الماتى. قازاقپارات - بۇگىن الماتى قالاسىنىڭ اكىمى باۋىرجان بايبەك ءتيىستى كاسىپورىنداردىڭ الداعى قىسقى ماۋسىمدا كوشە تازارتۋ جۇمىستارىنا دايىندىعىن تەكسەردى. 
الماتىدا تازارتىلاتىن كوشەلەردىڭ جالپى ۇزىندىعى 1620 شاقىرىمدى قۇرايدى. ولاردىڭ 65 پايىزىن «الماتى تازالىق» مەملەكەتتىك كوممۋنالدىق كاسىپورنى تازارتادى. ال جالپى جولدار مەن تروتۋارلاردى تازارتۋ جۇمىسىن 17 مەردىگەر ۇيىم اتقارادى.  ولاردا قىسقى تازارتۋ جۇمىستارىنا 860 ارنايى تەحنيعا جۇمىلدىرىلعان. 

«الماتى تازالىق» مكك ديرەكتورى ەلدار كەلدىبايەۆ ارنايى تەحنيكالاردىڭ الداعى قىسقى ماۋسىمعا 100 پايىز دايىن ەكەندىگىن ايتتى. ولارعا قوسىمشا جۇكتى ءوزى تۇسىرە بەرەتىن تاعى 300 جۇك كولىگى تارتىلاتىن بولادى. ءاربىر اۋداندا قۇم توگەتىن ءبىر-بىر قازانشۇڭقىردان بار. ال قۇمدار قالا كوشەلەرىنە 15 ارنايى قۇم تاسۋشى كولىك ارقىلى سەبىلەدى.  

«ءبىز 9 ملن. شارشى مەتر جەردى تازارتامىز. بۇل وڭاي شارۋا ەمەس، قالانى ءبىر مەزەتتە تازارتا المايسىڭ. ءقازىر بۇل جۇمىستار الدىن الا پىسىقتالىپ جاتىر. قار جاۋعاننان باستاپ، كوشەلەردى سىپىرا باستايمىز. ءبىز ءاربىر كوشەدەن جينالعان قاردى جۇك كولىكتەرىنە ارتىپ، قالا سىرتىنا شىعارىپ تاستايمىز»، - دەدى ە. كەلدىبايەۆ.

«مەن جاقىندا قار تاستايتىن جەرلەرلى جانە ارنايى تەحنيكالاردى قايتا تەكسەرىپ شىعامىن. جالپى قاردى قالا سىرتىنا شىعارۋ جۇمىسى قالاي ۇيىمداستىرىلعان؟ قاعاز جۇزىندە عانا شىعاراسىزدار، ال شىن مانىسىندە شىعارىلا بەرمەيدى. ەندى قار تاستالاتىن جەرلەرگە بەينە كامەرالار ورناتىپ، ارنايى كەزەكشى قويۋ كەرەك. قار تاسيتىن جۇك كولىكتەرىنىڭ ءنومىرىن تىركەۋ كەرەك بولادى» - دەدى ءوز كەزەگىندە ب. بايبەك.

سونىمەن قاتار، قالا باسشىسى استانادا قار تازارتۋ بويىنشا اتقارىلار جۇمىستاردى مىسالعا كەلتىردى. ەلوردادا كوشەلەر قاردان تۇنگى ۋاقىتتا تازارتىلادى ەكەن.  

«الماتىدا قانداي كوشەلەردى ءبىرىنشى بولىپ تازارتاسىزدار؟ ءبىرىنشى كەزەكتە، ارينە، نەگىزگى ماگيسترالدار تازارتىلۋى ءتيىس. كولىك كەپتىلىسى كوبەيىپ، قاربالاس ساتتەر تۋىنداعان شاقتا قار تازارتۋ جۇمىستارىن  جۇرگزۋدىڭ قاجەتى جوق. استانادا قاردى تۇندە تازارتادى. تاڭەرتەڭ سول تازارتىلعان جولمەن جۇمىسقا باراسىڭ»، - دەدى ب. بايبەك.

«مەن سيتۋسيالىق، ياعني جاعداياتتىق كارتانى كورگىم كەلەدى. سىزدەردىڭ دايىندىق دەڭگەيلەرىڭىزدى، ناقتى جاعدايلاردا قالاي جۇمىس ىستەيتىندەرىڭىزدى بىلگىم كەلەدى. قار تاستالاتىن جەرلەرگە بەينەكامەرالار ورناتىلىپ، جۇمىس باقىلاۋعا الىنۋى ءتيىس. مەردىگەرلىك ۇيىمدارمەن اراداعى كەلىسىم-شارتتارىڭىزدى كورسەتىڭىزدەر. جۇمىستى ساپاسىز اتقاراتىن ۇيىمدارمەن كەلىسىم-شارت جاسالماسىن. ەگەر باسقا ۇسىنىستارىڭىز بولسا، ايتىڭىزدار، تالقىلايمىز، - دەدى ب. بايبەك.

بۇدان باسقا قالا باسشىسى الدىندا بارلىق اۋدان اكىمدەرى ەسەپ بەردى. ولار ارنايى تەحنيكالاردىڭ ءجۇرۋ باعىتتارىن ءتۇسىندىردى.

دەرەككوز: قازاقپارات