وسكەمەن. قازاقپارات - ق ر ۇكىمەتى اپپاراتىنىڭ قاراۋىنا KIA Soul EV العاشقى قازاقستاندىق ەلەكتروكارى كەلىپ جەتتى.
«ازيا اۆتو» كولىك قۇراستىرۋ زاۋىتى ۇسىنعان اۆتوموبيل ءبىر اي بويى مينيسترلەر كابينەتىنىڭ قىزمەتتىك پاركىندە جول سىناعىنان وتەتىن بولادى. وتاندىق كولىك ونەركاسىبىندە ەلەكتر كۇشىمەن جۇرەتىن العاشقى مودەل - وسكەمەندە جينالعان KIA Soul EV ميكروۆەنى بولدى، دەپ حابارلادى «ازيا اۆتو» كومپانياسىنان.
قازاقستاندىق كولىك ونەركاسىبى تاريحىنداعى ءبىرىنشى ەلەكتروموبيلدىڭ ىلكى پارتياسى «ازيا اۆتو» زاۋىتىنىڭ كونۆەيىرىنەن 2014 جىلدىڭ جەلتوقسانىندا تۇسكەن. ايتا كەتەيىك، KIA Motors كومپانياسى Soul EV ميكروۆەنىن 2014 جىلى چيكاگو كولىك سالونىندا ۇسىنعان، ال بيىلعى جىلى بۇل مودەل نورۆەگيا، كورەيا، گەرمانيا، اقش جانە تاعى باسقا كوپتەگەن ەلدەر نارىقتارىنداعى ەلەكتروكارلار سەگمەنتىندە ۇلكەن سۇرانىسقا يە بولدى.
اۆتوموبيل 200 شاقىرىمعا دەيىن ءجۇرۋ قورىن ساقتاپ وتىراتىن سىيىمدىلىعى ساعاتىنا 27 كۆت ليتيي-يوندىق پوليمەرلى باتارەياسىمەن جابدىقتالعان. Soul EVء-نىڭ ەلەكتر قوزعالتقىشىنىڭ 110 ليترلىك قۋاتتىلىعى ساعاتىنا 145 شاقىرىم ماكسيمالدىق جىلدامدىقتى قامتاماسىز ەتەدى. بۇل مودەلدە ورناتىلعان جىلۋدى رەتتەۋ جۇيەسىنىڭ ارقاسىندا ونى كەز كەلگەن تەمپەراتۋرالىق رەجيمدە پايدالانۋعا بولادى.
2015 جىلدىڭ قاڭتار-اقپان ايلارىندا وسكەمەندە قۇراستىرىلعان KIA Soul EV ەلەكتروموبيلدەرى شىعىس قازاقستان كۇرە جولدارىندا مينۋس 25 گرادۋسقا دەيىنگى تەمپەراتۋرادا ۇزاق قىسقى سىناقتاردان تابىستى ءوتتى.
«بۇگىندە رەسپۋبليكانىڭ جولدارىندا تەك 200 ەلەكتروموبيل پايدالانىلۋدا. بۇل سان سيمۆوليكالىق. ءبىراق بارىنەن بۇرىن ءبىر جىلدىڭ ىشىندە قازاقستانداعى ەكولوگيالىق كولىك پاركى ەكى ەسەلەندى. بىزدە شىعارىلعان KIA Soul EV كولىگىن ۇيدەگى روزەتكا ارقىلى زاريادتاۋعا بولادى. ولاي بولعانىمەن، رەسپۋبليكادا ەكوكولىكتىڭ ودان ءارى تارالۋىنا وعان قۇياتىن ينفراقۇرىلىمنىڭ جوقتىعى كەدەرگى بولىپ وتىر. ەنەرگيانىڭ تازا كوزدەرىنە ارنالعان ەكسپو-2017 كورمەسىنىڭ يەسى رەتىندە قازاقستان «جاسىل» كولىكتى پايدالانۋ ءۇشىن جاعدايلار جاسايتىنى ءسوزسىز. ينفراقۇرىلىمنىڭ دامۋىمەن بىرگە ءبىز اۆتوموبيلدەردىڭ سەريالىق ءوندىرىسىن دە تالقىلاي الامىز. بۇل باعىتتا العاشقى قادامدار جاسادىق»، - دەيدى «ازيا اۆتو» اق-نىڭ پرەزيدەنتى ەرىك ساعىمبايەۆ.
دەرەكوز: قازاقپارات
