الماتى. قازاقپارات - بۇگىن الماتىعا اۆستريادان ارنايى بيزنەس-دەلەگاسيا كەلدى. باستى ماقسات - ەكى ەل اراسىنداعى ەكونوميكالىق بايلانىستاردى نىعايتۋ. 
ۆەنا ەكونوميكالىق پالاتاسىنىڭ پرەزيدەنتى ۆالتەر رۋك باستاپ كەلگەن دەلەگاسيا قۇرامىندا تۋريزم، ونەركاسىپ، لوگيستيكا، ءار ءتۇرلى زەرتحانالىق زەرتتەۋلەر، ەنەرگەتيكا جانە ەكونوميكانىڭ باسقا دا سالالارىندا قىزمەت اتقاراتىن كاسىپكەرلەر بار. 

«ءبىز 30-دان استام اۆستريالىق كومپانيانىڭ وكىلدەرىن الىپ كەلدىك. ولار قازاقستاندىق بيزنەسمەندەرمەن كەزدەسىپ، كەلىسسوزدەر جۇرگىزە الادى. ءبىز ءۇشىن باستى باعىتتار - بۇل تۋريزم جانە تەحنولوگيا. سونىمەن قاتار ارامىزدا ۆەنا تۋريستىك مەكتەبىنىڭ وكىلدەرى بار. ولار قازاقستاندىق ارىپتەستەرىمەن ءبىلىم سالاسى بويىنشا ىنتىماقتاستىق ورناتقىسى كەلەدى. كوپتەگەن كومپانيا وكىلدەرى ءبىرىنشى رەت كەلىپ وتىر. سوندىقتان ازىرگە ناقتى كەلىسىمشارتتار تۋرالى ايتۋ ەرتە. ءبىز ەڭ الدىمەن ولارعا قازاقستاندى تانىستىرۋىمىز كەرەك»، - دەدى ۆ.رۋك. 

ول سونىمەن قاتار قوقىستاردى كادەگە جاراتۋ، سۋ تازارتۋ، جىلۋمەن قامتاماسىز ەتۋ سەكىلدى باعىتتار بويىنشا اۆستريالىق كومپانيالاردىڭ تاجىريبەسى جوعارى ەكەندىگىن ايتىپ، مىسال رەتىندە ۆەنا ورتالىعىنداعى قوقىس ورتەيتىن سۇزگىلى قوندىرعى جايىندا اڭگىمەلەدى. 

«قازاقستاننىڭ ەكونوميكانى ءارتاراپتاندىرۋ بويىنشا مەملەكەتتىك ماڭىزعا يە جوسپارى بار. سوندىقتان اۆستريالىق كومپانيالار تەمىرجول، ەلەكتر جەلىسى، تەڭىز پورتتارىن كەڭەيتۋ، الەۋمەتتىك تۇرعىن ءۇي سالۋ سەكىلد باعىتتار بويىنشا جاقسى سەرىكتەس بولا الادى. بۇدان باسقا، «ەكسپو-2017» حالىقارالىق كورمەسى مەن 2017 جىلعى قىسقى ۋنيۆەرسيادا ويىندارى ەكى ەل اراسىنداعى ىنتىماقتاستىقتى نىعايتۋعا جاڭا سەرپىن بەرە الادى. ال ەۋرازيالىق ەكونوميكالىق وداقتىڭ نارىعى مەن ارتىقشىلىقتارى اۆستريالىق كاسىپكەرلەردى قازاقستان ەكونوميكاسىنا ينۆەستيسيا جۇمساۋعا ىنتالاندىرا تۇسەدى»، - دەدى ەكونوميكالىق پالاتا باسشىسى. 

ال قازاقستاندىقتار ەۋروپالىق وداقتىڭ نارىعىنا ەنۋ ءۇشىن اۆستريانى ينۆەستيسيالىق الاڭ رەتىندە پايدالانا الادى. ويتكەنى، كوپتەگەن حالىقارالىق ۇيىمدار مەن زەرتتەۋ ينستيتۋتتارىنىڭ شتاب-پاتەرلەرى وسى ەلدە ورنالاسقان. سونىمەن قاتار اۆستريانىڭ قارجىلىق نارىعى، تۋريزم سالاسى جانە ينفراقۇرىلىمى جاقسى دامىعان. 

«ارينە، باتىس ەۋروپا الەمدەگى ەڭ باسەكەلى ورتا عوي. ەگەر قانداي دا ءبىر قازاقستاندىق كاسىپورىن بۇل نارىققا ەنگىسى كەلسە، وندا ول تابىستى ءارى نارىق وزگەرىستەرىنە يكەمدى بولى ءتيىس»، - دەدى ۆ.رۋك. 

ايتا كەتەلىك، قازاقستاندا بۇگىنگى تاڭدا ءتۇرلى سالادا 50 اۆستريالىق كومپانيا قىزمەت اتقارادى.

دەرەككوز: قازاقپارات