استانا. قازاقپارات -  جامبىل وبلىسىنىڭ  اكىمى كارىم كوكىرەكبايەۆ باستاعان دەلەگاسيا بەلارۋس رەسپۋبليكاسىنىڭ گرودنەنسكايا وبلىسىنا ىسساپارمەن بارىپ قايتتى.
قۇرامىندا اۋدان اكىمدەرى، جوعارى وقۋ ورنىنىڭ، ساۋدا-ساتتىق مەكەمەلەرىنىڭ، شارۋا قوجالىقتارىنىڭ باسشىلارى بار دەلەگاسيانى گرودنو قالاسىندا گرودنەنسكايا وبلىسىنىڭ گۋبەرناتورى ۆلاديمير كراۆسوۆ قارسى الدى. بۇل تۋرالى وبلىس اكىمدىگىنىڭ باسپا ءسوز قىزمەتىنەن حابارلادى. 
ءىسساپاردىڭ العاشقى كۇنىندە جامبىلدىق توپ «ليدسەلماش» ااق، «ليداگروپرومماش» ااق، «پروگرەسس-ۆەرتيليشكي» اكك-ىندا بولىپ، ولاردىڭ جۇمىسىمەن جان-جاقتى تانىستى.
كەزدەسۋ بارىسىندا وبلىس اكىمى كارىم كوكىرەكبايەۆ:

«مەن بەلارۋس ەلىنە ەكىنشى رەت، ال گرودنەنسكايا وبلىسىنا ءبىرىنشى رەت تابان تىرەپ تۇرمىن. ەلدىڭ، سونىڭ ىشىندە وسى ءوڭىردىڭ ونەركاسىبى عانا ەمەس، الەۋمەتتىك دامۋى مەنى تاڭعالدىردى. ەكى تاراپ ءۇشىن دە ىسكەرلىك بايلانىس ورناتىپ، ەكونوميكالىق، ءبىلىم، مادەنيەت جانە تۋريزم سالالارى بويىنشا قارىم-قاتىناستى نىعايتۋ ءتيىمدى دەپ ەسەپتەيمىن»، - دەدى كارىم كوكىرەكبايەۆ. سونىمەن قاتار، وبلىس باسشىسى ءوز سوزىندە كورشىلەس ەلدىڭ وبلىس، اۋدان باسشىلارىمەن ءتىل تابىسۋ جەڭىل ەكەندىگىن ايتا كەلە، بەلورۋسسياداعى حالىق سانى وبلىسىمىزبەن شامالاس وڭىرلەرمەن تۋىستاس بولۋعا نيەتتى ەكەندىگىن جەتكىزدى. ءوز كەزەگىندە ۆلاديمير كراۆسوۆ ارىپتەسىنە قولداۋ ءبىلدىرىپ، سىرتقى ەكونوميكالىق ۆەدومستۆوعا ءتيىستى قۇجاتتاردى دايىنداۋدى تاپسىردى.
كەزدەسۋ بارىسىندا  گرودنەن گۋبەرناتورى مەن وبلىس اكىمى قۇراستىرمالى وندىرىسپەن اينالىساتىن «ليدسەلماش» حولدينگىنىڭ فيليالىن قۇرۋعا الدىن الا كەلىسىم جاسادى. مۇنىمەن قوسا، گرودنەنسكىلىك اۋىلشارۋاشىلىعى تەحنيكالارىنىڭ كورمە پاۆيلونىن، اياق كيىم فابريكاسىنىڭ فيليالىن قۇرۋ، گرودنەندىك  وندىرۋشىلەردىڭ جيھازدارىن  جامبىل جەرىنە جەتكىزۋ ماسەلەسى بويىنشا دا پىكىر الماستى.
ايماق باسشىلارى ەكونوميكالىق ارىپتەستىك جايىن عانا قوزعاپ قويماي، موبيلدىك ءبىلىم بەرۋ، مادەني، الەۋمەتتىك بايلانىس جايىن دا تالقىلاندى.
«ءبىز ماماندارمەن تاجىريبە الماسىپ، اۋىل شارۋاشىلىعى ونەركاسىبى بويىنشا عانا ەمەس، مادەني بايلانىستاردى دا نىعايتۋىمىز كەرەك. سونىمەن بىرگە، ىشكى جانە سىرتقى ءتۋريزمدى دامىتۋعا دا نيەتتىمىز. ءبىزدىڭ وبلىسىمىز ارقىلى ۇلى جىبەك جولى وتكەن. بىزدە ەكى مىڭنان استام كونە تاريحي ەسكەرتكىشتەر بار. سىزدەردىڭ دە تاريحتارىڭىز باي. مەنىڭ ويىمشا، ءبىز وسى سالادا دا مىقتى بايلانىس ورناتا الامىز. مادەني بايلانىستاردى دا قارقىندى دامىتۋعا مۇمكىندىك زور»، - دەدى دە كارىم كوكىرەكبايەۆ 2016 جىلى گرودنوداعى جامبىل وبلىسىنىڭ مادەني كۇندەرىن، ونان سوڭ گرودنەنسكايا وبلىسىنىڭ تارازداعى مادەني كۇندەرىن وتكىزۋدى ۇسىندى. ال ۆلاديمير كراۆسوۆ ءوز كەزەگىندە ارىپتەسىن كەلەر جىلدىڭ ماۋسىم ايىندا گرودنودا وتەتىن رەسپۋبليكالىق ۇلتتىق مادەني ءىس-شاراعا قاتىسۋعا شاقىردى.
قوس تاراپ تا مۇنىمەن قوسا، اۆياتاسىمال ماسەلەسىن دامىتۋعا قىزىعۋشىلىق تانىتتى. كارىم ناسبەك ۇلى تارازدان گرودنو قالاسىنا نەمەسە مينسككە تىكەلەي ۇشۋ باعىتىن ۇيىمداستىرۋ جاعىنا كوڭىل بولەتىنىن ايتتى. بەلارۋستاردىڭ شيپاجايلارىن قازاقستاندىق تۋريستەردىڭ پايدالانۋىنا مۇمكىندىك تۋعىزۋ جاعى دا ۇمىت قالمادى. وبلىس اكىمى تىنىعۋ، ساۋىقتىرۋ قىزمەتتەرىن كورسەتۋ ءۇشىن تىكەلەي كەلىسىمشارتتارعا قول قويۋعا دايىن ەكەندىگىن ءبىلدىردى.

دەرەككوز: قازاقپارات