استانا. قازاقپارات - جەر جانناتى جەتىسۋ وڭىرىندە «عالي ورمانوۆ - مايتالمان ليريك اقىن» اتتى رەسپۋبليكالىق عىلىمي-تاجىريبەلىك كونفەرەنسيا ءوتتى.
اقىن شىعارماشىلىعىنا ارنالعان القالى جيىننىڭ قۇرمەتتى قوناقتارى اقىننىڭ قىزى جاميعا ورمانوۆا مەن اقىننىڭ نەمەرەسى بولدى. سونداي-اق، ءىس-شاراعا ساعىمباي قوزىبايەۆ، تۇرسىن سىدىقوۆ، گۇلجاھان وردا، جەتپىسباي بەكبولات ۇلى، نۇرتازا قادىرنيازوۆ جانە باسقا ەلىمىزگە تانىمال قالامگەرلەر، ادەبيەت زەرتتەۋشىلەرى، اقىن مۇراسىن ناسيحاتتاۋشىلار قاتىستى. كونفەرەنسيا جۇمىسى عالي ورمانوۆ پەن ءىلياس جانسۇگىروۆ ەسكەرتكىشتەرىنە گۇل شوقتارىن قويۋ راسىمىنەن باستاۋ الدى. كوركەم ءسوزدى قاستەرلەگەن ءوڭىردىڭ ستۋدەنتتەرى ع.ورمانوۆ پەن تاۋەلسىزدىك كوشەلەرىنىڭ قيىلىسىندا 2008 جىلى ورناتىلعان عالي اقىننىڭ ەسكەرتكىشىنىڭ جانىندا تالانتتى تۇلعاعا ارناعان جىرلارىنان شاشۋ شاشتى. اقىننىڭ قىزى جاميعا ورمانوۆا اتالعان ءبىلىم ورداسىنىڭ اقىن ەسىمىمەن اتالاتىن عىلىمي كىتاپحاناسى مەن ۋنيۆەرسيتەت مۇراجايىن ارالاپ، 43 جىلدىق تاريحى بار قارا شاڭىراقتىڭ بۇگىنگى تىنىس-تىرشىلىگىمەن تانىستى.
2017 جىلى عالي ورمانوۆتىڭ 110 جىلدىق مەرەيتويى قارساڭىندا ۇيىمداستىرىلعان جيىندى ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى، ق ر ۇلتتىق عىلىم اكادەمياسىنىڭ كوررەسپوندەنت-مۇشەسى ءابدىماناپ بەكتۇرعانوۆ العى ءسوز سويلەپ اشتى. باسقوسۋ بارىسىندا ءال-فارابي اتىنداعى قازاق ۇلتتىق ۋنيۆەرسيتەتى، تۇران ۋنيۆەرسيتەتى، م.اۋەزوۆ اتىنداعى ادەبيەت جانە ونەر ينستيتۋتى، جاركەنت گۋمانيتارلىق-تەحنيكالىق كوللەدجى مەن ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ءبىرقاتار پروفەسسورلارى اقىن شىعارماشىلىعىنا بايلانىستى ءار ءتۇرلى تاقىرىپتاردا بايانداما جاساپ، ونەگەلى ءومىرى مەن شىعارماشىلىعىنان تىڭدارمانعا ءبىر ۇزىك سىر شەرتتى. سونداي-اق، ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ ستۋدەنتتەرى اقىن جىرلارىن ساعىنعان تىڭدارمانعا بالداي جىرلارىنىڭ ءدامىن تاتقىزدى. كونفەرەنسيادا اقىننىڭ قىزى جىلى جۇزدەسۋدى ۇيىمداستىرعان ۋنيۆەرسيتەت رەكتورىنا العىس ءبىلدىرىپ، وعان عالي ورمانوۆتىڭ «ءىلياستىڭ سوڭعى كۇندەرى» جانە «بيوگرافيا يلياسا دجانسۋگۋروۆا»، «سلوۆو وب يلياسە» اتتى ورىس تىلىندە جازىلعان قولجازبالارىن تابىس ەتتى.
«ادامگەرشىلىكتىڭ بار اسىل قاسيەتتەرىن بويىنا جيناقتاعان اكەم 1939-1945 جىلدارى جىر الىبى جامبىلدىڭ ادەبي حاتشىسى، پوەزياداعى ءىلياستىڭ ءىزباسارى بولعان. 4-5 جاسار كەزىمدە 96 جاستاعى جامبىل اتامىز كوك بازاردىڭ جانىنداعى ۇيىمىزگە ءجيى كەلىپ تۇراتىنى ەسىمدە. جانسارايى قازىناعا تولى بولعان جامبىل بابامىزدىڭ كوڭىلىنىڭ كىلتىن تابۋ وڭاي شارۋا بولماعان. بيىك بايتەرەگىمىز بولعان اكەم بىزگە كىتاپ وقىڭدار دەپ ءجيى ايتاتىن. اسىلدىعىنان اينىماعان ول ومىردە وتە قاراپايىم، مەيىرىمدى، اق كوڭىلدى، ادال، جومارت، جاناشىر جان بولعان ەدى. ءدال وسى قاسيەتتەرىمەن ول اينالاسىنا سىيلى ادام بولعان. جۇرەگىمەن جازعان جىرلارىن جاس ۇرپاق جاڭا عاسىرلارعا جەتكىزەدى دەپ ۇمىتتەنەمىن»، - دەدى اقىننىڭ قىزى جاميعا ورمانوۆا.
جيىن سوڭىندا قاتىسۋشىلار تالدىقورعانداعى اقىن اتىنداعى كوشەدە ەسكەرتكىشىمەن ىرگەلەس تۇرعان №4 ورتا مەكتەپكە ونىڭ ەسىمىن بەرۋ تۋرالى ءوز ۇسىنىستارىن ءبىلدىردى.
اقىننىڭ قىزى بۇل كۇنى تالدىقورعانداعى ءىلياس جانسۇگىروۆتىڭ ادەبي مۋزەيىن جانە الماتى وبلىسى، اقسۋ اۋدانىنداعى قاپال اۋىلىنداعى عالي ورمانوۆ اتىنداعى ورتا مەكتەبىنىڭ مۇراجايىن ارالادى. قازىرگى تاڭدا اقىن دۇنيەگە كەلگەن جەتىسۋدىڭ شۇرايلى ولكەسى قاپال اۋىلىندا بۇل ءبىلىم ورداسىنىڭ مۋزەيىندە ونىڭ قولجازبالارى، جىر جيناقتارى، ماراپاتتارى، وتباسىمەن بىرگە تۇسكەن فوتوسۋرەتتەرى، تۇتىنعان بۇيىمدارى، دىنمۇحامەد قونايەۆ سىيلاعان ساعاتى، عابيت مۇسىرەپوۆ تارتۋ ەتكەن دومبىراسى، عابيدەن مۇستافين ەستەلىككە بەرگەن م.گوركييدىڭ ءمۇسىنى، گرۋزيا جازۋشىلارىنىڭ سىيلىعى ساقتالىپ تۇر.
دەرەككوز: قازاقپارات
