قىزىلوردا. قازاقپارات - بۇگىن قىزىلوردادا XIII رەسپۋبليكالىق «قازاقستاننىڭ قالا قۇرىلىسى فورۋمى» ءوتتى، دەپ حابارلادى وبلىستىق اكىمدىكتىڭ باسپا ءسوز قىزمەتى حابارلادى.
وعان ەلىمىزدىڭ تۇكپىر-تۇكپىرىنەن قۇرىلىسشىلار، وبلىستاردىڭ ساۋلەت جانە قالا قۇرىلىسى باسقارمالارىنىڭ باسشىلارى، قالالاردىڭ باس ساۋلەتشىلەرى، ينجەنەرلەر، جوبالاۋشى كاسىپورىندار مەن ديزاينەرلەر قاتىستى. فورۋم اياسىندا جىلدىڭ ەڭ ۇزدىك ساۋلەت جانە قالا قۇرىلىستىق جوبالارى كورسەتىلگەن كورمە دە ۇيىمداستىرىلدى.

 القالى جيىننىڭ اشىلۋ سالتاناتىندا ءسوز سويلەگەن وبلىس اكىمى قىرىمبەك كوشەربايەۆ سوڭعى جىلدارى قالا مەن اۋدان ورتالىقتارىنىڭ ساۋلەتتىك كەلبەتى ايتارلىقتاي وزگەرگەنىن ايتتى.  

  - ەۋروپوسەنتريستىك كوزقاراستاعى ادامدار كوشپەندىلەر مەكەن ەتكەن ۇلى دالادا «قالا بولماعان» دەگەن پىكىردى العا تارتادى. بۇل ارينە، قاساڭ قاعيدا. ماسەلەن، قازاق حاندىعى تۇسىندا سىر بويىندا 32 قالا بولعان. تەك قازىرگى قىزىلوردا وبلىسىنىڭ اۋماعىندا ءتورت استانانىڭ تاريحتا ءىزى قالعان. اتا-بابالارىمىزدىڭ يگى ءداستۇرىن جالعاستىرۋدى پارىز ساناپ، سىرداريانىڭ سول جاعالاۋىنا جاڭا قالا سالىپ، ەل قوندىرۋدى مۇرات ەتىپ وتىرمىز. بۇعان دەيىن شاھارىمىز سىردىڭ وڭ جاعالاۋىندا دامىعان بولاتىن. ال نەگىزىنەن سول جاعالاۋدى يگەرۋ تۋرالى نىق شەشىمگە كەلۋىمىزگە ەلباسىنىڭ ەرلىگى اسەر ەتتى. مەملەكەت باسشىسى ەسىلدىڭ جاعاسىندا بوي كوتەرگەن استانا قالاسىن الەمنىڭ كورىكتى قالالارىنىڭ بىرىنە اينالدىردى. ءبىز دە استاناعا قاراپ بوي تۇزەپ، سىردىڭ سول جاعالاۋىندا 90 مىڭ حالىق تۇراتىن جاڭا قالانىڭ قۇرىلىسىن باستاماقپىز. سونداي-اق، جاڭا قالانىڭ ساۋلەتىندە شىعىس ستيلىنە، ۇلتتىق ناقىشقا باسىمدىق بەرىلەدى، - دەدى ق.كوشەربايەۆ.

ايتا كەتەيىك، سوڭعى جىلدارى قىزىلوردا ءوڭىرى قارقىندى قۇرىلىس الاڭىنا اينالدى. وبلىستا بيىل قۇرىلىس كولەمى 3،5 ەسەگە ءوستى. ال قىزىلوردا قالاسىندا 8 ەسەگە ارتتى. بولاشاقتا سىردىڭ باس شاھارى داريانىڭ سول جاعالاۋىندا قانات جايماق. ءقازىردىڭ وزىندە داريانىڭ ەكى بەتىن جالعايتىن كوپىردىڭ قۇرىلىسى ءجۇرىپ جاتىر.

قازاقستان قالا قۇرىلىسشىلار وداعىنىڭ پرەزيدەنتى ليۋبوۆ نىسانبايەۆانىڭ ايتۋىنشا، ەندىگى جەردە قالا قۇرىلىسىنىڭ دامۋىندا سىرداريا وزەنىنىڭ استانا قالاسىنداعى ەسىل وزەنى سياقتى تابيعي تارتىمدىلىعى باسىم بولادى.

بۇدان بولەك، فورۋمعا قاتىسۋشىلار سىر جەرىندەگى قالالاردىڭ تاريحىنا كوز جۇگىرتىپ، بايقوڭىر قالاسىنىڭ تۋريستىك الەۋەتىن تالقىعا سالدى. سونداي-اق قازاقستان قالالارىنىڭ ساۋلەتتىك ەرەكشەلىكتەرىن ءسوز ەتتى. 

دەرەككوز: قازاقپارات