الماتىنىڭ مامانداندىرىلعان ەكونوميكالىق سوتى 822 گەكتار الما باعى ورنالاسقان جەردى مەملەكەتكە قايتارۋ تۋرالى شەشىم قابىلدادى.

سوت الماتى پروكۋراتۋراسىنىڭ "حالىقارالىق كلۋبتار قاۋىمداستىعى" كومپانياسىنا، قاراساي اۋدانىنىڭ اكىمدىگىنە جانە جەكە تۇلعالارعا قارسى جەردى جەكە مەنشىككە بەرۋ تۋرالى 2004 جىلعى قاراساي اۋدانى اكىمى قاۋلىسىن، ساتىپ الۋ-ساتۋ شارتىن جانە جەرگە قاتىستى قۇجاتتاردى جارامسىز دەپ تانۋ جونىندەگى ازاماتتىق ءىسىن قارادى.

سوتتىڭ شەشىمىنشە، داۋلى جەر ۋچاسكەلەرى مەملەكەتتىك ورمان قورىنا قايتارىلۋعا ءتيىس. ءىس ماتەريالدارىنا سايكەس ۋچاسكە باستاپقىدا اۋدان اكىمدىگى تاراپىنان اۋىل شارۋاشىلىعىن جۇرگىزۋ ءۇشىن جەكە مەنشىككە بەرىلگەن. كەيىننەن پرەزيدەنتتىڭ جارلىعىمەن جەر الماتىنىڭ اۋماعىنا كىردى. قالالىق جەر قاتىناستارى باسقارماسىنىڭ بۇيرىعى نەگىزىندە بۇل جەر ۋچاسكەسى بولىنۋگە جاتاتىن دەپ تانىلىپ، 16 بولىككە ءبولىنىپ، جەكە تۇلعالارعا ساتىلعان.

"سۋ كودەكسىنىڭ 119-بابىنا سايكەس سۋ قورى جەرلەرىندەگى ۋچاسكەلەر تەك ۋاقىتشا جەر پايدالانۋعا جانە تەك اۋىل شارۋاشىلىعى، ورمان، بالىق، اڭ شارۋاشىلىعى قاجەتىنە بەرىلۋى مۇمكىن. الماتىنىڭ قالالىق جوسپارلاۋ جانە ۋربانيستيكا باسقارماسىنىڭ دەرەكتەرىنشە، اتالعان ۋچاسكە اۋماعىنان كەرەڭقۇلاق وزەنى مەن بەرقارا بۇلاعى اعىپ وتەدى. بۇل دەرەك جەر ۋچاسكەسىنىڭ سۋ قورى جەرىنە جاتاتىنىن راستايدى. وسىعان سايكەس، مۇنداي جەرلەر مەملەكەتتىك مەنشىككە تيەسىلى جانە (نەمەسە) تيەسىلى بولۋى كەرەك"، – دەلىنگەن سوت قاۋلىسىندا.

مۇنداي 30،9 گەكتارلىق جەر ۋچاسكەسىنە قاتىستى ۇقساس ءىس بويىنشا قابىلدانعان شەشىمگە سىلتەمە جاساي وتىرىپ، سوت جەردى مەملەكەتتىك قوردان جەكە مەنشىككە بەرۋ زاڭسىز جانە نەگىزسىز دەپ تانىدى. وسىعان بايلانىستى تالاپكەردىڭ تالاپتارى تولىق قاناعاتتاندىرىلدى.