الماتى. قازاقپارات- بۇگىن الماتى قالاسىنىڭ اكىمدىگى بيزنەستىڭ الەۋمەتتىك جاۋاپكەرشىلىگى اياسىندا «ForteBank» اكسيونەرلىك قوعامىمەن مەموراندۋمعا، ال «ەلەكتروكابەل زاۋىتى» جشس-مەن كەلىسىمگە قول قويدى.
 بۇل تۋرالى الماتى اكىمىنىڭ باسپا ءسوز قىزمەتىنەن حابارلادى.

ەندى وسى قۇجاتتار اياسىندا ەمدەۋ-ساۋىقتىرۋ، ءبىلىم بەرۋ نىساندارىن سالۋ جونىندەگى جوبالار جۇزەگە اسىرىلىپ، كاسىپكەرلىك سەكتورىنا بارىنشا قولداۋ كورسەتىلەتىن بولادى.

«ForteBank» اق-مەن جاسالعان مەموراندۋمعا سايكەس، الماتىدا شاعىن جانە ورتا بيزنەس سۋبەكتىلەرىن جەڭىلدەتىلگەن شاعىن نەسيەلەرمەن قامتاماسىز ەتۋ جوباسىن جۇزەگە اسىرۋ، باسقا دا قارجىلىق قىزمەتتەردى دامىتۋ، اۋەزوۆ اۋدانىندا بالاباقشا سالۋ، بوس جاتقان جەر تەلىمدەرى مەن توقتاپ قالعان وندىرىستەردى، بوس تۇرعان ءۇي-جايلاردى قالانىڭ الەۋمەتتىك-ەكونوميكالىق اينالىمىنا تارتۋ جوسپارلانۋدا.

ال «ەلەكتروكابەل زاۋىتى» ج ش س بولسا، جاسالعان كەلىسىم اياسىندا قالانىڭ ناۋرىزباي اۋدانىندا ءبىر اۋىسىمدا 500 ەمدەلۋشىگە دەيىن قابىلداي الاتىن ەمحانا سالىپ بەرەدى. جوبا قۇنى 1،2 ملرد. تەڭگە.

الماتى اكىمى باۋىرجان بايبەك مەگاپوليستىڭ الەۋمەتتىك- ەكونوميكالىق دامۋىندا بيزنەستىڭ ماڭىزدى ءرول اتقاراتىندىعىن ايتا كەلە، بانك پەن كومپانيا باسشىلىعىنا ريزاشىلىعىن ءبىلدىردى. 

«مەملەكەت باسشىسى نۇرسۇلتان نازاربايەۆتىڭ حالقىمىزدىڭ الەۋمەتتىك  احۋالىن جاقسارتۋ تۋرالى تاپسىرماسى اياسىندا ءبىز وتە ماڭىزدى شارانى ۇيىمداستىرىپ وتىرمىز. الەمنىڭ وركەنيەتتى، دامىعان ەلدەرى قاتارىنا قوسىلۋ جونىندەگى ەلباسىنىڭ الدىمىزعا قويىپ وتىرعان مىندەتتەرىن ورىنداۋ ءۇشىن مەملەكەت، بيزنەس جانە ۇكىمەتتىك ەمەس ۇيىمدار بىرىگىپ جۇمىس ىستەسە، تيىمدىلىك تە ارتا تۇسەدى»، - دەدى  باۋىرجان بايبەك.

ەستەرىڭىزگە سالا كەتەيىك،  الماتى قالاسىنىڭ اكىمدىگى بۇعان دەيىن «كازكوممەرسبانك» اق، «اتفبانك»، «بانك استانى» جانە «اۆتوگاز ترەيد» جشس-مەن  كەلىسىمدەرگە قول قويعان بولاتىن.

دەرەككوز: قازاقپارات