالىق قاھارمانى، گەنەرال-لەيتەنانت باقىتجان ەرتايەۆ اۋىلداستارى ءۇشىن كوپتەگەن يگىلىكتى شارالارعا مۇرىندىق بولىپ ءجۇر. «ول ءوزىنىڭ تۋعان جەرى جۋالىعا كەلگەن سايىن جاڭا ءبىر ءىستى الا كەلەدى. سوڭعى بىرنەشە جىلدىڭ ىشىندە ەرتاي اۋىلىندا ءبىزدىڭ جەرلەسىمىز مەشىت پەن ب ا ق، ارداگەرلەر اللەياسىن سالۋعا كومەكتەستى، اۋىلدان شىعار جەردە اركا قۇرىلىسىن قارجىلاندىردى. ونىڭ كومەگىمەن جانە بەلسەندى قولداۋىمەن كوپىرلەر مەن جولدار جوندەلدى، مىنا مەكتەپ سالىندى»، - دەپ ءتۇسىندىردى گ.دەمبايەۆا.

سونىمەن بىرگە سوڭعى كەلگەن جولى ب.ەرتايەۆ اۋىلداستارىمەن بىرگە بۇلاقتاردى تازارتىپ،  كوزىن اشتى. «قامىس باسىپ كەتكەن ارنالاردىڭ تىنىسى كەڭىپ، ءمولدىر بۇلاقتاردان سىلدىراپ سۋ اقتى»، - دەدى جۋالىلىق جۋرناليست.

 «مۇنداي ىزگى باستامالار وسكەلەڭ ۇرپاق ءۇشىن جاقسى ۇلگى، - دەپ اتاپ كورسەتتى جۋالى اۋدانىنىڭ اكىمى باتىربەك قۇلەكەيەۆ. - ال تازا بۇلاق سۋى اۋدانىمىزدىڭ يگىلىگىنە اينالدى».

«سۋ قايدا بولسا، ءومىر - سوندا، - دەدى ب.ەرتايەۆ. - مۇنى ءبىزدىڭ اتا-بابلارىمىز جاقسى بىلگەن. ءمولدىر بۇلاق سۋى ءشول قاندىرۋمەن بىرگە، ونىڭ قۇرامىندا كوپتەگەن پايدالى قاسيەت بار. بۇگىندە تۇششى سۋدىڭ زارىن تارتىپ وتىرعان ەلدەر بار، سوندىقتان دا بۇل ءقازىر الەمدىك پروبلەماعا اينالدى. مەملەكەت باسشىسىنىڭ «اق بۇلاق» باعدارلاماسىنا باستاماشى بولۋى كەزدەيسوق ەمەس. ءبىزدىڭ اۋىلداستارمەن بىرگە اتقارعان ءىسىمىز جاستارىمىزعا دا جۇعىستى بولسا دەگەن تىلەك بار».

وبلىستىق ءبىلىم باسقارماسىنىڭ مالىمەتتەرى بويىنشا، جۋالى اۋدانىندا 42 مەكتەپتە 10 829 بالا ءبىلىم الۋدا. 

دەرەككوز: قازاقپارات